خروج 2 - Muslim Sindhi Bible

موسيٰ جو ننڍپڻ

¹ ان عرصي ۾ لاوي قبيلي جي هڪڙي ماڻهوءَ وڃي پنهنجي قبيلي جي هڪڙيءَ عورت سان شادي ڪئي.

² اها عورت پيٽ سان ٿي ۽ کيس پٽ ڄائو. جڏهن هن ڏٺو تہ ٻار سهڻو آهي تڏهن کيس لڪائي رکيائين. ائين کيس ٽي مهينا گذري ويا.

³ پر جڏهن کيس وڌيڪ لڪائي نہ سگھي، تڏهن ڪانن جو هڪڙو ٽوڪرو ٺاهيائين جنهن کي رال ۽ ڏامر لڳائي ٻار کي انهيءَ ۾ رکي اهو درياءَ جي ڪناري تي ٻوڙن ۾ رکي ڇڏيائين.

⁴ انهيءَ ٻار جي ڀيڻ پري کان بيهي ڏسندي رهي تہ هن سان ڇا ٿو ٿئي.

⁵ ان وقت فرعون جي ڌيءَ درياءَ تي وهنجڻ آئي. سندس ٻانهيون درياءَ جي ڪناري تي گھمڻ لڳيون. اوچتو فرعون جي ڌيءَ جي نظر انهيءَ ٽوڪري تي پيئي. هن پنهنجي ٻانهيءَ کي موڪليو تہ اهو کڻي اچي.

⁶ جڏهن هن اهو کوليو تہ ڏٺائين تہ ان ۾ هڪ ڇوڪرو هو جيڪو رنو پئي. کيس انهيءَ ٻار تي رحم آيو ۽ چوڻ لڳي تہ ”هي ڪنهن عبرانيءَ جو ٻار آهي.“

⁷ تڏهن ٻار جي ڀيڻ فرعون جي ڌيءَ کي چيو تہ ”جيڪڏهن توهان چئو تہ آءٌ وڃي عبراني عورتن مان ڪنهن ٿڃ ڌارائيندڙ دائيءَ کي توهان وٽ وٺي اچان، جيڪا توهان جي لاءِ هن ٻار کي کير پيئاري.“

⁸ فرعون جي ڌيءَ چيس تہ ”ڀلي وڃ.“ تڏهن اها ڇوڪري ويئي ۽ انهيءَ ٻار جي ماءُ کي سڏي آئي.

⁹ فرعون جي ڌيءَ هن کي چيو تہ ”هن ٻار کي کڻي وڃي منهنجي طرفان نپاءِ. آءٌ تو کي انهيءَ جو اجورو ڏينديس.“ سو اها عورت انهيءَ ٻار کي کڻي ويئي ۽ کيس نپايائين.

¹⁰ پوءِ جڏهن ٻار وڏو ٿيو تڏهن هوءَ کيس فرعون جي ڌيءَ وٽ وٺي آئي. هن کيس پنهنجو پٽ بڻايو ۽ سندس نالو موسيٰ رکيائين، جو چيائين تہ ”مون هن کي پاڻيءَ مان ڪڍيو آهي.“

موسيٰ جو مديان ڏانهن ڀڄي وڃڻ

¹¹ پوءِ جڏهن موسيٰ وڏو ٿيو تہ هڪ ڏينهن ٻاهر پنهنجي هم‌قوم عبرانين وٽ ويو، جتي سندن تڪليفون ڏٺائين. هن ڏٺو تہ هڪڙو مصري سندس هڪ عبراني ڀاءُ کي ماري رهيو هو.

¹² موسيٰ هيڏانهن هوڏانهن نهاريو. جڏهن ڏٺائين تہ اتي ٻيو ڪو ماڻهو ڪونهي تڏهن انهيءَ مصريءَ کي ماري سندس لاش واريءَ ۾ لڪائي ڇڏيائين.

¹³ ٻئي ڏينهن جڏهن وري ٻاهر نڪتو تڏهن ٻن عبرانين کي پاڻ ۾ وڙهندو ڏٺائين. انهن مان جيڪو ناحق تي هو تنهن کي چيائين تہ ”تون پنهنجي قوم واري کي ڇو ٿو مارين؟“

¹⁴ هن چيس تہ ”ڪنهن تو کي اسان جي مٿان حاڪم يا منصف مقرر ڪيو آهي؟ تون مون کي انهيءَ مصريءَ وانگر مارڻ ٿو چاهين ڇا؟“ اهو ٻڌي موسيٰ ڊڄي ويو ۽ دل ۾ چيائين تہ ”ضرور اها ڳالهہ ظاهر ٿي چڪي آهي.“

¹⁵ فرعون جڏهن اها ڳالهہ ٻڌي تڏهن موسيٰ کي مارائڻ جو ارادو ڪيائين. پر موسيٰ فرعون وٽان ڀڄي ويو ۽ وڃي مديان جي علائقي ۾ رهڻ لڳو. هڪ ڏينهن جڏهن موسيٰ هڪڙي کوهہ وٽ ويٺو هو

¹⁶ تہ اتي مديان جي مذهبي اڳواڻ يٿرو جون ست ئي ڌيئرون آيون. اهي کوهہ مان پاڻي ڪڍي ڪونارين کي ڀرڻ لڳيون تہ جيئن پنهنجي پيءُ جي ڌڻ کي پاڻي پيئارين.

¹⁷ ان وقت ڪجھہ ڌنار اچي هنن کي اتان هٽائڻ لڳا. تڏهن موسيٰ اُٿي سندن مدد ڪئي ۽ سندن ڌڻ کي پاڻي پيئاريائين.

¹⁸ جڏهن اهي پنهنجي پيءُ وٽ موٽي آيون تڏهن هن پڇين تہ ”اڄ اوهين ايترو جلد ڪيئن آيون آهيو؟“

¹⁹ هنن ٻڌايس تہ ”هڪڙي مصريءَ اسان کي ڌنارن جي هٿان ڇڏايو ۽ اسان جي لاءِ پاڻي ڪڍي ڌڻ کي پيئاريائين.“

²⁰ تڏهن هن پنهنجي ڌيئرن کي چيو تہ ”اهو ماڻهو ڪٿي آهي؟ اوهين ڇو انهيءَ کي ڇڏي آيون آهيو؟ سڏي اچوس تہ ماني کائي.“

²¹ پوءِ موسيٰ يٿرو جي گھر ۾ رهڻ لڳو. يٿرو پنهنجي ڌيءَ صفورہ موسيٰ کي پرڻائي ڏني

²² ۽ انهيءَ مان موسيٰ کي هڪڙو پٽ ڄائو جنهن جو نالو جيرشوم رکيائين، جو چيائين تہ ”آءٌ غير ملڪ ۾ ڌاريو هئس.“

²³ گھڻي عرصي گذرڻ کان پوءِ مصر جو اهو فرعون بادشاهہ مري ويو ۽ ٻيو فرعون بادشاهہ بڻيو. پر بني اسرائيل اڃا تائين غلاميءَ جي ڪري آهون ڀريندا ۽ روئندا ٿي رهيا. سندن روئڻ جيڪو غلاميءَ جي مصيبت جي ڪري هو، سو خدا تائين وڃي پهتو.

²⁴ تڏهن خدا سندن دانهون ٻڌي پنهنجي انهيءَ عهد کي ياد ڪيو، جيڪو هن ابراهيم، اسحاق ۽ يعقوب سان ٻڌو هو.

²⁵ خدا بني اسرائيل تي نظر ڪئي ۽ سندن سار لڌائين.