2.بادشاهَہ 21 - Muslim Sindhi Bible

يهوداہ جو بادشاهہ منسي

¹ جڏهن منسي بادشاهہ ٿيو تڏهن سندس عمر ٻارهن سال هئي. هن يروشلم ۾ رهي اٽڪل پنجونجاهہ سال بادشاهي ڪئي. سندس ماءُ جو نالو حفصي‌باہ هو.

² جن غير قومن کي خداوند بني اسرائيل جي اڳيان هڪالي ڪڍيو هو تن جي ڪراهت جهڙن ڪمن جي پيروي ڪندي هن بہ اهي ئي ڪم ڪيا جيڪي خداوند جي نظر ۾ برا هئا.

³ هن اهي ٽڪرين تي ٺهيل غير معبودن وارا پوڄا گھر وري تعمير ڪرايا، جيڪي سندس پيءُ حزقياہ ڊاهي ڇڏيا هئا. هن بعل ديوتا لاءِ پڻ قربان‌گاهون ٺهرايون ۽ يسيرہ ديويءَ جو هڪڙو ٿنڀو بہ ٺهرايائين، جهڙيءَ طرح اسرائيل جي بادشاهہ اخي‌اب ڪيو هو. هن آسماني سيارن ۽ ستارن جي پوڄا بہ ڪئي.

⁴ هن انهيءَ هيڪل ۾ بت‌پرستن جون قربان‌گاهون تعمير ڪرايون، جنهن جي باري ۾ خداوند فرمايو هو تہ ”يروشلم شهر ۾ آءٌ پنهنجو نالو قائم رکندس.“

⁵ هن هيڪل جي ٻنهي اڱڻن ۾ آسماني سيارن ۽ ستارن لاءِ قربان‌گاهون ٺاهيون.

⁶ هن پنهنجي پٽ کي ساڙڻ واري قربانيءَ طور پيش ڪيو. هو جادو ڪندو هو ۽ فالون وجھندو هو. هن ڀوپن ۽ مئل ماڻهن جي روحن سان ڳالهائيندڙن سان واسطا پڻ رکيا. مطلب تہ هن خداوند جي نظر ۾ گھڻا ئي برا ڪم ڪيا جن جي ڪري خداوند هن جي خلاف سخت ڪاوڙيو.

⁷ هن يسيرہ ديويءَ جي جيڪا تراشيل مورتي ٺهرائي هئي، سا انهيءَ هيڪل ۾ رکايائين، جنهن بابت خداوند دائود ۽ سندس پٽ سليمان کي فرمايو هو تہ ”هي يروشلم شهر، جنهن کي مون بني اسرائيل جي سڀني قبيلن جي علائقن مان چونڊي ڪڍيو آهي ۽ انهيءَ ۾ ٺهيل منهنجي هيڪل ۾ آءٌ هميشہ لاءِ پنهنجو نالو قائم رکندس.

⁸ جيڪو ملڪ مون هنن جي ابن ڏاڏن کي ڏنو آهي تنهن مان وري ڪڏهن بہ آءٌ بني اسرائيل کي نہ ٿيڙيندس، بشرطيڪ جيڪي حڪم مون کين ڏنا آهن ۽ جيڪا منهنجي شريعت منهنجي ٻانهي موسيٰ کين ڏني آهي تن تي هو عمل ڪندا رهن.“

⁹ پر يهوداہ وارن ڌيان نہ ڏنو ۽ منسيءَ بہ هنن کي گمراهہ ڪيو، تان جو هنن انهن قومن کان بہ وڌيڪ برا ڪم ڪيا، جن کي خداوند بني اسرائيل جي اڳيان ناس ڪري ڇڏيو هو.

¹⁰ خداوند پنهنجي ٻانهن نبين جي معرفت فرمايو تہ

¹¹ ”يهوداہ جي بادشاهہ منسيءَ ڪراهت جهڙا ڪم ڪيا آهن. اموري جيڪي کانئس اڳ ٿي گذريا، تن کان بہ وڌيڪ هن بڇڙا ڪم ڪيا آهن ۽ سڄي يهوداہ کي پنهنجي بتن ذريعي گمراهيءَ ۾ وجھي ڇڏيو اٿائين.

¹² تنهنڪري آءٌ خداوند، بني اسرائيل جو خدا چوان ٿو تہ آءٌ يروشلم ۾ بلڪ سڄي يهوداہ تي اهڙي مصيبت آڻڻ وارو آهيان جو جيڪو انهيءَ جي خبر ٻڌندو تنهن جي ڪنن مان زوڪٽ نڪري ويندا.

¹³ آءٌ يروشلم کي سامريہ جهڙي سزا ڏيندس. هائو، اهڙي سزا ڏيندوسانس جهڙي اسرائيل جي بادشاهہ اخي‌اب ۽ سندس اولاد کي ڏني هئم. آءٌ يروشلم کي ائين اُگھي ڇڏيندس جيئن ڪو ماڻهو ٿالهي اُگھي اونڌي ڪري رکي ڇڏيندو آهي.

¹⁴ آءٌ پنهنجي قوم جي باقي بچيل حصي يعني يهوداہ وارن کان منهن موڙيندس ۽ کين سندن دشمنن جي حوالي ڪري ڇڏيندس، جيڪي کين لٽيندا ۽ ڦريندا.

¹⁵ انهيءَ سبب جو هنن اُهي ئي ڪم ڪيا آهن جيڪي منهنجي نظر ۾ برا آهن ۽ جنهن ڏينهن هنن جا ابا ڏاڏا مصر ملڪ مان نڪتا هئا تنهن ڏينهن کان وٺي اڄ ڏينهن تائين، هنن مون کي ڪاوڙ پئي ڏياري آهي.“

¹⁶ ان کان علاوہ منسيءَ ايترو تہ بي‌گناهہ رت وهايو جو يروشلم کي هڪڙي ڇيڙي کان ٻئي ڇيڙي تائين رت سان ڀري ڇڏيائين. انهيءَ کان سواءِ منسيءَ اهو گناهہ بہ ڪيو جو يهوداہ وارن کي گمراهہ ڪري کانئن اهڙا ڪم ڪرايائين جيڪي خداوند جي نظر ۾ برا هئا.

¹⁷ منسيءَ جا باقي ٻيا ڪم جيڪي هن ڪيا ۽ جيڪي گناهہ هن ڪيا سي سڀ ”يهوداہ جي بادشاهن جي تواريخ جو ڪتاب“ ۾ لکيل آهن.

¹⁸ منسي وفات ڪري وڃي ابن ڏاڏن سان آرامي ٿيو. کيس پنهنجي محل جي باغ عزا ۾ دفن ڪيو ويو. پوءِ سندس پٽ امُون سندس جاءِ تي بادشاهہ ٿيو.

يهوداہ جو بادشاهہ امُون

¹⁹ جڏهن امُون بادشاهہ ٿيو تڏهن سندس عمر ٻاويهہ سال هئي. هن يروشلم ۾ رهي اٽڪل ٻہ سال حڪومت ڪئي. سندس ماءُ جو نالو مسلمت هو، جيڪا يطبهي شهر واري حروس نالي شخص جي ڌيءَ هئي.

²⁰ امُون پنهنجي پيءُ منسيءَ وانگر اهي ئي ڪم ڪيا جيڪي خداوند جي نظر ۾ برا هئا.

²¹ جن رستن تي هن جو پيءُ هلندو هو، تن سڀني تي هو بہ هليو، جن بتن جي هن جو پيءُ پوڄا ڪندو هو تن جي هن بہ پوڄا ڪئي ۽ انهن جي اڳيان پنهنجو مٿو ٽيڪيائين.

²² هن خداوند، پنهنجي ابن ڏاڏن جي خدا کي ڇڏي ڏنو ۽ خداوند جي واٽ تي نہ هليو.

²³ امُون جي عملدارن هن جي خلاف سازش ڪري کيس سندس ئي محل ۾ قتل ڪري ڇڏيو.

²⁴ تنهن تي ملڪ جي ماڻهن وري انهن سڀني کي قتل ڪري ڇڏيو، جن بادشاهہ امُون جي خلاف سازش ڪئي هئي. پوءِ هنن امُون بادشاهہ جي پٽ يوسياہ کي سندس جاءِ تي بادشاهہ بڻايو.

²⁵ امُون جيڪي ٻيا ڪم ڪيا، سي ”يهوداہ جي بادشاهن جي تواريخ جو ڪتاب“ ۾ لکيل آهن.

²⁶ امُون کي پنهنجي محل جي باغ عزا ۾ سندس لاءِ ٺهيل غار ۾ دفن ڪيو ويو ۽ سندس پٽ يوسياہ سندس جاءِ تي بادشاهہ بڻيو.