2.تواريخ 4 - Muslim Sindhi Bible

هيڪل جو سامان

¹ بادشاهہ سليمان پتل جي هڪ قربان‌گاهہ ٺهرائي جنهن جي ڊيگھہ ۽ ويڪر هڪ جيتري يعني نوَ ميٽر هئي، جڏهن تہ ان جي اوچائي ساڍا چار ميٽر هئي.

² هن پتل جو پلٽيل هڪ وڏو گول حوض پڻ ٺهرايو، جنهن جي اوچائي سوا ٻہ ميٽر هئي، ان جو گھيرو ساڍا تيرهن ميٽر هو ۽ اهو هڪڙي ڪناري کان ٻئي ڪناري تائين ساڍا چار ميٽر هو.

³ حوض جي ٻاهرين پاسي ڪناري جي هيٺان چوڌاري سوا ٻن ميٽرن تائين ڏاندن جا مجسما ٺهيل هئا. اهي مجسما ٻن قطارن ۾ هئا جيڪي حوض ٺاهڻ وقت ئي ان تي پلٽي ٺاهيا ويا هئا.

⁴ اهو حوض پتل جي ٻارهن ڏاندن جي پٺين تي رکيو ويو. انهن مان ٽن ڏاندن جو منهن اتر طرف، ٽن جو اولهہ طرف، ٽن جو ڏکڻ طرف ۽ ٽن جو اوڀر طرف هو. انهن ڏاندن جا پٺيان پاسا اندر حوض طرف هئا.

⁵ اهو حوض چار آڱر ٿلهو هو ۽ سندس ڪنارو پيالي جي ڪناري وانگر هو جيڪو ٻاهر طرف سوسن گل وانگر وريل هو. انهيءَ حوض ۾ ڇاهٺ هزار ليٽر ماپي ٿي سگھيا.

⁶ هن ڏهہ ننڍا حوض بہ ٺهرايا، جن مان پنج هيڪل جي ساڄي پاسي رکيائين ۽ پنج کاٻي پاسي. انهن ۾ جانورن جا ساڙڻ وارين قربانين جا حصا ڌوتا ويندا هئا. پر اهو وڏو حوض ڪاهنن جي هٿ منهن ڌوئڻ لاءِ هو.

⁷ هن مقرر ڪيل قاعدن موجب ڏهہ سون جا شمعدان ٺهرايا ۽ اهي آڻي هيڪل ۾ رکرايائين، پنج ساڄي پاسي ۽ پنج کاٻي پاسي.

⁸ هن ڏهہ ميزون ٺهرايون ۽ اهي بہ آڻي هيڪل ۾ رکرايائين، پنج ساڄي پاسي ۽ پنج کاٻي پاسي. هن هڪ سؤ سونا ٿالهہ پڻ ٺهرايا.

⁹ هن هيڪل ۾ ٻہ اڱڻ ٺهرايا، هڪڙو ٻاهريون اڱڻ ۽ ٻيو اندريون اڱڻ، جيڪو رڳو ڪاهنن لاءِ هو. انهن ٻنهي اڱڻن جي وچ ۾ دروازا ٺهرايائين جن جي طاقن مٿان پتل چاڙهايائين.

¹⁰ هن وڏو حوض هيڪل ۾ ڏاکڻي پاسي ڏکڻ اوڀر واري ڪنڊ ۾ رکرايو.

¹¹ هن تغاريون، ڪوڏريون ۽ ٿالهہ پڻ ٺهرايا. اهڙيءَ طرح حورام هيڪل لاءِ اهو سمورو پتل جو ڪم پورو ڪيو جنهن جو حڪم بادشاهہ سليمان کيس ڏنو هو،

¹² يعني ٻہ ٿنڀا، ٿنڀن جي چوٽين مٿان ٻہ پيالي نما ڇٽ، ٿنڀن جي چوٽين تي رکيل ڇٽن کي ڍڪڻ لاءِ ٻہ ڄاريون،

¹³ انهن ٻنهي ڄارين لاءِ چار سؤ پتل جي ڏاڙهن جون ٻہ ٻہ قطارون،

¹⁴ ڏهہ ننڍا حوض ۽ انهن لاءِ ڏهہ ريڙهيون،

¹⁵ هڪ وڏو حوض ۽ ان جي هيٺان ٻارهن ڏاند،

¹⁶ تغاريون، ڪوڏريون، گوشت لاءِ ڪنڍا ۽ ٻيو سڀ گھربل سامان. جيڪي شيون ماهر ڪاريگر حورام هيڪل لاءِ بادشاهہ سليمان جي حڪم موجب ٺاهيون سي سڀ چمڪندڙ پتل جون هيون.

¹⁷ بادشاهہ اهي سڀ شيون اردن ماٿريءَ منجھہ سڪات ۽ صريدا ڳوٺن جي وچ واري علائقي ۾ چيڪي مٽيءَ واري پڪل ڪالب ۾ پلٽرايون.

¹⁸ انهن پتل جي ٺهيل شين جي تور نہ ڪرائي ويئي، ڇاڪاڻ تہ اهي تمام گھڻيون هيون.

¹⁹ بادشاهہ سليمان هيڪل لاءِ سون مان هي سامان پڻ ٺهرايو: لوبان ساڙڻ لاءِ قربان‌گاهہ، نذراني وارا روٽ رکڻ لاءِ ميزون،

²⁰ شمعدان جن ۾ ڏيئا قاعدي موجب مقدس ترين جاءِ جي اڳيان ٻارڻا هئا،

²¹ گل، ڏيئا ۽ ٽانڊن لاءِ چمٽا،

²² ڦلن لاهڻ لاءِ چمٽا، ٿالهہ، لوباندان ۽ ٽانڊن رکڻ لاءِ منگالا. اهو سڀ سامان نج سون مان ٺهرايو ويو. هيڪل جا دروازا يعني مقدس ترين جاءِ جا دروازا ۽ وڏي هال جا دروازا، پڻ سون مان ٺهرايا ويا.