2.تواريخ 17 - Muslim Sindhi Bible

يهوداہ جو بادشاهہ يهوسفط

¹ آسا جو پٽ يهوسفط سندس جاءِ تي بادشاهہ بڻيو ۽ اسرائيل جي خلاف پنهنجي طاقت ۾ اضافو ڪيائين.

² هن يهوداہ جي سڀني قلعن وارن شهرن ۾ لشڪر مقرر ڪيا. ان کان علاوہ افرائيم جا جيڪي شهر سندس پيءُ آسا قبضي ڪيا هئا تن ۾ ۽ يهوداہ جي ٻين هنڌن تي بہ چوڪيون قائم ڪيائين.

³ خداوند يهوسفط سان گڏ هو، ڇاڪاڻ تہ جيئن سندس پيءُ پنهنجي شروعاتي دور ۾ پئي هليو تيئن هن بہ ڪيو ۽ بعل ديوتا جي پٺيان ڪونہ لڳو.

⁴ هو اسرائيل جي بادشاهن جي بري رستي تي هلڻ بدران پنهنجي پيءُ جي خدا جي طلب ۾ رهيو ۽ خدا جي حڪمن تي عمل ڪندو رهيو.

⁵ سو خداوند انهيءَ جي هٿ هيٺ بادشاهت قائم ڪئي ۽ سڄي يهوداہ جي ماڻهن يهوسفط وٽ نذرانا پئي آندا، تان جو هو دولت ۽ عزت ۾ گھڻو وڌي ويو.

⁶ هن جي دل خدا جي واٽن تي لڳي رهي. ٻيو تہ هن سڄي يهوداہ ۾ ٽڪرين تي ٺهيل غير معبودن جا پوڄا گھر ۽ يسيرہ ديويءَ جا ٿنڀا ڊهرائي ڇڏيا.

⁷ هن پنهنجي بادشاهيءَ جي ٽئين سال پنهنجي عملدارن بن‌خيل، عبدياہ، زڪرياہ، نتني‌ايل ۽ ميڪاياہ کي موڪليو تہ اهي يهوداہ جي شهرن ۾ وڃي تعليم ڏين.

⁸ انهن سان گڏ هي لاوي بہ هئا: سمعياہ، نتنياہ، زبدياہ، عساهيل، سميراموت، يهونتن، ادونياہ، طوبياہ ۽ طوب ادونياہ. انهن سان گڏ اليسمع ۽ يهورام ڪاهن پڻ هئا.

⁹ انهن وٽ خداوند جي شريعت جو ڪتاب هو، جنهن جي هنن يهوداہ ۾ تعليم ٿي ڏني. اهي يهوداہ جي سڀني شهرن ۾ ويا ۽ ماڻهن کي تعليم ڏنائون.

¹⁰ يهوداہ جي چوڌاري جيڪي ملڪ هئا تن جي سڀني بادشاهن تي خداوند جو خوف طاري ٿي ويو، جنهنڪري انهن يهوسفط سان جنگ نہ ڪئي.

¹¹ ڪن فلستين يهوسفط کي نذرانا ۽ چاندي ٽيڪس طور آڻي ڏني. عرب جي رهاڪن بہ هن کي ٽيڪس طور ست هزار ست سؤ گھٽا ۽ اوترا ئي ٻڪر ڏنا.

¹² يهوسفط تمام طاقتور ٿيندو ويو. هن يهوداہ ۾ گدام وارا شهر ۽ قلعا تعمير ڪرايا.

¹³ انهن شهرن ۾ هن وٽ گھڻو ئي راشن هو. هن يروشلم ۾ آزمودگار جنگي جوڌا مقرر ڪيا.

¹⁴ انهن جو تعداد سندن گھراڻن موجب هيئن هو: يهوداہ مان هزارن جي دستن جو سالار عدنہ پنهنجي ٽي لک جنگي جوڌن سميت،

¹⁵ ان کان ٻئي نمبر تي سالار يهوحنان ٻہ لک اسي هزار جنگي جوڌن سميت،

¹⁶ ٽيون عمسياہ بن زڪري، جنهن رضاڪارانہ طور تي پاڻ کي خداوند جي خدمت لاءِ پيش ڪيو سو ٻہ لک جنگي جوڌن سميت،

¹⁷ بنيامين مان هڪ همت ڀريو جان نثار سالار اليدع، ٻہ لک تيراندازن ۽ ڍال بردارن سميت،

¹⁸ ان کان پوءِ يهوزبد جنهن سان هڪ لک اسي هزار ماڻهو هئا، جيڪي جنگ جي لاءِ مسلح هئا.

¹⁹ هي اهي ماڻهو هئا جيڪي بادشاهہ جا ملازم هئا. انهن کان علاوہ بادشاهہ ٻين ماڻهن کي بہ سڄي يهوداہ ۾ قلعي وارن شهرن ۾ مقرر ڪيو هو.