Whakakitenga 4 - Te Kawenata Hou

Te Koropikotanga i te Rangi

¹ Muri iho i ēnei mea ka kite ahau, nā, he tatau kua oti te whaka­puare i te rangi, ā, ko te reo tua­tahi i rongo ai ahau me te mea he reo nō tētahi tētere e kī mai ana ki ahau, e mea ana, “Haere mai ki runga nei, ā, ka whaka­kitea e ahau ki a koe ngā mea kua takoto mō muri i ēnei.”

² I reira pū anō kua nohoia ahau e te Wairua; nā, he torōna kua tū ki te rangi, ā, ko tētahi i runga i te torōna e noho ana.

³ Ā, ko tērā i noho rā rite tonu ki te ti­tiro atu ki te kōhatu hahapa, ki te hara­riu. He āniwa­niwa hoki i ngā taha katoa o te torōna, ko te āhua ki te ti­tiro atu kei tō te eme­rara.

⁴ Nā, i ngā taha katoa o te torōna ētahi torōna e rua tekau mā whā, ā, ka kite ahau i runga i ngā torōna ko ngā kaumātua e rua tekau mā whā e noho ana, he mea whaka­kākahu ki te kākahu mā; he karauna kōura i runga ō rātou māte­nga.

⁵ Nā, ka puta mai i roto i te torōna he uira, he reo, he whati­tiri. Ā, tērā ngā rama ahi e whitu e kā ana i mua i te torōna; ko ngā wairua e whitu ēnei o te Atua.

⁶ I mua, i te torōna anō he moana kara­ihe, te rite kei te hau­papa. Ā, i waenga­nui o te torōna, i ngā taha katoa anō o te torōna, ko ngā mea ora e whā, kapi tonu ā mua, ā muri o rātou i te kanohi.

⁷ Ko te tua­tahi o ngā mea ora i rite ki te raiona, ko te tuarua o ngā mea ora i rite ki te kūao kau, ko te mata o te tua­toru o ngā mea ora i rite ki tō te tangata, ā, ko te tuawhā o ngā mea ora i rite ki te ēkara e rere ana.

⁸ Nā, ko aua mea ora e whā, he pari­rau ō rātou, e ono o tēnā, o tēnā, i ngā taha katoa; kī tonu hoki a roto o rātou me ngā taha i te kanohi. Ā, kāhore he tānga i te ao, i te pō, he mea tonu tā rātou, “Tapu, tapu, tapu, te Ariki, te Atua Kaha Rawa, i mua nei ia, tēnei anō ināia­nei, ā, e haere mai nei.”

⁹ Ā, i te mea ka hoatu e ngā mea ora te korōria, te hōnore, te whaka­whetai ki tērā e noho ana i runga i te torōna, e ora ana ake ake,

¹⁰ ka hinga iho ngā kaumātua e rua tekau mā whā ki te aro­aro o tērā e noho rā i runga i te torōna, nā, ka koro­piko ki a ia e ora tonu nei ake ake, ka panga hoki i ō rātou karauna ki mua o te torōna, ka mea,

¹¹ “Tika tonu, e te Ariki, kia riro i a koe te korōria, me te hōnore, me te kaha. Nāu hoki i hanga ngā mea katoa, ā, nāu i pai i takoto ai aua mea, i hangā ai.”