Ruka 9 - Te Kawenata Hou

Ka Tonoa e Īhu ngā Ākonga Tekau mā rua

¹ Nā, ka karanga­tia e ia te tekau mā rua, ka hoatu ki a rātou he kaha, he mana, e peia ai ngā rēwera katoa, e ora ai ngā mate.

² Ā, tonoa ana rātou e ia ki te kauwhau i te ranga­tira­tanga o te Atua, ki te whaka­ora hoki i te hunga e mate ana.

³ I mea anō ia ki a rātou, “Kaua tētahi mea e mauria ki te ara, kaua he toko­toko, kaua he pūtea, kaua he taro, kaua he moni; kaua anō e taki­rua­tia he koti.

⁴ Ā, ka tomo koutou ki tētahi whare, hei reira noho ai, ā, haere noa i reira.

⁵ Ā, ki te kāhore ētahi e manako ki a koutou, ina haere atu koutou i taua pā, ruia atu te puehu o ō koutou wae­wae, hei mea whaka­atu ki a rātou.”

⁶ Nā, ko tō rātou mawehe­tanga atu, ka hāere­erea e rātou ngā kāinga, me te kauwhau i te rongo­pai, me te whaka­ora i ngā wāhi katoa.

Te Pororaru o Herora

⁷ Ā, ka rongo a Herora teta­raki i ngā mea katoa i meinga e ia; ā, he nui tōna poro­raru, nō te mea ki tā ētahi kī, kua ara mai a Hoani i te hunga mate.

⁸ Ki tā ētahi, kua puta mai a Irāia; ki tā ētahi, kua ara mai tētahi o ngā poro­piti ona­mata.

⁹ Nā, ka mea a Herora, “I pōutoa e ahau te māte­nga o Hoani; ko wai hoki tēnei mōna nei ēnei kōrero ka rangona nei e ahau?” Ā, ka whai ia kia kite i a ia.

Ka Whāngaia e Īhu te Rima Mano

¹⁰ Ā, nō te hoki­nga mai o ngā āpō­toro, ka kōrero­tia ki a ia ngā mea katoa i mea ai rātou. Ā, ka tango ia i a rātou, ka haere ko rātou anake ki tētahi pā, ko Petahaira te ingoa.

¹¹ Otirā, i te kite­nga o ngā mano, ka aru i a ia; ā, ka manaaki ia i a rātou, ka kōrero­tia ki a rātou te ranga­tira­tanga o te Atua, whaka­ora­ngia ana hoki e ia te hunga e mea ana kia rongoā­tia.

¹² Nā, kua tītaha haere te rā; ā, ka haere mai te tekau mā rua, ka mea ki a ia, “Tonoa te mano, kia haere ai ki ngā kāinga, ki ngā whenua i tētahi taha, i tētahi taha, moe ai, ki te mea kai hoki mā rātou; he wāhi koraha hoki tēnei i a tātou nei.”

¹³ Ā, ka mea ia ki a rātou, “Mā koutou e hoatu he kai mā rātou.” Ka mea rātou, “Heoi anō a mātou e rima ngā taro, e rua ngā ika; ki te kāhore anō ia mātou e haere ki te hoko kai mā tēnei iwi katoa.”

¹⁴ (Me te mea anō, e rima mano ngā tāne.) Ka mea ia ki āna ākonga, “Meinga rātou kia noho, kia rima tekau ki te nohoa­nga.”

¹⁵ Ā, pērā ana rātou, meinga katoa­tia ana kia noho.

¹⁶ Nā, ka mau ia ki ngā taro e rima, ki ngā ika e rua, ka ti­tiro ake ki te rangi, ka whaka­pai i aua mea, ka whawhati, ka hoatu ki ngā ākonga kia whaka­takoto­ria atu mā te mano.

¹⁷ Nā, ka kai rātou, ka mākona katoa; ā, kotahi tekau mā rua ngā kete i kohia ake e rātou, he toenga nā rātou nō ngā whati­whatinga.

Te Pānuitanga a Pita mō Īhu

¹⁸ Ā, i a ia e īnoi ana ko ia anake, i a ia anō āna ākonga; nā, ka ui ia ki a rātou, ka mea, “Ko wai ahau ki te kī a te mano?”

¹⁹ Nā, ka whaka­hoki rātou, ka mea, “Ko Hoani Kai­iri­iri, ki tā ētahi ia; ko Irāia, ki tā ētahi; kua ara mai tētahi o ngā poro­piti ona­mata.”

²⁰ Nā, ka mea ia ki a rātou, “Ki tā koutou nā kī, ko wai ahau?” Ka whaka­hoki a Pita, ka mea, “Ko te Karaiti a te Atua.”

Ka Kōrero a Īhu mō Tōna Mamaetanga me Tōna Matenga

²¹ Kātahi ia ka whaka­tūpato i a rātou, ka mea, “Kia kaua tēnei e kōrero­tia ki te tangata.”

²² I mea anō ia, “Kua takoto te tikanga kia maha ngā mamae o te Tama a te tangata, kia whaka­kāhore­tia anō ia e ngā kaumātua, e ngā tohu­nga nui, e ngā kara­ipi, kia whaka­matea, ā, i te toru o ngā rā ka whaka­ara­hia.”

²³ I mea anō ia ki a rātou katoa, “Ki te mea tētahi kia haere mai i muri i ahau, me whaka­kāhore ia e ia anō, me amo tōna rīpeka i ngā rā katoa, ka aru ai i ahau.

²⁴ Ki te whai hoki tētahi kia ora, ka mate ia; otirā, ki te mate tētahi, mōna i whaka­aro ki ahau, ka ora ia.

²⁵ He aha oti te pai ki te tangata, ki te riro i a ia te ao katoa, ā, ka ngaro ko ia anō, ka riro rānei i te hē?

²⁶ Ki te whaka­mā hoki tētahi ki ahau, ā, ki āku kōrero, ka whaka­mā anō te Tama a te tangata ki a ia, ina haere mai ia i runga i tōna ake korōria, i te korōria hoki o te Matua, o ngā ana­hera tapu.

²⁷ Nā, he pono tāku kōrero ki a koutou, tēnei anō ētahi o te hunga e tū nei e kore e pāngia e te mate, kia kite rā anō i te ranga­tira­tanga o te Atua.”

Te Whakaahua Kētanga

²⁸ Ā, ka tata ki te waru o ngā rā i muri i ēnei kōrero, ka mau ia ki a Pita, ki a Hoani, ki a Hēmi, ka haere ki runga ki te maunga ki te īnoi.

²⁹ Ā, i a ia e īnoi ana, ka puta kē te āhua o tōna mata, mā tonu tōna kākahu, kanapa tonu.

³⁰ Nā, toko­rua ngā tāngata e kōrero tahi ana me ia, ko Mohi rāua ko Irāia,

³¹ i puta korōria mai, i kōrero anō ki tōna mate­nga meāke nei rite i a ia ki Hiruhārama.

³² I pēhia hoki a Pita rātou ko ōna hoa e te moe; ā, i tō rātou aranga ake, ka kite i tōna korōria, me ngā tāngata toko­rua e tū tahi ana me ia.

³³ Ā, i a rāua e mawehe atu ana i a ia, ka mea a Pita ki a Īhu, “E kara, he pai kia noho tātou i konei; nā, kia hangā e mātou ētahi wharau kia toru; kia kotahi mōu, kia kotahi mō Mohi, kia kotahi mō Irāia.” (Kīhai ia i mōhio ki tāna i kōrero ai.)

³⁴ Ā, i a ia e kōrero ana i ēnei mea, ka puta he kapua, ā, tau­maru iho ana ki a rātou; ā, mataku ana rātou i tō rātou haere­nga ki roto ki te kapua.

³⁵ Nā, ka puta mai he reo i te kapua e mea ana, “Ko tāku Tama tēnei, ko tāku i whiri­whiri ai; whaka­rongo ki a ia!”

³⁶ Ā, nō te pu­tanga o te reo, ko Īhu anake i kitea. Ā, whaka­rongo puku ana rātou, kīhai hoki i kōrero­tia e rātou ki te tangata i aua rā tētahi o ngā mea i kite ai rātou.

Ka Whakaorangia e Īhu te Tama he Wairua Poke Tōna

³⁷ Nā, i te aonga ake o te rā, i a rātou kua tatū iho i runga i te maunga, he rahi te hui i tūtaki ki a ia.

³⁸ Nā, ka karanga tētahi tangata i roto i te mano, ka mea, “Tēnā koa, e te Kai­whaka­ako, ti­tiro mai ki tāku tama; ko ia anake hoki tāku.

³⁹ Nā, ka hopu te wairua i a ia, ina­mata ka hāmama. Nā, ka hae­hae i a ia, tutū ana te huka i a ia. Whaka­uaua ana te whaka­rere i a ia, ā, marū iho ia.

⁴⁰ Ā, i te īnoi ahau ki āu ākonga kia peia ia ki waho; heoi, kīhai i taea e rātou.”

⁴¹ Nā, ka whaka­hoki a Īhu, ka mea, “E te uri whaka­pono kore, parori kē, kia pēhea te roa o tōku noho ki a koutou, o tōku manawa­nui ki a koutou? Kawea mai tāu tama ki konei.”

⁴² Nā, i a ia e haere mai ana, ka tāia iho ia e te rēwera, hae­haea iho. Nā, ka rīria te wairua poke e Īhu, ā, whaka­ora­ngia ana te tama­iti, hoatu ana ki tōna pāpā.

⁴³ Oho mauri katoa ana rātou ki te nui o te Atua. Ā, i a rātou e mīharo ana ki ngā mea katoa i meinga e Īhu, ka mea ia ki āna ākonga,

Ka Kōrero anō a Īhu mō Tōna Matenga

⁴⁴ “Rongoātia ēnei kōrero ki roto ki ō koutou tari­nga; meāke hoki tukua te Tama a te tangata ki ngā ringa o ngā tāngata.”

⁴⁵ Otirā, kīhai rātou i mōhio ki tēnei kupu, he mea huna hoki i a rātou, kei kite rātou; i mataku hoki rātou ki te ui ki a ia i taua kupu.

Ko Wai te Nui Rawa

⁴⁶ Nā, ka puta ake he kōrero­rero i roto i a rātou, ko wai o rātou te mea nui rawa.

⁴⁷ Otirā, i te kite­nga o Īhu i te whaka­aro­aro­nga a ō rātou ngākau, ka mau ia ki tētahi tama­iti nohi­nohi, ā, whaka­tū­ria ana ki tōna taha,

⁴⁸ ka mea ki a rātou, “Ki te manako tētahi ki tēnei tama­iti, nā te whaka­aro hoki ki tōku ingoa, e manako ana ia ki ahau. Ki te manako hoki tētahi ki ahau, e manako ana ia ki tōku kai­tono mai. Nā, ko te iti rawa i roto i a koutou katoa ko ia hei mea nui.”

Ko ia ehara i te Hoa Whawhai, nō Koutou ia

⁴⁹ Nā, ka whaka­hoki a Hoani, ka mea, “E kara, i kite mātou i tētahi e pei rēwera ana i runga i tōu ingoa; ā, rīria iho e mātou, mōna kāhore e haere tahi tātou.”

⁵⁰ Otirā, i mea a Īhu ki a ia, “Kaua e rīria; ki te mea hoki ehara tētahi i te hoa whawhai nō koutou, nō koutou ia.”

Kīhai i Manakohia a Īhu e tētahi Kāinga Hamari

⁵¹ Ā, nō ka tata ngā rā mō tōna tango­hanga ki runga, ka whaka­mau tōna kanohi ki te haere ki Hiruhārama,

⁵² Ā, ka tonoa atu e ia he karere i mua i tōna aro­aro; ā, ka haere rātou, ka tomo ki tētahi kāinga o ngā Hamari ki te mea tuku­nga iho mōna.

⁵³ Heoi, kīhai ērā i manako ki a ia, ko te āhua hoki o tōna kanohi me te mea e haere ana ia ki Hiruhārama.

⁵⁴ Ā, nō te kite­nga o āna ākonga, o Hēmi rāua ko Hoani, ka mea rāua, “E te Ariki, e pai ana rānei koe kia kōrero­tia e māua he kāpura kia heke iho i te rangi, hei whaka­ngaro i a rātou?”

⁵⁵ Otirā, ka tahuri ia, ka rīria rāua, “Kāhore kōrua e mātau nō tēhea wairua kōrua.

⁵⁶ Kīhai hoki te Tama a te tangata i haere mai ki te whaka­mate tangata, engari ki te whaka­ora.” Nā, haere ana rātou he kāinga kē.

Te Hunga e Hia-Whai i a Īhu

⁵⁷ Ā, i a rātou e haere ana i te ara, ka mea tētahi tangata ki a ia, “Ka aru ahau i a koe ki ngā wāhi katoa e haere ai koe.”

⁵⁸ Nā, ko te mea­tanga a Īhu ki a ia, “He rua o ngā pokiha, he kō­hanga o ngā manu o te rangi; tēnā ko te Tama a te tangata hore ōna wāhi e takoto ai tōna māte­nga.”

⁵⁹ Ka mea ia ki tētahi atu, “Aru­mia mai ahau.” Ā, ka mea ia, “E te Ariki, tukua ahau kia mātua haere ki te tanu i tōku pāpā.”

⁶⁰ Nā, ka mea a Īhu ki a ia, “Waiho mā ngā tū­pā­paku e tanu ō rātou nā tū­pā­paku. Ko koe ia me haere ki te kauwhau i te ranga­tira­tanga o te Atua.”

⁶¹ Ka mea hoki tētahi atu, “E te Ariki, ka aru ahau i a koe; otirā, tukua ahau kia mātua poro­poro­aki ki te hunga i tōku whare.”

⁶² Otirā, ka mea a Īhu ki a ia, “Ki te pā te ringa o tētahi ki te parau, ā, ka ti­tiro ki muri, e kore ia e tau mō te ranga­tira­tanga o te Atua.”