Ruka 4 - Te Kawenata Hou

Te Whakamātautau i a Īhu

¹ Nā, ko Īhu, kī tonu i te Wairua Tapu, hoki atu ana i Horano, ā, ka āra­hina e te Wairua i te koraha.

² Mō ngā rā e whā tekau, whaka­mā­tau­tau­ria ai e te rēwera. Kīhai ia i kai i tētahi mea i aua rā, ā, nō ka pahemo, ka hia­kai ia.

³ Nā, ka mea te rēwera ki a ia, “Ki te mea ko te Tama koe a te Atua, kīa iho tēnei kōhatu kia meinga hei taro.”

⁴ Nā, ka whaka­hoki a Īhu ki a ia, ka mea, “Kua oti te tuhi­tuhi, ‘E kore e ora te tangata i te taro kau.’ ”

⁵ Kātahi ka āra­hina ia e ia ki runga, ā, mea kau iho kua whaka­kitea ki a ia ngā ranga­tira­tanga katoa o te ao.

⁶ Ka mea te rēwera ki a ia, “Māku e hoatu ki a koe tēnei ranga­tira­tanga katoa, me te korōria o ēnei mea; kua tukua hoki ki ahau, ā, ka hoatu e ahau ki tāku e pai ai.

⁷ Nā, ki te koro­piko koe ki tōku aro­aro, mōu katoa.”

⁸ Nā, ka whaka­hoki a Īhu ki a ia, ka mea, “Kua oti te tuhi­tuhi, ‘Me koro­piko koe ki te Ariki, ki tōu Atua, me mahi anō ki a ia anake!’ ”

⁹ Nā, ka kawea ia e ia ki Hiruhārama, ā, whaka­tū­ria ana ki runga ki te keo­keo­nga o te teme­para, nā, ka mea ia ki a ia, “Ki te mea ko te Tama koe a te Atua, rere atu i konei ki raro,

¹⁰ kua oti hoki te tuhi­tuhi, ‘Ka kōrero­tia iho koe e ia ki āna ana­hera, kia tiaki­na koe.’

¹¹ Ā, ‘Mā rātou koe e hiki ake ki ō rātou ringa, kei tūtuki tōu wae­wae ki te kōhatu.’ ”

¹² Nā, ka whaka­hoki a Īhu, ka mea ki a ia, “Kua takoto te kōrero, ‘Aua e whaka­mā­tau­tau ki te Ariki, ki tōu Atua.’ ”

¹³ Ā, ka mutu katoa ngā whaka­mā­tautau­ranga a te rēwera, ka mawehe atu i a ia mō tētahi wāhi.

Ka Tīmata a Īhu i Tāna Mahi i Kariri

¹⁴ Nā, ka hoki a Īhu i runga i te kaha o te Wairua ki Kariri, ā, haere ana tōna rongo, ā, puta noa i ngā wāhi tata katoa.

¹⁵ Ka whaka­ako ia i roto i ō rātou whare kara­kia, me te whaka­korōria te katoa i a ia.

Ka Makaia atu a Īhu i Nahareta

¹⁶ Nā, ka haere ia ki Nahareta, ki te wāhi i whāngaia ai ia; ā, ka tomo i te rā hāpati ki te whare kara­kia, ko tāna hanga hoki ia, ka whaka­tika ki te kōrero puka­puka.

¹⁷ Ā, ka hoatu ki a ia te puka­puka a Ihāia poro­piti. Ā, nō ka whera­hia te puka­puka, ka kitea e ia te wāhi i tēnei tuhi­tuhi­nga:

¹⁸ “Kei ahau te Wairua o te Ariki, nāna nei hoki ahau i whaka­wahi, hei kauwhau i te rongo­pai ki te hunga rawa­kore. Kua tonoa ahau e ia ki te kauwhau ki ngā here­here, kia haere noa, ki ngā matapō kia ti­tiro; ki te tuku i te hunga e marū ana, kia haere noa atu,

¹⁹ ki te kauwhau i te tau manako­hanga mai a te Ariki.”

²⁰ Nā, ka kopia e ia te puka­puka, ka hoatu ki te kai­tiaki, ā, noho ana. Nā, ka ti­tiro mata­tau ki a ia ngā kanohi o te hunga katoa i roto i te whare kara­kia.

²¹ Kātahi ia ka anga, ka kōrero ki a rātou, “Nō nāia­nei, i ō koutou tari­nga e whaka­rongo mai nei, i mana ai tēnei karaipi­ture.”

²² Ā, i whaka­pai rātou katoa ki a ia, i mīharo ki ngā kupu pai i puta i tōna māngai. Ka mea rātou, “Ehara ianei tēnei i te tama a Hōhepa?”

²³ Ka mea ia ki a rātou, “Tērā pea e puaki mai i a koutou tēnei kupu whaka­rite ki ahau, ‘E rata, rongoā koe i a koe anō! Ko ngā mea i rongo ai mātou kua meinga ki Kaperenauma, meinga hoki ki konei, ki tōu whenua.’ ”

²⁴ I mea anō ia, “He pono tāku e mea nei ki a koutou, e kore te poro­piti e manako­hia i tōna ake whenua.

²⁵ “Otirā, he pono tāku e mea nei ki a koutou, he toko­maha ngā pouaru i roto i a Īharaira i ngā rā i a Irāia, i te rangi kua oti te kōpani i ngā tau e toru i ngā marama e ono, i te mate­kai­tanga nui o te whenua katoa.

²⁶ Heoi, kīhai a Irāia i tonoa ki tētahi o rātou, ki a Harepata anake o Hairona, ki te wahine pouaru.

²⁷ He toko­maha hoki ngā repera i roto i a Īharaira, i ngā rā o Eriha poro­piti; ā, kīhai tētahi o rātou i whaka­mā­kia, ko Nāmana anake, ko te Hīriani.”

²⁸ Ā, kī tonu i te riri te hunga katoa i te whare kara­kia, i te rongo­nga ki ēnei mea.

²⁹ Nā, ko tō rātou whaka­tikanga ake, ka maka i a ia ki waho o te pā, ā, āra­hina ana ia ki te pari o te puke i hangā ai tō rātou pā, kia whaka­takā ai ia ki raro.

³⁰ Otirā, i tika ia rā waenga­nui o rātou, ā, haere ana.

He Tangata he Wairua Poke tōna

³¹ Ā, ka tae ki Kaperenauma, ki tētahi pā o Kariri, ka whaka­ako i a rātou i te hāpati.

³² Nā, ka mīharo rātou ki tāna ako, i whai mana hoki tāna kupu.

³³ Nā, i te whare kara­kia tētahi tangata he wairua rēwera poke tōna, nui atu tōna reo ki te karanga,

³⁴ ka mea, “Kāti rā; he aha mātou nāu, e Īhu o Nahareta; kua tae mai koe ki te whaka­ngaro i a mātou? E mōhio ana ahau ki a koe, ko wai koe; ko te Mea Tapu a te Atua!”

³⁵ Nā, rīria iho ia e Īhu, ka mea ia, “Kāti te kōrero, puta mai hoki i roto i a ia.” Kātahi te rēwera ka turaki i a ia ki waenga­nui, ā, puta mai ana i roto i a ia, kīhai hoki tērā i ahatia.

³⁶ Nā tau ana te mīharo ki a rātou katoa, ka kōrero­rero tētahi ki tētahi, ka mea, “He aha tēnei kupu? Mana tonu nei hoki tāna tono i ngā wairua poke, kaha tonu, ā, puta mai ana ki waho.”

³⁷ Ā, pakū ana tōna rongo puta noa i ngā wāhi tūtata katoa.

Ka Whakaoratia e Īhu te Tini Tāngata

³⁸ Ā, ko tōna whaka­tikanga i te whare kara­kia, tomo tonu ki te whare o Haimona. Nā, e mate ana te whaea o te wahine a Haimona, he nui te kirikā; ka īnoi rātou ki a ia mōna.

³⁹ Nā, ka tū ia ki runga i a ia, ā, rīria iho te kirikā; ā, mutu ake, nā, ara tonu ake ia kei te taka mea mā rātou.

⁴⁰ I te toene­tanga o te rā, ka kawea mai ki a ia e ngā tāngata katoa ngā mea o rātou e mate ana i te tini o ngā mate; nā, whaka­pā­kia iho e ia ōna ringa ki tēnei, ki tēnei o rātou, ā, ora ake rātou.

⁴¹ He toko­maha hoki te hunga i puta mai ngā rēwera i roto i a rātou; i karanga hoki aua wairua i mea, “Ko te Tama koe a te Atua!” Ā, rīria ana rātou e ia, kīhai i tukua kia kōrero, i mātau hoki rātou ko te Karaiti ia.

Ka Kauwhau a Īhu i ngā Whare Karakia

⁴² Ka ao te rā, ka puta atu ia, ka haere ki tētahi wāhi koraha; ā, ka rapu ngā mano i a ia, ka tae ki a ia, nā, puri­tia ana ia, kei whaka­rērea rātou e ia.

⁴³ Ka mea ia ki a rātou, “Me kauwhau e ahau te ranga­tira­tanga o te Atua ki ērā atu pā anō; koia hoki ahau i tonoa mai ai.”

⁴⁴ Ā, kauwhau ana ia i ngā whare kara­kia o Kariri.