Rōma 8 - Te Kawenata Hou

Te Ora i roto i te Wairua

¹ Nā, kāhore e tau te hē ināia­nei ki te hunga i roto i a Karaiti Īhu.

² Nā te ture hoki a te Wairua o te ora i roto i a Karaiti Īhu ahau i ātea ai i te ture a te hara, a te mate.

³ Ko te mea kīhai i taea e te ture, he ngoi­kore nōna i te kiko­kiko, tonoa mai ana e te Atua tāna Tama, i te āhua o te kiko­kiko hara, hei whaka­here anō mō te hara, ā, whaka­taua ana e ia te hē ki te hara i roto i te kiko­kiko.

⁴ Kia rite ai tō te ture tikanga i roto i a tātou, kāhore nei e haere i runga i tā te kiko­kiko, engari, i tā te Wairua.

⁵ Ko te hunga hoki i runga i tā te kiko­kiko, whaka­aro ana rātou ki ō te kiko­kiko; ko te hunga ia i runga i tā te Wairua, ki ō te Wairua.

⁶ Ko tō te kiko­kiko whaka­aro hoki he mate, ko tō te Wairua ia he ora, he rangi­mārie.

⁷ He tikanga whawhai hoki ki te Atua te whaka­aro ki te kiko­kiko e kore nei hoki e ngā­wari ki te ture a te Atua, kāhore anō e āhei kia ngā­wari;

⁸ ā, e kore e taea e te hunga i te kiko­kiko te whaka­mānawa­reka ki te Atua.

⁹ Otiia, kāhore koutou i te kiko­kiko, engari, i te Wairua, ki te mea e noho ana te Wairua o te Atua i roto i a koutou. Ki te kāhore ia te Wairua o te Karaiti i tētahi, ehara tēnei i a ia.

¹⁰ Tēnā, ki te mea kei roto a te Karaiti i a koutou, he tū­pā­paku te tinana i te hara, he ora ia te wairua i te tika.

¹¹ Ki te noho ia i roto i a koutou te Wairua o te kai­whaka­ara o Īhu i te hunga mate, māna, mā te kai­whaka­ara o Karaiti Īhu i roto i te hunga mate, e whaka­ora ake anō ō koutou tinana mate ki tōna Wairua e noho nā i roto i a koutou.

¹² Nā reira, e ōku tēina, kāhore he tikanga o te kiko­kiko kei runga i a tātou, kia whai tātou i tāna.

¹³ Ki te noho hoki koutou i runga i tā te kiko­kiko, ka mate koutou; ki te mea ia ka whaka­mate koutou i ngā mahi a te tinana, he mea nā te Wairua, ka ora koutou.

¹⁴ Ko te hunga hoki e āra­hina ana e te Wairua o te Atua, he tama rātou nā te Atua.

¹⁵ He teka hoki he wairua pono­nga kua riro nei i a koutou, e mataku ai anō koutou; engari, kua riro i a koutou te Wairua e mea ana i a koutou hei tama­riki ake, e karanga ai koutou, “E Apa, e Pā!”

¹⁶ Ko taua Wairua rā anō hei whaka­ae ake ki ō tātou wairua, he tama­riki tātou nā te Atua.

¹⁷ Ki te mea hoki he tama­riki, kāti mō tātou te kāinga; mō tātou te kāinga o te Atua, mō tātou tahi ko te Karaiti; kia mamae rawa ake ai tātou tahi me ia, ka whaka­korōria­tia ngā­tahi­tia tātou me ia.

Te Korōria kei te Haere mai

¹⁸ Ki tōku whaka­aro iho hoki, he kore noa iho ngā mamae o tēnei wā, ki te whaka­ritea ki te korōria e whaka­kitea mai ki a tātou ā mua.

¹⁹ Ko te tū­mana­ko hoki o te mea i hangā e tatari ana ki te whaka­kite­nga mai o ngā tama a te Atua.

²⁰ Kua meinga hoki te teka­teka noa hei ranga­tira mō te mea i hangā, ehara i te mea nā tēnei ake i whaka­ae, engari, nā tā te kai­whaka­rite i pai ai, i runga i te tū­mana­ko,

²¹ tērā taua mea i hangā e whaka­atea­tia mai i te whaka­tau­reka­reka­tanga a te pirau, whaka­rangatira­tia ake ki roto ki te korōria o ngā tama­riki a te Atua.

²² E mōhio ana hoki tātou, kei te ngu­nguru tahi, kei te mamae tahi, ngā mea hanga katoa taea noatia tēnei rā.

²³ Ehara i te mea ko tērā anake, engari, ko tātou anō hoki kua whi­whi nei ki te hua mātā­mua, arā ki te Wairua, inā, e auē ana hoki tātou i roto i a tātou, e tatari ana ki te whaka­tamariki­tanga, arā ki te whaka­ora­nga o ō tātou tinana.

²⁴ Nā te tū­mana­ko hoki tātou i ora ai. Tēnā, ka kitea te mea e tūmanako­hia atu ana, kore ake te tū­mana­ko. Ko wai oti e tū­mana­ko ki te mea e kitea nei e ia?

²⁵ Ki te tū­mana­ko atu ia tātou ki te mea kāhore nei e kitea, kātahi ka āta tāria mārire­tia atu e tātou.

²⁶ Wai­hoki ko te wairua hei hoa mō tātou e ngoi­kore nei. Kāhore hoki tātou e mātau me pēhea e tika ai tā tātou īnoi; otiia, ko te Wairua tonu anō te īnoi ana mō tātou ki ōna auē e kore nei e taea te whaka­hua.

²⁷ Ā, ko te kai­titiro i ngā ngākau, e mōhio ana ki te hine­ngaro o te Wairua, ko tērā hoki e īnoi ana mō te hunga tapu i runga i tā te Atua i pai ai.

²⁸ Nā, e mātau ana tātou, kei te mahi tahi ngā mea katoa i te pai mō te hunga e aroha ana ki te Atua, arā mō te hunga i karanga­tia i runga i tāna i whaka­takoto ai.

²⁹ Ko āna hoki i mōhio ai i mua, i whaka­ritea anō e ia i mua kia rite ki te āhua o tāna Tama, kia ai ia hei muanga i roto i ngā tēina toko­maha.

³⁰ Ā, ko āna i whaka­rite ai i mua, ko ēnā anō i karanga­tia e ia; ā, ko āna i karanga ai, ko ēnā anō i whaka­tikaia e ia; ā, ko āna i whaka­tika ai, ko ēnā anō i whaka­korōria­tia e ia.

Te Aroha o te Atua i roto i a Īhu Karaiti

³¹ Nā, kia pēhea tā tātou kōrero ki ēnei mea? Ki te mea ko te Atua hei hoa mō tātou, ko wai hei whawhai ki a tātou?

³² Ko ia kīhai nei i kai­ponu i tāna ake Tama, heoi, tukua mai ana e ia mō tātou katoa, e kore ianei ia e tāpiri noa mai ki a ia i ngā mea katoa mō tātou?

³³ Ko wai hei whaka­pā hē ki ā te Atua i whiri­whiri ai? Ko te Atua rā hei whaka­tika.

³⁴ Ko wai ianei hei whaka­tau hē? Ko Karaiti Īhu rā, i mate nei, āe rawa hoki, ko ia rā kua whaka­ara­hia ake nei i te mate, ā, kei te ringa matau o te Atua, ko ia hoki kei te īnoi mō tātou.

³⁵ Mā wai tātou e momotu kē i te aroha o te Karaiti? Mā te whaka­pāwera rānei, mā te mamae, mā te whaka­toi, mā te matekai, mā te kākahu­kore, mā te mate ka tata, mā te hoari rānei?

³⁶ Ko te mea hoki ia i tuhi­tuhia, “Nā te whaka­aro ki a koe mātou i whaka­matea ai i te rā roa nei; kīa ana mātou hei hipi e patua ana.”

³⁷ Engari, i ēnei mea katoa hira ake te wiki­tōria i a tātou, he mea nāna i aroha nei ki a tātou.

³⁸ Ū tonu hoki tōku whaka­aro, e kore te mate, te ora rānei, e kore ngā ana­hera, ngā ranga­tira­tanga rānei, e kore ngā mea onāia­nei, e kore ngā mea e puta mai ā mua, e kore ngā mana,

³⁹ e kore te tike­tike, e kore te hōhonu, e kore tētahi atu mea hangā, e kaha ki te momotu i a tātou i te aroha o te Atua, i tērā i roto nei i a Karaiti Īhu, i tō tātou Ariki.