Pirimona 1 - Te Kawenata Hou

He Mihi

¹ Nā Paora, nā te here­here a Karaiti Īhu, nā tō tāua teina hoki, nā Tīmoti – Ki tā māua e aroha nei ki tō māua hoa mahi, ki a Pirimona,

² ki a Apia hoki, ki tō māua tua­hine, ki tō māua hoa hōia, ki a Arakipu, ki te hāhi hoki i tōu whare:

³ Kia tau te aroha noa ki a koutou, me te rangi­mārie, he mea nā te Atua, nā tō tātou Matua, nā te Ariki hoki, nā Īhu Karaiti.

Te Aroha me te Whakapono o Pirimona

⁴ Tēnei ahau te whaka­whetai atu nei ki tōku Atua, mau tonu tōku mahara ki a koe i āku karakia­tanga.

⁵ He rongo nōku ki tōu aroha, ki tōu whaka­pono ki te Ariki, ki a Īhu, ā, ki te hunga tapu katoa.

⁶ Mō te whaka­hoa­tanga mai o tōu whaka­pono kia whai mana, i runga i te mātau­ranga ki ngā pai katoa i roto i a koutou, he mea ki a Karaiti Īhu.

⁷ He nui hoki tō mātou koa, mārie ana hoki te ngākau i tōu aroha, nō te mea e ora ana ngā ngākau o te hunga tapu i a koe, e tōku teina.

He Tono mō Onehimu

⁸ Heoi, ahakoa he nui tōku māia i roto i a te Karaiti ki te whaka­takoto atu i te mea tika ki a koe.

⁹ Nā te aroha kē tāku ka īnoi atu nei, arā tāku, tā te koro­heke, tā Paora, he here­here nei ināia­nei nā Īhu Karaiti.

¹⁰ He kupu tēnei nāku ki a koe mō tāku tama­iti, mō Onehimu, he mea whānau nāku i ahau nei i te here­here.

¹¹ I mua, kāhore tētahi mea pai ana ki a koe; ināia­nei ia, kua whai pai koe i a ia, ahau anō hoki.

¹² Kua whaka­hokia atu nei ia e ahau, tōna tinana tonu, ko tōku manawa ake ia.

¹³ I mea anō ahau kia puri­tia ia ki ahau, hei whaka­kapi mōu ki te mahi ki ahau i roto i ngā meka­meka o te rongo­pai.

¹⁴ Otirā, kāhore nei tāu kupu, kīhai ahau i pai kia meatia tētahi mea; kei riro whaka­uaua mai tōu pai; engari i roto anō i te ngākau.

¹⁵ Ko te mea anō pea tēnei i motu­hia mai ai ia i a koe mō tētahi wā, kia mau pū ai ia i a koe ake ake.

¹⁶ Ehara i te mea hei pono­nga ia i ēnei wā, engari tērā atu i te pono­nga, he teina i nui rawa ai tōku aroha, tērā ia e nui rawa atu tōu, i te kiko­kiko, i te Ariki anō hoki.

¹⁷ Nā, ki te mea kua waiho ahau hei hoa mōu, manako mai ki a ia me te mea ko ahau.

¹⁸ Ki te mea ia kua hē ia ki tētahi mea āu, kei a ia rānei tētahi mea āu, waiho mai māku tēnā e whaka­aro.

¹⁹ He tuhi­tuhi tēnei nāku, nā Paora, nā tōku ringa­ringa ake; māku e whaka­utu. Nā, kāhore āku mea­tanga atu ki a koe, tērā anō tāku taonga kei a koe, ko koe anō.

²⁰ Āe rā, e tōku teina, kia whai pai ahau i a koe i roto i te Ariki; kia ora tōku ngākau i roto i te Ariki.

²¹ He ū nō tōku whaka­aro ki a koe ka ngohe­ngohe, i tuhi­tuhi atu ai ahau ki a koe, e mōhio ana hoki, tērā e nui atu tāu e mea ai i tāku e kōrero atu nei.

²² Tēnei anō hoki, kia rite mai i a koe tētahi whare mōku; e mea ana hoki ahau tērā e mana ā koutou īnoi, ā, ka tukua atu ahau ki a koutou.

Poroporoaki

²³ Tēnei te oha atu nei ki a koe a Epapara, tōku hoa here­here i roto i a Karaiti Īhu,

²⁴ rātou tahi ko Māka, ko Aritaku, ko Rīmaha, ko Ruka, ōku hoa mahi.

²⁵ Kia tau te aroha noa o tō tātou Ariki, o Īhu Karaiti ki ō koutou wairua. Āmine.