Ngā Mahi 20 - Te Kawenata Hou

Ki Makeronia me Kariki

¹ Ā, nō te mutu­nga o te nga­ngau, ka karanga­tia e Paora ngā ākonga, ka tohu­tohu i a rātou, ka poro­poro­aki, ā, tūria atu ana e ia, haere ana ki Makeronia.

² Ā, ka hāere­erea e ia aua wāhi, me te whaka­hau i a rātou ki ngā kupu maha, ā, haere ana ia ki Kariki;

³ ā, ka toru ōna marama ki reira. I ngā Hūrai anō e whaka­takoto whaka­aro ana mōna, i a ia meāke rere ki Hīria, ka whaka­aro ia kia hoki mā Makeronia.

⁴ Ā, i haere tahi i a ia tae noa ki Āhia, a Hopate o Peria, te tama a Piru; a Aritaku rāua ko Hekunu o Teharonika; a Kaiu o Rerepe; a Tīmoti hoki rātou ko Tikiku, ko Toropimu o Āhia.

⁵ Otirā, kua haere atu ēnei i mua, ā, e tatari mai ana ki a mātou i Toroa.

⁶ Nā, i te mutu­nga o ngā rā o te Taro Rēwenakore ka rere atu mātou i Piripai, ā, pō rima ka tae atu ki a rātou ki Toroa, ā, e whitu ngā rā i noho ai ki reira.

Te Haerenga Whakamutunga o Paora ki Toroa

⁷ Nā i te rā tua­tahi o te wiki, i te mea kua hui­hui mātou ki te whawhati taro, ka kauwhau a Paora ki a rātou, e mea ana hoki ki te haere i te aonga ake; ā, ka kūmea roatia tāna kōrero ā waenga­nui pō rā anō.

⁸ Ā, he maha ngā rama i te rūma i runga, i te wāhi i hui­hui ai mātou.

⁹ Nā, tērā tētahi tai­tama­riki, ko Ūtiku te ingoa, i te mata­pihi e noho ana, kua tino para­ngia e te moe; ā, ka roa tonu te kauwhau a Paora, nā, ka pēhia rawa­tia ia e te moe, nā, ka taka iho i te toru o ngā whaka­papa­ranga o ngā rūma, tango­hia rawa­tia ake kua mate.

¹⁰ Nā, ka heke iho a Paora, ā, hinga ana ki runga ki a ia, awhi ana i a ia, ka mea, “Kei nga­ngau koutou; kei roto hoki i a ia tōna wairua.”

¹¹ Nā, ka kake atu anō ia, ka whawhati taro, ka kai, ā, ka roa rawa te kōrero ā pūao noa, ka haere.

¹² Heoi, āra­hina oratia atu ana e rātou taua tai­tama, kīhai hoki i nohi­nohi te koa.

Mai i Toroa ki Miretu

¹³ Nā, ko mātou kua riro i mua ki te kai­puke, ā, rere ana ki Aho, i mea kia utaina a Paora i reira; nāna hoki i whaka­rite, i mea hoki ko ia me rā uta.

¹⁴ Ā, ka tūtaki ki a mātou ki Aho, ka utaina ia, ā, rere ana mātou ki Mitirini.

¹⁵ Rere atu ana mātou i reira, ā, i te aonga ake ka taea te rite­nga atu o Kio; ao ake anō ka ū ki Hamo, ā, noho ana ki Torokiriuma; ao ake anō ka ū ki Miretu.

¹⁶ I mea hoki a Paora kia rere i waho ake o Epeha, kei roa ia ki Āhia; i pōrangi hoki me kore e roko­hanga atu ia e te rā o te Petekoha ki Hiruhārama.

Te Poroporoaki a Paora ki ngā Kaumātua o Epeha

¹⁷ Nā, ka tono tāngata atu ia i Miretu ki Epeha, hei tiki i ngā kaumātua o te hāhi.

¹⁸ Ā, nō tō rātou taenga mai ki a ia, ka mea ia ki a rātou, “E mātau ana koutou ki tāku tikanga i roto i a koutou i ngā rā katoa, nō te rā tua­tahi iho anō o tōku taenga mai ki Āhia,

¹⁹ pāpaku noa iho te ngākau i mahi ai ahau ki te Ariki, he maha ia ngā roi­mata me ngā whaka­mā­tau­tau i pā ki ahau, i ngā Hūrai e whaka­takoto whaka­aro ana mōku.

²⁰ Kīhai i puri­tia e ahau tētahi o ngā mea pai i whaka­kitea atu anō ki a koutou i ākona nuitia ki a koutou, i tēnei whare, i tēnei whare.

²¹ I kauwhau­tia hoki ki ngā Hūrai ki ngā Kariki, te rīpe­netā whaka te Atua, me te whaka­pono ki tō tātou Ariki, ki a Īhu Karaiti.

²² Nā, tēnei ahau te haere nei ki Hiruhārama, he here­here­nga nā te wairua, kāhore hoki e mōhio ki ngā mea e pā ki ahau i reira.

²³ Heoi anō, ko tā te Wairua Tapu e whaka­atu nei ki ahau i tēnei pā, i tēnei pā, e mea ana, kei te tāria mai ahau e ngā meka­meka, e ngā mate.

²⁴ Otirā, kāhore ahau e ihu­puku ki te ora, hei painga ki ahau ake, engari, kia taea tāku e whai nei, me te mahi i hōmai ki ahau e te Ariki, e Īhu, arā kia whaka­atu­ria te rongo­pai o te aroha noa o te Atua.

²⁵ “Nā, e mōhio ana tēnei ahau, heoi anō, kite­nga o tōku mata e tētahi o koutou, e te hunga i kauwhau haere nei ahau i te ranga­tira­tanga o te Atua i roto i a koutou.

²⁶ Koia ahau ka mea nei ki a koutou āia­nei, Kāhore ōku poke i ngā toto o tētahi tangata.

²⁷ Kīhai hoki ahau i manawa­pā ki te kauwhau i te whaka­aro katoa o te Atua ki a koutou.

²⁸ Nā, kia tūpato ki a koutou, ki te kāhui katoa anō i meinga ai koutou e te Wairua Tapu hei kai­tiro­tiro, whāngaia te hāhi a te Atua i hokona nei e ia ki ōna ake toto.

²⁹ E mōhio ana hoki ahau ki tēnei ka riro ahau tērā e puta mai ki a koutou he wuruhi nana­kia, e kore nei e tohu i te kāhui.

³⁰ Ā, ka whaka­tika ake ētahi tāngata i roto i a koutou anō, kōrero ai i ngā mea parori kē, hei kukume i ngā ākonga kia whai i a rātou.

³¹ Nā reira, kia mata­ara, kia mahara anō ki ngā tau e toru kīhai nei ahau i māngere i te pō, i te ao, ki te whaka­tūpato i tēnei, i tēnei o koutou, me te tangi anō ahau.

³² “Nā, tēnei ahau, te tuku nei i a koutou ki te Atua, ki te kupu hoki o tōna aroha noa, e kaha nei ki te whaka­tupu ake, ki te hoatu hoki i tētahi wāhi ki a koutou i roto i te hunga katoa kua oti te whaka­tapu.

³³ Kīhai i hia­hia­tia e ahau te hiriwa, te kōura, te kākahu rānei, o tētahi.

³⁴ E mōhio ana anō koutou, nā ēnei ringa i mahi ngā mea i matea e ahau, e ōku hoa hoki.

³⁵ I ngā mea katoa i hoatu ahau he tauira ki a koutou, kia pēnei tā koutou mahi kia ata­whai­tia ai e koutou te hunga ngoi­kore, me te mahara ki ngā kupu a te Ariki, a Īhu, i mea rā ia, ‘Ko te whaka­whi­whi, nui atu te hari i tō te whi­whi.’ ”

³⁶ I te mutu­nga o tēnei whai kupu āna ka tukua ōna turi ki raro, ka īnoi tahi ia me rātou katoa.

³⁷ He nui hoki te tangi o te katoa; hinga iho rātou ki runga ki te kakī o Paora, ka kihi i a ia;

³⁸ i tino mamae pū hoki rātou i te kupu i mea ai ia, heoi anō, tō rātou kite­nga i tōna mata. Nā, ka ārahi rātou i a ia ki te kai­puke.