Ngā Mahi 16 - Te Kawenata Hou

Ka Haere a Tīmoti ki te taha o Paora rāua ko Hira

¹ Nā, ka tae atu hoki ia ki Rerepe, ki Raihitara, ā, i reira tētahi ākonga, ko Tīmoti te ingoa, he tama nā tētahi wahine whaka­pono, he Hūrai, ko tōna pāpā ia he Kariki.

² He pai te kōrero mōna a ngā tēina i Raihitara, i Ikoniuma.

³ I mea a Paora kia haere ia hei hoa mōna, ā, tango­hia ana ia, kotia ana, he mea hoki mō ngā Hūrai e noho ana i aua wāhi; i mātau hoki rātou katoa he Kariki tōna pāpā.

⁴ Ā, i a rātou e hāere­ere ana i ngā pā, ka tukua e rātou hei pupuri mā rātou ngā tikanga i whaka­ritea e ngā āpō­toro, e ngā kaumātua, i Hiruhārama.

⁵ Nā, ka whaka­ū­kia ngā hāhi ki te whaka­pono, ka nui haere hoki i tēnei rā, i tēnei rā.

Te Whakakitenga ki a Paora i Toroa

⁶ Nā, haere ana rātou nā waenga­nui o te whenua o Pirikia, o Karatia, kua āraia hoki e te Wairua Tapu kei kōrero i te kupu ki Āhia.

⁷ Ā, i te taenga atu ki Maihia, ka whaka­mātau rātou ki te haere ki Pitinia; heoi, kīhai i tukua e te Wairua o Īhu;

⁸ nā, kapea ana Maihia, ka haere ki Toroa.

⁹ Ā, ka kitea e Paora he kite­nga i te pō: He tangata nō Makeronia e tū ana, e tohe ana ki a ia, e mea ana, “Whiti mai ki Makeronia, āwhina­tia mātou.”

¹⁰ Ā, nō ka kitea te kite­nga, ka mea tonu mātou kia haere ki Makeronia, i whaka­aro hoki, nā te Atua mātou i karanga ki te kauwhau i te rongo­pai ki a rātou.

I Piripai: Te Huringa o Riria ki te Whakapono

¹¹ Heoi, ko te rere­nga atu i Toroa, ka tika tonu mātou ki Hamotarakia, ā, ao ake te rā ki Neapori.

¹² I reira atu ki Piripai, ko te pā nui ia o taua wāhi o Makeronia, he koroni nō Roma. Ā, noho ana mātou i taua pā ā taka noa ētahi rā.

¹³ Nā, i te rā hāpati ka haere mātou ki waho o te pā, ki te taha o tētahi awa, he whaka­aro ko te wāhi tērā hei karakia­tanga; ā, ka noho, ka kōrero ki ngā wāhine i haere tahi ake.

¹⁴ Nā, ka whaka­rongo tētahi wahine, ko Riria te ingoa, he kai­hoko pāpura, nō te pā o Taiataira, he wahine kara­kia ki te Atua. He mea whaka­puare tōna ngākau e te Ariki, i rongo ai ia ki ngā mea i kōrero­tia e Paora.

¹⁵ Ā, nō ka oti ia te iri­iri, rātou ko tōna whare, ka tohe ia, ka mea, “Ki te mea kua Whaka­aro koutou he pono tāku mahi ki te Ariki, tomo mai koutou, e noho ki tōku whare.” Nā, ka tohea mātou e ia.

I te Whare Herehere i Piripai

¹⁶ Nā, i a mātou e haere ana ki te wāhi īnoi, ka tūtaki ki a mātou tētahi kōtiro, he wairua mata­kite nei tōna, he nui te utu i riro i a ia mā ōna ranga­tira, i a ia e poro­piti ana.

¹⁷ Ka whai ia i a mātou ko Paora, ka karanga, ka mea, “He pono­nga ēnei tāngata nā te Atua, nā te Runga Rawa, e whaka­pua­kina ana e rātou te ara o te ora ki a koutou.”

¹⁸ Nā, he maha ngā rā i mea ai ia tēnei. Otiia, ka hōhā a Paora, ka tahuri, ka mea ki te wairua, “Ko tāku kupu tēnei ki a koe i runga i te ingoa Īhu Karaiti, puta mai i roto i a ia.” Puta mai ana i taua hāora anō.

¹⁹ Otirā, nō te kite­nga o ōna ranga­tira kua kore he mahi­nga moni mā rātou, ka mau ki a Paora rāua ko Hira, ka tōia ki te kāinga hoko ki ngā ranga­tira.

²⁰ Ā, ka oti rāua te mau ki ngā kai­whaka­wā, ka mea, “Ko ēnei tāngata he Hūrai nei, e tino whaka­raru­raru ana i tō tātou pā,

²¹ e whaka­pua­kina ana hoki e rāua he rite­nga e kore nei e tika kia whaka­ae­tia, kia mahia e tātou, e ngā tāngata o Roma.”

²² Nā, ko te whaka­tikanga o te mano ki a rāua. Ka huhua ō rāua kākahu e ngā kai­whaka­wā, ka mea kia whiua ki te rākau.

²³ Ā, ka maha ō rāua whiu­nga e rātou, ka makā rāua ki te whare here­here, ka tohu­tohu­tia te kai­tiaki here­here, kia mau tāna pupuri i a rāua.

²⁴ Nō te riro­nga i a ia o taua kupu, ka makā rāua e ia ki te whare here­here i roto rawa, ka whaka­ūria ō rāua wae­wae ki te rākau.

²⁵ Nā, i waenga­nui pō ka īnoi a Paora rāua ko Hira, ka waiata atu ki te Atua, me te whaka­rongo anō ngā here­here ki a rāua.

²⁶ Nā, ka pā whaka­rere he rū nui, i ngarue ai ngā tū­ranga o te whare here­here. Ā, puare tonu atu ngā tatau katoa, whaka­koro­koroa ana ngā here­nga o ngā tāngata katoa.

²⁷ Ā, ka oho te kai­tiaki here­here i te moe, ka kite i ngā tatau o te whare here­here e puare ana, nā, ka unu i tāna hoari, ka mea ki te patu i a ia anō, hua noa kua oma ngā here­here.

²⁸ Nā, ka nui te reo o Paora ki te karanga, ka mea, “Kauaka tētahi mea kino e meatia ki a koe; ina tonu hoki mātou katoa.”

²⁹ Ā, karanga­tia ana e ia he rama, ka rere ki roto, ka haere wiri, ka takoto ki te aro­aro o Paora rāua ko Hira.

³⁰ Ka āra­hina hoki rāua ki waho, ka mea, “E hoa mā, me aha ka ora ai ahau?”

³¹ Ka mea rāua “Me whaka­pono ki te Ariki, ki a Īhu Karaiti, ka ora ai koe, koutou tahi ko tōu whare.”

³² Nā, ka kōrero­tia te kupu a te Ariki ki a ia, ki ngā tāngata katoa hoki i roto tōna whare.

³³ Ā, ka mauria rāua e ia i taua hāora o te pō, ka horoia ō rāua whiu­nga; nā, iri­iria tonu­tia iho, a ia me āna tāngata katoa.

³⁴ Ā, ka āra­hina rāua e ia ki tōna whare, ka whaka­tū­ria he tēpu kai ki mua i a rāua, ā, nui atu tōna hari, me tōna whare katoa, i te mea kua whaka­pono nei ki te Atua.

³⁵ I te aonga ake ia o te rā, ka tonoa, ngā kātipa e ngā kai­whaka­wā, i mea, “Tukua aua tāngata kia haere.”

³⁶ Nā, ka kōrero­tia e te kai­tiaki here­here ēnei kupu ki a Paora, ka mea, “Kua tono tāngata mai ngā kai­whaka­wā, kia tukua kōrua. Tēnā rā puta mai, haere i runga i te rangi­mārie.”

³⁷ Nā, ko te kīanga atu a Paora, “Kua whiua nuitia nei māua e rātou, ahakoa kāhore i whaka­wā­kia, he tāngata hoki nō Roma, ā, kua makā māua ki te whare here­here. Ā, kei te makā puku­tia atu māua āia­nei e rātou? Kāhore rāpea; engari, mā rātou tonu e haere mai, e whaka­puta i a māua ki waho.”

³⁸ Nā, ka kōrero­tia ēnei kupu e ngā kātipa ki ngā kai­whaka­wā; ā, ka wehi, i tō rātou rongo­nga nō Roma rāua.

³⁹ Nā, ka haere mai rātou, ka tohe ki a rāua, ā, ka oti rāua te ārahi ki waho, ka mea rātou kia haere atu rāua i te pā.

⁴⁰ Ā, ka puta atu rāua i te whare here­here, ka tomo ki te whare o Riria, ā, nō ka kite rāua i ngā tēina, ka whaka­mārie i a rātou, ka haere.