Ngā Mahi 12 - Te Kawenata Hou

Te Whakatoinga Anō

¹ Nā, i taua wā, ka totoro atu ngā ringa o Kīngi Herora ki te tūkino i ētahi o te hāhi.

² Ā, whaka­matea ana e ia ki te hoari a Hēmi, te tua­kana o Hoani.

³ Ā, nō tōna kite­nga e pai ana ki ngā Hūrai, ka anga ia ki te hopu hoki i a Pita. Nā, ko ngā rā ēnā o te Taro Rēwenakore.

⁴ Ā, nō ka mau ia, ka makā ki te whare here­here, ka tukua ki ngā hōia kotahi tekau mā ono kia tiaki­na; ko te whaka­aro mō muri iho i te Kape­nga ka whaka­puta mai ai i a ia ki te iwi.

⁵ Nā, ka puri­tia a Pita ki roto ki te whare here­here; otiia, kīhai i mutu­mutu te īnoi a te hāhi ki te Atua mōna.

Te Putanga mai o Pita i te Whare Herehere

⁶ Ā, nō ka tata a Herora te whaka­puta mai i a ia, i taua pō anō e moe ana a Pita i waenga­nui o ngā hōia toko­rua, he mea here ki ngā meka­meka e rua; me ngā kai­tiaki i mua i te tatau e tiaki ana i te whare here­here.

⁷ Nā, tū ana tētahi ana­hera nā te Ariki i tōna taha, ā, tīaho ana te mārama i roto i te rūma. Nā, ka papaki ia i te kao­kao o Pita, ka whaka­ara i a ia, ka mea, “E ara, hohoro.” Ā, marere iho ōna meka­meka i ōna ringa.

⁸ Ka mea atu anō te ana­hera ki a ia, “Whī­tiki i a koe, ka here i ōu pā­reke­reke.” Ā, meinga ana e ia. Ka mea anō ki a ia, “Kākahu­ria tōu kākahu, haere mai i muri i ahau.”

⁹ Nā, ka haere ia ki waho, ka aru i a ia, ā, kīhai ia i mahara he pono tā te ana­hera i mea ai; hua noa he reka­nga kanohi tāna i kite ai.

¹⁰ Ā, nō ka mahue i a rāua te tua­tahi, te tuarua o ngā kai­tiaki, ka tae rāua ki te tatau rino i te pu­tanga atu ki te pā; tu­whera noa ana tērā ki a rāua. Puta ana rāua ki waho, haere ana, puta rawa i tētahi ara, mawehe tonu atu te ana­hera i a ia.

¹¹ Ā, i te hoki­nga ake o ngā whaka­aro o Pita, ka mea ia, “Kātahi ahau ka tino mōhio, kua tono mai te Ariki i tāna ana­hera, hei tango i ahau i roto i te ringa o Herora, i ngā mea katoa hoki e tāria nei e te iwi o ngā Hūrai.”

¹² Ā, nō ka whaka­aro­aro ia ki taua mea, ka haere ia ki te whare o Meri, whaea o Hoani, ko te rua nei o ōna ingoa ko Māka; he toko­maha hoki kua hui­hui ki reira ki te īnoi.

¹³ Ā, nō te pātōtō­tanga a Pita i te tatau o te whati­toka, ka tae mai he kōtiro ki te whaka­rongo, ko Rora te ingoa.

¹⁴ Ā, nō ka mōhio ia ki te reo o Pita, kīhai i uakina te tatau i te hari, heoi, oma ana ki roto, ki te kōrero kei te tatau a Pita e tū ana.

¹⁵ Nā, ka mea rātou ki a ia, “E hau­rangi ana koe!” Heoi, ka tohe tonu ia he pono. Nā, ka mea rātou, “Ko tōna ana­hera.”

¹⁶ Me te pātuki tonu anō tērā a Pita; ā, i tā rātou ua­kanga, ka kite i a ia, ka mīharo.

¹⁷ Nā, ka pēpehi atu tōna ringa i a rātou kia kaua e kuihi, ka kōrero­tia ki a rātou tōna whaka­puta­nga mai e te Ariki i te whare here­here. Ka mea, “Kōrero­tia ēnei mea ki a Hēmi rātou ko ngā tēina.” Nā, ka puta ia ki waho, haere ana he wāhi kē.

¹⁸ Nā, i te aonga ake anō o te rā, kīhai i iti te poro­raru o ngā hōia, i ahatia rānei a Pita.

¹⁹ Nā, ka rapu a Herora i a ia, ā, nō te kore­nga i kitea, ka whaka­wā i ngā kai­tiaki, ka whaka­hau kia whaka­matea. Nā, haere atu ana ia i Hūria ki raro ki Hiha­ria noho ai.

Te Matenga o Herora

²⁰ Nā, tino nui te riri o Herora ki te hunga o Tāira, o Hairona. Otirā, ka hui­hui mai rātou ki a ia, ā, ka oti a Parahitu, te kai­tiaki o te whare moenga o te kīngi, te whaka­kīkī e rātou, ka tono rātou kia houhia te rongo, nō te mea ko ngā kai i whāngaia ai tō rātou whenua nō te whenua o te kīngi.

²¹ Ā, i tētahi rā i whaka­ritea ka kākahu a Herora i te kākahu kīngi, ka noho ki runga ki te torōna, ā, whaka­tū ana ki a rātou.

²² Nā, ko te karanga­tanga a te hui­hui, “He reo atua, ehara i tō te tangata!”

²³ I reira, pū anō ka patua ia e tētahi ana­hera a te Ariki, nō te mea kīhai i hoatu e ia te korōria ki te Atua, ā, kainga ana ia e te kutu­kutu, hemo ake.

²⁴ Ko te kupu ia a te Atua i tupu, i nui haere.

²⁵ Ā, ka hoki a Pānapa rāua ko Haora i Hiruhārama, i te otinga o tā rāua mahi, ka mauria a Hoani, ko te rua nei o ōna ingoa ko Māka.