Matiu 1 - Te Kawenata Hou

Te Whakapapa o Īhu Karaiti

¹ Ko te pukapuka o te whakapapa o Īhu Karaiti, tama a Rāwiri, tama a Āperahama.

² Nā, ko tā Āperahama ko Īhaka; tā Īhaka ko Hākopa; tā Hākopa ko Hūrā rātou ko ōna tuākana, ko ōna tēina;

³ tā Hūrā rāua ko Tāmara ko Parete rāua ko Hara; tā Parete ko Heteromo; tā Heteromo ko Arame;

⁴ tā Arame ko Aminarapa; tā Aminarapa ko Nāhona; tā Nāhona ko Haramono;

⁵ tā Haramono rāua ko Rahapa ko Poaha; tā Poaha rāua ko Rutu ko Ōpere; tā Ōpere ko Hehe;

⁶ tā Hehe ko Rāwiri, ko te kīngi. Tā Rāwiri kīngi rāua ko te wahine a Uria ko Horomona;

⁷ tā Horomona ko Rehopoama; tā Rehopoama ko Apia; tā Apia ko Aha.

⁸ Tā Aha ko Iehohāpata; tā Iehohāpata; ko Iorama; tā Iorama ko Ohiaha;

⁹ tā Ohiaha ko Iotama; tā Iotama ko Āhata; tā Āhata ko Hetekia;

¹⁰ tā Hetekia ko Mānahi; tā Mānahi ko Amono; tā Amono ko Hōhia;

¹¹ tā Hōhia ko Hekonia rātou ko ōna tēina; i te wā o te whakahekenga ki Papurōna.

¹² Ā, i muri i te whakahekenga atu ki Pa­purōna, ka whānau tā Hekonia ko Haratiera; tā Haratiera ko Herupapera;

¹³ tā Herupapera ko Apiuru; tā Apiuru ko Eriakimi; tā Eriakimi ko Ātoro;

¹⁴ tā Ātoro ko Hāroko; tā Hāroko ko Ākimi; tā Ākimi ko Eriuru;

¹⁵ tā Eriuru ko Ereātara; tā Ereātara ko Matana; tā Matana ko Hākopa;

¹⁶ tā Hākopa ko Hōhepa, ko te tahu a Meri; whānau ake tā Meri ko Īhu, e kīa nei ko te Karaiti.

¹⁷ Heoi, ko ngā whakatupuranga katoa o Āperahama tae noa ki a Rāwiri, tekau mā whā ngā whakatupuranga; o Rāwiri tae noa ki te whakahekenga ki Papurōna tekau mā whā ngā whakatupuranga; ā, nō te whakahekenga ki Papurōna tae noa ki a te Karaiti tekau mā whā ngā whakatupuranga.

Te Whānautanga o Īhu

¹⁸ Nā, ko te whānautanga tēnei o Īhu Karaiti; he mea taumau a Meri, tōna whaea, mā Hōhepa, ā, i te mea kīanō rāua i tata noa ki a rāua, ka kitea kua hapū ia i te Wairua Tapu.

¹⁹ Otirā, he tangata tika tāna tahu, a Hōhepa, ā, kāhore ōna ngākau kia whakakitea nuitia ia, ka mea kia whakarērea pukutia.

²⁰ Otiia, i a ia e hurihuri ana i ēnei mea, nā, ka puta moemoeā mai tētahi anahera a te Ariki ki a ia, ka mea, “E Hōhepa, e te tama a Rāwiri, kaua e hopohopo ki te tango i a Meri, i tāu wahine; nā te Wairua Tapu hoki tōna hapū.

²¹ Ā, e whānau ia he tama, me hua e koe tōna ingoa ko Īhu; nō te mea māna e whakaora tōna iwi i ō rātou hara.”

²² Nā, ka oti tēnei katoa, kātahi ka rite tā te Ariki, i kōrerotia e te poropiti, i mea ai ia,

²³ “Nā, ka hapū te wāhina, ka whānau hoki he tama, ā, ka huaina e rātou tōna ingoa ko Emānuera,” ko tōna whakamāoritanga tēnei, “Kei a tātou te Atua.”

²⁴ Ā, ka ara ake a Hōhepa i te moe, ka meatia e ia tā te anahera a te Ariki i whakahau ai ki a ia, ā, tango ana ia i tāna wahine.

²⁵ Ā, kīhai i mōhio ki a ia, whānau noa tāna tama mātāmua; ā, huaina ana e ia tōna ingoa ko Īhu.