Māka 9 - Te Kawenata Hou

¹ I mea anō ia ki a rātou, “He pono tāku e mea nei ki a koutou, tēnei anō ētahi o te hunga e tū nei, e kore e pāngia e te mate, kia kite rā anō i te ranga­tira­tanga o te Atua e haere mai ana i runga i te kaha.”

Te Whakaahua Kētanga

² Ā, ka pahure ngā rā e ono, ka mau a Īhu ki a Pita, ki a Hēmi, ki a Hoani, nā, kawea ana rātou e ia ki runga ki tētahi maunga tike­tike, ko rātou anake. Ā, ka puta kē tōna āhua i tō rātou aro­aro.

³ Nā, kanapa tonu ōna kākahu, mā tonu me te huka­rere; e kore e taea e te kai­horoi i runga i te whenua te mea kia pērā te mā.

⁴ Nā, ka puta mai ki a rātou a Irāia rāua ko Mohi; e kōrero­rero ana rāua ki a Īhu.

⁵ Nā, ka oho a Pita, ka mea ki a Īhu, “E te Kai­whaka­ako, he mea pai kia noho tātou ki konei; nā, kia hangā e mātou ētahi wharau kia toru; kia kotahi mōu, kia kotahi mō Mohi, kia kotahi mō Irāia.”

⁶ Kāhore hoki ia i mātau ki tāna e kōrero ai; i wehi hoki rātou.

⁷ Nā, ko tētahi kapua e tau­maru­maru ana ki runga ki a rātou; ā, ka puta he reo i te kapua, e mea ana, “Ko tāku Tama tēnei i aroha ai; whaka­rongo ki a ia.”

⁸ Ā, ti­tiro rawa ake rātou ki tētahi taha, ki tētahi taha kāhore ā rātou tāngata i kite ai, ko rātou anake, ko Īhu.

⁹ Ā, i a rātou e heke iho ana i te maunga, ka whaka­tūpato ia i a rātou kia kaua e kōrero­tia ki te tangata ā rātou i kite ai, kia ara rā anō te Tama a te tangata i te hunga mate.

¹⁰ Ā, i puri­tia taua kupu e rātou, ka uiui ki a rātou anō, he aha rā te aranga ake i te hunga mate.

¹¹ Ā, ka ui rātou ki a ia, ka mea, “He aha ngā kara­ipi ka mea ai, ko Irāia kia mātua puta mai?”

¹² Nā, ka whaka­hoki ia, ka mea ki a rātou, “E puta ana anō a Irāia i mua ki te whaka­tika i ngā mea katoa. Kua oti anō te tuhi­tuhi mō te Tama a te tangata, kia maha ōna mamae, kia whaka­kāhore­tia.

¹³ Ko tāku kupu ia tēnei ki a koutou, Kua tae mai anō a Irāia, heoi, meatia ana e rātou ki a ia tā rātou i pai ai, ngā mea hoki i tuhi­tuhia mōna.”

Ka Whakaorangia e Īhu he Tama he Wairua Poke Tōna

¹⁴ Ā, nō tō rātou taenga ki ngā ākonga, ka kite rātou he rahi te hui e kara­poti ana i a rātou, me ngā kara­ipi e totohe ana ki a rātou.

¹⁵ Ā, kite kau te mano katoa i a ia, ka mīharo, ā, oma ana, oha ana ki a ia.

¹⁶ Nā, ka ui ia ki a rātou, “He aha tā koutou e totohe nā ki a rātou?”

¹⁷ Nā, ka whaka­hoki tētahi i roto i te mano, ka mea, “E te Kai­whaka­ako, i kawea mai e ahau tāku tama ki a koe, he wairua reo­kore tōna.

¹⁸ Ā, i ngā wāhi e hopu ai te wairua i a ia, ka tāia iho. Tutū ana te huka, tetēā ana ōna niho, ā, pakoko haere ana: i mea anō ahau ki āu ākonga kia peia ia ki waho; heoi, kīhai i taea e rātou.”

¹⁹ Nā, ko tāna whaka­hoki­nga ki a ia, ka mea, “E te uri whaka­pono kore, kia pēhea te roa o tōku noho ki a koutou? Kia pēhea te roa o tāku manawa­nui ki a koutou? Kawea mai ki ahau.”

²⁰ Nā, kawea ana mai ia ki a ia. Ā, i tōna kite­nga i a ia, nā, hāea tonu­tia iho ia e te wairua; ā, hinga ana ia ki te whenua, ka oke, ka huka.

²¹ Nā, ka ui ia ki tōna matua, “Ka pēhea te roa o te mea nei ki ia?” Ka mea ia, “Nō te tama­riki­tanga.

²² He maha āna tura­kanga i a ia ki te kāpura, ki te wai, kia ngaro ai: otirā ki te taea e koe te aha rānei, aroha­ina māua, kia puta tōu whaka­aro ki a māua.”

²³ Ka mea a Īhu ki a ia, “Ki te taea e koe te whaka­pono, ka taea ngā mea katoa e te tangata whaka­pono.”

²⁴ Nā, karanga tonu mai te matua o te tama, ka mea, “E whaka­pono ana ahau, e te Ariki; kia puta tōu whaka­aro ki tōku whaka­pono kore.”

²⁵ Ā, nō te kite­nga o Īhu i te mano e oma mai ana, ka rīria e ia te wairua poke, ka mea ki a ia, “E te wairua reo­kore, turi, ko tāku tēnei ki a koe, Puta mai i roto i a ia, kaua anō e tomo ki roto ki a ia ā muri ake nei.”

²⁶ Nā, hāmama ana tērā, hae­hae noa iho ana i a ia, ā, puta ana mai ki waho; nō ka pērā taua tangata me te tū­pā­paku, ā, he toko­maha i mea, “Kua mate.”

²⁷ Otirā, ka mau a Īhu ki tōna ringa, ka whaka­ara i a ia, ā, ka whaka­tika ia.

²⁸ Ā, i a ia ka tomo ki te whare, ka ui puku āna ākonga ki a ia, “He aha mātou tē āhei ai te pei i a ia ki waho?”

²⁹ Anō rā, ko ia ki a rātou, “E kore e puta noa te pēnā, mā te īnoi anake, mā te noho­puku.”

Ka Kōrero anō a Īhu mō Tōna Matenga

³⁰ Nā, ka hāpai­nga e rātou i reira, ā, haere ana rā waenga­nui o Kariri; kīhai hoki ia i pai kia rangona e tētahi.

³¹ Ko tāna hoki i whaka­ako ai ki āna ākonga, i mea ai ki a rātou, “Ka tukua te Tama a te tangata ki ngā ringa o ngā tāngata, ā, mā rātou ia e whaka­mate; ā, ka oti ia te whaka­mate, ka ara ake i te toru o ngā rā.”

³² Nā, kīhai rātou i mātau ki taua kupu, ka mataku hoki ki te ui ki a ia.

Ko Wai te Tino Nui Rawa?

³³ Nā, ka tae rātou ki Kaperenauma; ā, i a ia i roto i te whare, ka ui ia ki a rātou, “He aha tā koutou i kōrero­rero ai ki a koutou i te ara?”

³⁴ Otiia, kīhai rātou i kīkī; ko tā rātou hoki i kōrero­rero ai ki a rātou i te ara, ko wai te mea nui rawa.

³⁵ Nā, ka noho ia, ka karanga i te tekau mā rua, ka mea ki a rātou, “Ki te whai tētahi kia whiti ko ia hei mua, ka waiho ia hei muri i te katoa, hei kai­mahi mā te katoa.”

³⁶ Nā, ka mau ia ki tētahi tama­iti nohi­nohi, ā, whaka­tū­ria ana ki waenga­nui i a rātou; nā, ka oko­oko i a ia, ka mea ki a rātou,

³⁷ “Ki te manako tētahi ki tētahi o ngā tama­riki pēnei, he whaka­aro ki tōku ingoa, e manako ana ia ki ahau; ki tē manako hoki tētahi ki ahau, ehara i ahau tāna i manako ai, engari ko tōku kai­tono mai.”

Ko Ia ehara i te Hoa Whawhai, Nō Tātou Ia

³⁸ Nā, ka mea a Hoani ki ia, “E te Kai­whaka­ako, i kite mātou i tētahi e pei rēwera ana i runga i tōu ingoa. Nā, rīria iho e mātou, kāhore hoki ia e haere tahi me tātou.”

³⁹ Nā, ka mea a Īhu, “Kaua ia e rīria ki te mea hoki nōku te ingoa e mahi mere­kara ai tētahi, e kore e hohoro tāna kōrero kino mōku.

⁴⁰ Ko ia hoki ehara i te hoa­riri ki a tātou, nō tātou ia.

⁴¹ Ki te whaka­inu­mia koutou e tētahi ki te kapu wai, he whaka­aro ki tōku ingoa, nō te mea nō te Karaiti koutou, he pono tāku e mea nei ki a koutou, e kore ia e hapa i tōna utu.

Ngā Whakawai kia Hara

⁴² “Nā, ki te mea tētahi kia hē tētahi o ēnei mea no­nohi e whaka­pono nei ki ahau, he pai kē ki a ia me i whaka­iria tētahi kōhatu mira ki tōna kakī, ā, ka makā ia ki te moana.

⁴³ Nā, ki te hē koe i tōu ringa, pōutoa; pai kē hoki mōu te tomo mutu ki te ora i te makā ringa­rua­tia ki Kehena, ki te kāpura e kore e tineia.

⁴⁴ Ki te wāhi e kore ai e mate tō rātou kutu­kutu, ki te kāpura e kore e tineia.

⁴⁵ Ki te hē anō koe i tōu wae­wae, pōutoa. Pai kē hoki mōu te tomo kopa ki te ora i te makā wae­wae­rua­tia ki Kehena,

⁴⁶ Ki te wāhi e kore ai e mate tō rātou kutu­kutu, ki te kāpura e kore e tineia.

⁴⁷ Ā, ki te hē koe i tōu kanohi, makā atu; pai kē hoki mōu te tomo kanohi tahi ki te ranga­tira­tanga o te Atua i te makā kanohi­rua­tia ki Kehena,

⁴⁸ ki te wāhi e kore ai e mate tō rātou kutu­kutu, ki te kāpura e kore e tineia.

⁴⁹ “Tā te mea ka totea ngā tāngata katoa ki te kāpura.

⁵⁰ “He pai te tote; otirā, ki te pirau te tote, mā te aha e whai tikanga tote ai? “Kia whai tote i roto i a koutou, kia mau hoki te rongo a tētahi ki tētahi.”