Māka 16 - Te Kawenata Hou

Te Aranga

¹ Ā, nō te pahemo­tanga o te hāpati, ka hokona he mea kakara e Meri Makarini, e Meri whaea o Hēmi, e Hāromi, kia haere ai rātou ki te whaka­wahi i a ia.

² Nā, i te atatū o te rā tua­tahi o te wiki, ka haere rātou ki te urupā i te pu­tanga mai o te rā;

³ ka kōrero­rero ki a rātou anō, “Ko wai rā hei whaka­taka mā tātou i te kōhatu i te kūwaha o te urupā?”

⁴ Ā, i tā rātou tiro­hanga ake, ka kite kua huri­hia atu te kōhatu; he mea nui whaka­hara­hara hoki.

⁵ Ā, nō ka tomo rātou ki te urupā, ka kite rātou i tētahi tai­tama­riki e noho ana i te taha matau, he kākahu mā tōna; nā, ka koera rātou.

⁶ Ā, ka mea ia ki a rātou, “Kaua e koera! E rapu ana koutou i a Īhu o Nahareta i rīpeka­tia. Kua ara ia; kāhore ia i konei. Tēnā! ti­tiro ki te wāhi i whaka­takoto­ria ai ia!

⁷ Engari haere, kōrero­tia atu ki āna ākonga, ki a Pita hoki, kei te haere ia i mua i a koutou ki Kariri. Ko reira koutou kite ai i a ia, pērā i tāna i mea ai ki a koutou.”

⁸ Nā, ka puta atu rātou, ā, oma ana i te urupā; kua tae mai hoki te tūiri, te koera ki a rātou. Kīhai rawa i kōrero ki tētahi tangata; nō te mea i wehi rātou.

Ka Whakakitea a Īhu ki a Meri Makarini

⁹ Nā, i tōna aranga ake i te atatū o te rā tua­tahi o te wiki, ka whaka­kite tua­tahi ia ki a Meri Makarini, i peia nei e ia e whitu ngā rēwera i roto i a ia.

¹⁰ Nā, ka haere tērā ka kōrero ki te hunga i piri rā ki a ia i mua, i a rātou e pōuri ana, e tangi ana.

¹¹ Ā, ko rātou, i tō rātou rongo­nga kei te ora ia, ā, kua kitea e ia, kāhore i whaka­pono.

Ka Kitea a Īhu e ētahi Ākonga Tokorua

¹² Nā, i muri iho i ēnei mea, ka puta ia, he āhua kē tōna, ki ētahi atu o rātou, toko­rua, i a rāua e haere ana, e anga ana ki ngā whenua.

¹³ Nā, ka haere hoki ēnā ka kōrero ki ētahi atu o rātou; otirā kāhore ērā i whaka­pono.

Ka Kitea a Īhu e te tekau mā tahi

¹⁴ Muri iho ka puta ia ki te tekau mā tahi, i a rātou e noho ana ki te kai, ā, rīria iho e ia tō rātou whaka­pono kore, me te pakeke o te ngākau, mō rātou kīhai i whaka­pono ki te hunga i kite nei i a ia kua ara.

¹⁵ Ka mea ki a rātou, “Haere koutou ki te ao katoa, kauwhau­tia te rongo­pai ki ngā tāngata katoa.

¹⁶ Ko ia e whaka­pono ana, ka oti te iri­iri, ka whaka­ora­ngia; otirā, ko te tangata e kore e whaka­pono, ka whaka­taua te hē ki a ia.

¹⁷ Ka whai tahi hoki ēnei tohu i te hunga e whaka­pono ana. Mā tōku ingoa rātou ka pei rēwera ai; ka kōrero­tia ai e rātou ngā reo hou;

¹⁸ ka tango ake ai rātou i ngā nākahi; ā, ki te inu i tētahi mea whaka­mate, e kore rātou e ahatia; ka pā ō rātou ringa ki ngā tūroro, ā, ka ora.”

Ka Tangohia ake a Īhu ki te Rangi

¹⁹ Nā, i te mutu­nga o tāna kōrero ki a rātou, ka tango­hia atu te Ariki a Īhu ki te rangi, ā, noho ana ki te ringa matau o te Atua.

²⁰ Nā, haere ana rātou, kauwhau ana i ngā wāhi katoa, me te mahi tahi anō te Ariki me rātou, me te whakaū i te kupu ki ngā tohu e whai ana i muri. Āmine.