Korohe 4 - Te Kawenata Hou

¹ E ngā ranga­tira, hoatu ki ngā pono­nga te mea e tika ana, te mea e rite ana; e mōhio ana hoki koutou he Rangatira tō koutou kei te rangi.

He Tohutohu

² Kia ū ki te īnoi, kia mata­ara tonu ki taua mea i runga i te whaka­whetai;

³ me te īnoi anō mō mātou, kia whaka­puare­tia e te Atua he kūwaha kōrero ki a mātou, hei kōrero­tanga i te mea ngaro a te Karaiti i hereherea ai ahau.

⁴ Kia whaka­kitea atu ai e ahau, kia rite ai tāku kōrero ki te mea i tika.

⁵ Hei runga i te whaka­aro mōhio tō koutou whaka­haere ki te hunga o waho, hokona te tāima.

⁶ Hei runga i te aroha noa tā koutou kōrero i ngā wā katoa, he mea kīnaki ki te tote, kia mātau ai koutou ki te tikanga mō te whaka­hoki kupu atu ki tēnei tangata, ki tēnei tangata.

Poroporoaki

⁷ Mā Tikiku e whaka­atu āku mea katoa ki a koutou; he teina aroha ia, he minita pono, he hoa pono­nga i roto i te Ariki.

⁸ Ko te tino pūtake tēnei i tonoa atu ai ia e ahau ki a koutou, kia mātau ai koutou ki tō mātou āhua, ā, kia whaka­mārie­tia ai ō koutou ngākau;

⁹ rāua ko Onehimu, he teina pono, e aroha­ina ana, ā, nō koutou hoki ia. Mā rāua e whaka­atu ki a koutou ngā mahi katoa o konei.

¹⁰ He oha tēnei ki a koutou nā Aritaku, nā tōku hoa here­here, rāua ko Māka irā­mutu o Pānapa; kua tae atu nā hoki ngā tikanga mōna ki a koutou; ki te tae atu ia ki a koutou, manaaki­tia;

¹¹ me Īhu anō hoki, tētahi ingoa ōna ko Hutuha; nō te kotinga rātou. Ko ēnei anake ōku hoa mahi ki te ranga­tira­tanga o te Atua, he oranga ngākau anō rātou ki ahau.

¹² Tēnei te oha atu nei ki a koutou a Epapara; nō koutou ia, he pono­nga nā te Karaiti. He tohe tonu tāna ki te īnoi mō koutou, kia tū koutou, he hunga tino tika, pūmau tonu ki ngā mea katoa i pai ai te Atua.

¹³ Ko ahau hoki tōna pono mō tāna mahi nui mō koutou, mō te hunga hoki i Raorikia, ā, mō te hunga i Hierapori.

¹⁴ Tēnei te oha atu nei ki a koutou a Ruka, te rata aroha, rāua ko Rīmaha.

¹⁵ Oha atu ki ngā tēina i Raorikia, ki a Naimapa hoki, ki te hāhi anō hoki i tō rātou whare.

¹⁶ Ā, ka kōrero­tia tēnei puka­puka ki a koutou, meinga kia kōrero­tia anō hoki i roto i te hāhi o ngā Raorikia; kōrero­tia anō hoki e koutou tērā i tuhia mai i Raorikia.

¹⁷ Mea atu hoki ki a Arakipu, “Kia mahara ki te mahi minita kua riro nā i a koe i roto i te Ariki, kia āta mahia mārie­tia.”

¹⁸ Ko te oha āku, a Paora, nā tōku ringa­ringa ake. Kia mahara ki ōku meka­meka. Kia tau te aroha noa ki a koutou.