Hoani 19 - Te Kawenata Hou

¹ Kātahi, ka mau a Pirato ki a Īhu, ka whiu i a ia.

² Ā, ka whiria e ngā hōia he karauna tā­tarā­moa, pōtaea ana ki tōna māte­nga, whaka­kākahu­ria ana hoki ia ki te kahu pāpura.

³ Nā, ka mea rātou, “Tēnā koe, e te Kīngi o ngā Hūrai!” Ā, pākia ana ia ki ō rātou ringa.

⁴ Ka haere anō a Pirato, ka mea ki a rātou, “Nā, tēnei te āra­hina atu nei ia e ahau ki a koutou, kia mōhio ai koutou, kāhore rawa i mau i ahau tētahi hē ōna.”

⁵ Nā, ka puta a Īhu ki waho, me te karauna tā­tarā­moa i runga i a ia, me te kākahu pāpura. Ka mea a Pirato ki a rātou, “Nā, te tangata nei!”

⁶ Ā, nō te kite­nga o ngā tohu­nga nui rātou ko ngā kātipa i a ia, ka karanga rātou, ka mea, “Rīpekatia, rīpeka­tia.” Ka kī a Pirato ki a rātou, “Tango­hia atu ia e koutou, rīpeka­tia; kāhore hoki i mau i ahau tētahi hē ōna.”

⁷ Ka whaka­hokia e ngā Hūrai ki a ia, “He ture tō mātou, ā, ki tō mātou ture he mea tika kia mate ia, mōna i mea ko te Tama ia a te Atua.”

⁸ Nō te rongo­nga o Pirato i tēnei kī, nui rawa tōna wehi;

⁹ ka tomo anō ia ki te whare whaka­wā, ka mea ki a Īhu, “Nō hea koe?” Heoi, kāhore a Īhu kupu whaka­hoki ki a ia.

¹⁰ Nā, ka mea a Pirato ki a ia, “E kore koe e kōrero ki ahau? Kāhore koe e mōhio kei ahau te tikanga mō te rīpeka i a koe, kei ahau anō te tikanga mō te tuku i a koe kia haere?”

¹¹ Ka whaka­hokia e Īhu, “Kāhore āu tikanga ki ahau, me kāhore i hōmai ki a koe i runga. Koia i nui rawa ai te hara o te kai­tuku i ahau ki a koe.”

¹² Nā, i reira anō ka whai a Pirato kia tukua ia kia haere; otiia, ka karanga ngā Hūrai, ka mea, “Ki te tukua tēnei e koe, ehara koe i te hoa nō Hīhā. Ki te whaka­kīngi tētahi tangata i a ia, he whaka­kāhore tāna i a Hīhā.”

¹³ Ā, nō ka rongo a Pirato i tēnei kōrero, ka āra­hina e ia a Īhu ki waho, ā, noho ana ki runga ki te nohoa­nga whaka­wā, ki te wāhi e kīa nei ko te Whā­riki Kōhatu, ki te reo Hiperu, ko Kapata.

¹⁴ Ko te taka­nga ia o te Kape­nga, i tata pū ki te ono o ngā hāora. Ka mea ia ki ngā Hūrai, “Nā, tō koutou Kīngi!”

¹⁵ Nā, ko tā rātou karanga­tanga, “Whaka­matea, whaka­matea, rīpeka­tia!” Ka mea a Pirato ki a rātou, “Kia rīpeka koia ahau i tō koutou Kīngi?” Ka whaka­hokia e ngā tohu­nga nui, “Kāhore ō mātou kīngi, ko Hīhā anake.”

¹⁶ Nō reira, ka hoatu ia e ia ki a rātou kia rīpeka­tia. Ā, ka mau rātou ki a Īhu.

Ka Rīpekatia a Īhu

¹⁷ Ā, amo ana ia i tōna rīpeka, haere ana ki te wāhi e kīa nei ko te wāhi o te anga­anga, tōna ingoa ki te reo Hiperu, ko “Korokota.”

¹⁸ Nā, rīpeka­tia ana ia e rātou ki reira, ā, ia me ētahi atu toko­rua, kotahi ki tētahi taha, kotahi ki tētahi taha, ko Īhu ki waenga­nui.

¹⁹ Nā, tuhi­tuhia ana e Pirato tētahi ingoa, whaka­piri­tia ana ki te rīpeka. Ko te tuhi­tuhi tēnei, “Ko Īhu o Nahareta ko te Kīngi o ngā Hūrai.”

²⁰ Ā, he toko­maha ngā Hūrai i kite i tēnei ingoa; i tata hoki ki te pā te wāhi i rīpeka­tia ai a Īhu; ā, i tuhi­tuhia taua mea ki te reo Hiperu, ki te reo Kariki, ki te reo Roma.

²¹ Nā, ka mea ngā tohu­nga nui o ngā Hūrai ki a Pirato, “Aua e tuhi­tuhia, ‘Ko te Kīngi o ngā Hūrai,’ engari, ‘Nāna i mea, Ko te Kīngi ahau o ngā Hūrai.’ ”

²² Ka whaka­hokia e Pirato, “Ko tāku i tuhi­tuhi ai kua tuhi­tuhia.”

²³ Ā, ka oti a Īhu te rīpeka e ngā hōia, ka mau rātou ki ōna kākahu, wehea ake kia whā ngā wāhi, ki ia hōia he wāhi; me te koti anō. Nā, kāhore he tui o te koti, he mea whatu iho i runga ā puta noa.

²⁴ Nā, ka mea rātou tētahi ki tētahi, “Kaua e haea e tātou, engari, me maka ki te rota kia kitea ai, mō wai rānei.” Nā, ka rite te karaipi­ture e mea nei: “I wehe­wehea ōku kākahu mō rātou, i maka rota hoki mō tōku weru­weru.” Ko tā ngā hōia tēnei i mea ai.

²⁵ Nā, i te taha o te rīpeka o Īhu tōna whaea e tū ana, rātou ko te teina o tōna whaea, ko Meri wahine a Kereopa, ko Meri Makarini.

²⁶ Ā, nō te kite­nga o Īhu i tōna whaea, i te ākonga hoki i aroha ai ia e tū tahi ana, ka mea ia ki tōna whaea, “E tai, Nana, tāu tama!”

²⁷ Kātahi, ia ka mea ki taua ākonga, “Nā, tōu whaea!” Ā, nō taua hāora ka mau taua ākonga i a ia ki tōna whare.

Te Matenga o Īhu

²⁸ Muri iho i tēnei ka mōhio a Īhu ka oti ngā mea katoa, nā, ka mea ia, hei whaka­rite­nga mō te karaipi­ture, “He mate­wai tōku.”

²⁹ Nā, tērā e tū rā tētahi oko, kī tonu i te winika; ā, ka whaka­kīa e rātou tētahi hau­tai ki te winika, whaka­noho­ia ana ki runga ki te hihopa, hoatu ana ki tōna māngai.

³⁰ Ā, nō te inu­manga o Īhu i te winika, ka mea ia, “Kua oti.” Nā, ka tuohu tōna māte­nga, tukua ana tōna wairua.

Ka Werohia te Kaokao o Īhu

³¹ Nā, i mea ngā Hūrai kia kaua e mau ngā tinana ki te rīpeka i te hāpati, ko te Taka­nga hoki tērā, he rā nui hoki taua hāpati, ka mea rātou ki a Pirato kia whatia ō rātou wae­wae, kia tango­hia atu hoki.

³² Nā, ka haere ngā hōia, ka whawhati i ngā wae­wae o tō mua, me o tērā i rīpeka­tia ngā­tahi­tia me ia.

³³ I tō rātou taenga ia ki a Īhu, ka kite kua mate noa ake ia, kīhai i whatia e rātou ōna wae­wae.

³⁴ Engari, i wero­hia tōna kao­kao e tētahi o ngā hōia ki te mātia, ā, puta tonu he toto, he wai.

³⁵ Ā, ko te tangata i kite, ko ia anō te kai­whaka­atu, ā, he pono tāna whaka­atu; e mōhio ana ia he kōrero pono tāna, he mea rā kia whaka­pono ai koutou.

³⁶ I meatia hoki ēnei mea, kia rite ai te karaipi­ture, “E kore tētahi iwi ōna e whatia.”

³⁷ E mea ana anō tētahi atu karaipi­ture, “Ka ti­tiro rātou ki tā rātou i wero ai.”

Te Tanumanga o Īhu

³⁸ Muri iho i ēnei mea, ka īnoi a Hōhepa o Arimatia ki a Pirato kia tango­hia e ia te tinana o Īhu. (He ākonga ia nā Īhu, otiia, he mea huna i te wehi ki ngā Hūrai.) Ā, whaka­ae ana a Pirato. Nō, ka haere ia, ka tango i te tinana o Īhu.

³⁹ I haere mai anō a Nikorima, tērā i haere rā i mua ki a Īhu i te pō, me te mau mai anō i te maira, i te aroe, he mea whaka­nanu, kia kotahi pea rau pāuna.

⁴⁰ Nā, ka tango rāua i te tinana o Īhu, takaia ana ki ngā kākahu rīnena me ngā mea kakara, ko tā ngā Hūrai rite­nga hoki tērā mō te tanu.

⁴¹ Nā, he kāri kei te wāhi i rīpeka­tia ai ia; i roto anō i taua kāri tētahi urupā hou, he mea kāhore anō i takoto­ria noatia e tētahi.

⁴² Nā, ka whaka­takoto­ria a Īhu e rāua ki reira, nō te mea he rā Taka­nga tērā nō ngā Hūrai; he tata hoki te urupā.