Hoani 17 - Te Kawenata Hou

Ka Īnoi a Īhu mō Āna Ākonga

¹ Ka kōrero­tia ēnei mea e Īhu, nā, ka anga ake ōna kanohi ki te rangi, ka mea, “E Pā, kua taea te hāora; whaka­korōria­tia tāu Tama, kia whaka­korōria­tia ai anō hoki koe e tāu Tama.

² Kua tukua mai nei hoki e koe ki a ia ngā tikanga mō ngā kiko­kiko katoa, kia hoatu e ia te ora tonu ki te hunga katoa kua hōmai nei e koe ki a ia.

³ Ko te ora tonu hoki tēnei, kia mātau rātou ki a koe, ko koe anake te Atua pono, ki a Īhu Karaiti anō hoki i tonoa mai nei e koe.

⁴ Kua whaka­korōria­tia koe e ahau i runga i te whenua; ka oti i ahau te mahi i hōmai e koe kia mahia e ahau.

⁵ Nā, kia whai korōria ahau āia­nei i a koe ake, e Pā, hei te korōria i whi­whi ai ahau i a koe i mua atu o te ao.

⁶ “Kua whaka­pua­kina e ahau tōu ingoa ki ngā tāngata i hōmai nei e koe ki ahau i roto i te ao. Nōu rātou, nāu anō hoki rātou i hōmai ki ahau, ā, kua puri­tia e rātou tāu kupu.

⁷ Kātahi rātou ka mātau nāu ngā mea katoa i hōmai nei e koe ki ahau.

⁸ Nō te mea kua hoatu e ahau ki a rātou ngā kupu i hōmai nei e koe ki ahau; ā, kua tango rātou, kua tino mātau anō, i haere mai ahau i a koe, kua whaka­pono rātou, nāu ahau i tono mai.

⁹ “Mō rātou tāku īnoi; kāhore āku īnoi mō te ao, engari, mō āu i hōmai ai ki ahau; nāu hoki rātou.

¹⁰ Ko āku mea katoa nāu, nāku hoki āu; ā, ka whai korōria ahau i a rātou.

¹¹ Nā, heoi anō tōku noho ki te ao; kei te ao nei anō ēnei, ko ahau ia ka haere atu ki a koe. E te Matua tapu, puri­tia i runga i tōu ingoa te hunga kua hōmai nei e koe ki ahau, kia kotahi ai rātou, me tāua nei.

¹² I ahau anō e noho ana i a rātou i te ao, i puri­tia rātou e ahau i runga i tōu ingoa. Kua tiaki­na e ahau āu i hōmai ai ki ahau, ā, kāhore tētahi o rātou i ngaro, ko te tama anake o te ngaro­manga; kia rite ai te karaipi­ture.

¹³ Nā, ka haere atu nei ahau ki a koe, ā, e kōrero­tia ana e ahau ēnei mea i te ao nei, kia tino nui ai tōku koa i roto i a rātou.

¹⁴ Kua hoatu e ahau tāu kupu ki a rātou; e kino ana hoki te ao ki a rātou, nō te mea ehara rātou i te ao, me ahau hoki ehara i te ao.

¹⁵ Kāhore āku īnoi kia tango­hia atu rātou e koe i te ao, engari, kia tiaki­na rātou e koe kei kino.

¹⁶ Ehara rātou i te ao, me ahau hoki ehara i te ao.

¹⁷ Whaka­tapua rātou e koe i runga i tōu pono; ko tāu kupu te pono.

¹⁸ Nāu ahau i tono mai ki te ao, he pēnā anō tāku tono i a rātou ki te ao.

¹⁹ He whaka­aro hoki ki a rātou i whaka­tapu ai ahau i ahau, kia tapu ai hoki rātou i te pono.

²⁰ “Ehara tāku i te īnoi mō ēnei anake, engari, mō te hunga e meinga e tā rātou kupu kia whaka­pono ki ahau.

²¹ Kia kotahi ai rātou katoa; me koe hoki, e Pā, i roto i ahau, me ahau anō i roto i a koe, kia kotahi ai hoki rātou i roto i a tāua; kia whaka­pono ai te ao, nāu ahau i tono mai.

²² Kua hoatu anō e ahau ki a rātou te korōria i hōmai e koe ki ahau; kia kotahi ai rātou, me tāua nei hoki he kotahi.

²³ Ko ahau i roto i a rātou, ko koe hoki i roto i ahau, kia tino tutuki ai rātou ki te kotahi­tanga; kia mōhio ai anō te ao, nāu ahau i tono mai, he rite hoki tōu aroha ki a rātou ki tōu aroha ki ahau.

²⁴ “E Pā, e mea ana ahau kia noho tahi ki ahau, ki te wāhi e noho ai ahau, āu i hōmai ai ki ahau; kia kite ai rātou i tōku korōria kua hōmai nei e koe ki ahau; nō mua atu hoki i te hanga­nga o te ao tōu aroha ki ahau.

²⁵ E te Matua tika, ahakoa te ao tē mōhio ki a koe, e mōhio ana ahau ki a koe, ā, kua mōhio anō ēnei, nāu ahau i tono mai.

²⁶ Kua whaka­pua­kina anō tōu ingoa e ahau ki a rātou, ā, ka whaka­pua­kina anō; kia mau ai i roto i a rātou te aroha i aroha­ina ai ahau e koe, me ahau anō i roto i a rātou.”