Hoani 16 - Te Kawenata Hou

¹ “Kua kōrero­tia e ahau ēnei mea ki a koutou, kei hē koutou.

² Ka peia atu koutou i roto i ngā whare kara­kia; ā, meāke puta te wā e mea ai te kai­whaka­mate i a koutou, he mahi pai tāna ki te Atua.

³ Nā, e meatia ēnei mea, nō te mea kāhore rātou i mōhio ki te Matua, kāhore hoki ki ahau.

⁴ Otiia, kua kōrero­tia ēnei mea e ahau ki a koutou, mō te puta rawa mai o taua wā, ka mahara koutou ki aua mea, he mea kōrero nāku ki a koutou. “Nā, kīhai ēnei mea i kōrero­tia e ahau ki a koutou i te tīma­tanga, nō te mea e noho ana ahau i a koutou.

Ngā Mahi a te Wairua Tapu

⁵ Nā, e haere ana tēnei ahau ki tōku kai­tono mai; ā, kāhore tētahi o koutou i ui mai ki ahau, ‘Ko hea koe?’

⁶ Otirā, i tāku kōrero­tanga i ēnei mea ki a koutou, ka kī ō koutou ngākau i te pōuri.

⁷ He pono ia tāku kōrero ki a koutou; nui atu te pai mō koutou ki te haere ahau; ki te kāhore hoki ahau e haere, e kore te Kai­whaka­mārie e tae mai ki a koutou; ā, ki te haere ahau, māku ia e tono mai ki a koutou.

⁸ Nā, ka tae mai ia, māna e whaka­atu ki te ao te hara, te tika, me te whaka­wā.

⁹ Te hara, mō rātou kāhore e whaka­pono ki ahau;

¹⁰ te tika, nō te mea e haere ana ahau ki tōku Matua, ā, heoi anō tō koutou kite­nga i ahau;

¹¹ te whaka­wā, nō te mea kua whaka­tikaia te whaka­wā mō te ranga­tira o tēnei ao.

¹² “He maha atu anō ngā mea hei kōrero māku ki a koutou, otirā, e kore e taea e koutou te mau āia­nei.

¹³ Otirā, kia tae mai ia, te Wairua o te pono, māna koutou e ārahi ki te pono katoa; ehara hoki tāna i te kōrero nāna ake; engari, ka kōrero­tia e ia ngā mea e rongo ai ia; māna hoki e whaka­kite ki a koutou ngā mea e puta mai ana.

¹⁴ Ka whaka­korōria­tia ahau e ia; ka tango hoki ia i āku mea, ā, ka whaka­atu­ria ki a koutou.

¹⁵ Ko ngā mea katoa a te Matua, nāku. Koia ahau i mea ai, ka tango­hia e ia āku mea, ā, ka whaka­atu­ria ki a koutou.”

Te Pōuritanga me te Hari

¹⁶ “Taro ake, ā, e kore koutou e kite anō i ahau; ā, taro ake anō, ka kite koutou i ahau, nō te mea ka haere ahau ki te Matua.”

¹⁷ Nā, ka mea ētahi o āna ākonga tētahi ki tētahi, “He aha tēnei e mea nei ia ki a tātou, ‘Taro ake, ā, e kore koutou e kite i ahau; ā, taro ake anō, ka kite koutou i ahau’; me tēnei, ‘Nō te mea e haere ana ahau ki te Matua’?”

¹⁸ Nā, ka mea rātou, “He aha tēnei e mea nei ia, ‘Taro ake?’ E kore tātou e mātau ki tāna e mea nei.”

¹⁹ Ā, i mōhio a Īhu e hia­hia ana rātou ki te ui ki a ia, ka mea ki a rātou, “E rapu ana koutou ki a koutou anō ki tāku i mea rā, ‘Taro ake, ā, e kore koutou e kite i ahau; ā, taro ake anō ka kite koutou i ahau’?

²⁰ He pono, he pono tāku e mea nei ki a koutou, Ka tangi koutou, ka auē, ko te ao ia ka hari; e pōuri anō koutou, otirā ka meinga tō koutou pōuri hei hari.

²¹ I te mea ka whaka­mamae te wahine, ka pōuri, nō te mea ka tae tōna wā. Ka whānau tāna tama­iti, heoi anō, mahara ki te mamae, i te hari hoki, nō te mea ka whānau he tangata ki te ao.

²² Nā, tēnei koutou te pōuri nei; e kite anō ia ahau i a koutou, ā, ka hari ō koutou ngākau, e kore hoki e tango­hia i a koutou tō koutou hari e tētahi.

²³ “Nā, ā taua rā e kore koutou e ui ki tētahi mea i ahau. He pono, he pono tāku e mea nei ki a koutou, ko ā koutou e īnoi ai ki te Matua i runga i tōku ingoa, e hoatu e ia ki a koutou.

²⁴ Kāhore anō i īnoia noatia e koutou tētahi mea i runga i tōku ingoa. Īnoia, ā, ka whi­whi koutou, kia tino nui ai tō koutou koa.

Te Wikitōria ki te Ao

²⁵ “He mea whaka­rite tāku kōrero i ēnei mea ki a koutou. Otiia, meāke puta te wā e kore ai ahau e kōrero kupu whaka­rite ki a koutou, engari, ka mārama tonu tāku kōrero ki a koutou mō te Matua.

²⁶ Ā taua rā, ka īnoi koutou i runga i tōku ingoa; ā, e kore ahau e mea ki a koutou e īnoi ahau ki te Matua mō koutou.

²⁷ E aroha ana hoki te Matua ake anō ki a koutou, mō koutou i aroha ki ahau, i whaka­pono hoki i haere mai ahau i te Matua.

²⁸ I haere mai ahau i te Matua, ā, kua tae mai nei ki te ao; ka mahue anō i ahau te ao, ā, ka haere ki te Matua.”

²⁹ Ka mea āna ākonga ki a ia, “Nā, kua mārama tāu kōrero, ehara tāu kōrero i te kupu whaka­rite.

³⁰ Kātahi mātou ka mōhio, tēnei koe te mōhio nei ki ngā mea katoa, e kore anō e mea mā tētahi e ui ki a koe; nā konei mātou i whaka­pono ai i haere mai koe i te Atua.”

³¹ Ka whaka­hokia e Īhu ki a rātou, “Kātahi koutou ka whaka­pono?

³² Nā, meāke puta te wā, ā, kua puta nei anō, e whaka­marara­tia ai koutou ki tōna wāhi, ki tōna wāhi, ā, ka waiho ko ahau anake. Otiia, he teka ko ahau anake, nō te mea kei ahau nei te Matua.

³³ Kua kōrero­tia e ahau ēnei mea ki a koutou, kia whai mārie­tanga ai koutou i roto i ahau. Ko tā koutou i te ao nei, he mamate. Otirā kia māia; kua taea e ahau te ao!”