Hoani 15 - Te Kawenata Hou

Ko Īhu te Wāina Pono

¹ “Ko ahau te wāina pono, ko tōku Matua te kai­mahi.

² Ko ngā manga katoa i roto i ahau e kore e whai hua, e tango­hia e ia. Ko ngā mea katoa hoki e whai hua ana, ka whaka­paia e ia, kia maha atu ai ōna hua.

³ Nā, kua mā tēnei koutou i te kupu i kōrero­tia e ahau ki a koutou.

⁴ Kia ū koutou ki roto ki ahau, me ahau hoki ki roto ki a koutou. Ka rite hoki ki te manga e kore e whai hua ko ia anake, ki te kāhore e ū ki te wāina; e kore anō hoki koutou, ki te kore e ū ki roto ki ahau.

⁵ “Ko ahau te wāina, ko koutou ngā manga. Ki te ū tētahi ki roto ki ahau, me ahau hoki ki roto ki a ia, ka maha o tērā hua; ki te motu kē hoki i ahau, e kore tētahi mea e taea e koutou.

⁶ Ki te kore e ū tētahi ki roto ki ahau, ka makā atu ia, ānō he manga, ā, ka maroke; nā, ka kohiko­hia, ka makā ki te kāpura, ka tahuna.

⁷ Ki te ū koutou ki roto ki ahau, ki te ū anō āku kupu ki roto ki a koutou, īnoia e koutou tā koutou e pai ai, ā, ka meatia mā koutou.

⁸ Ka whaka­korōria­tia tōku Matua ki te pēnei, ki te whai hua maha koutou, ā, ka meinga koutou he ākonga nāku.

⁹ Rite tonu ki tō te Matua aroha ki ahau tōku aroha ki a koutou; kia ū ki tōku aroha.

¹⁰ Ki te pupuri koutou i āku ture, ka ū koutou ki tōku aroha; me ahau hoki kua pupuri nei i ngā ture a tōku Matua, ka ū nei ki tōna aroha.

¹¹ “Kua kōrero­tia ēnei mea e ahau ki a koutou, kia pūmau ai tōku koa i roto i a koutou, kia tino kī ai tō koutou koa.

¹² Ko tāku ture tēnei, kia aroha koutou tētahi ki tētahi, me ahau hoki kua aroha nei ki a koutou.

¹³ Kāhore he aroha o tētahi i rahi ake i tēnei, arā, kia tuku te tangata i a ia anō kia mate mō ōna hoa.

¹⁴ Ko koutou ōku hoa, ki te meatia e koutou āku e whaka­hau nei ki a koutou.

¹⁵ Heoi anō tāku mea­tanga he pono­nga koutou; e kore hoki te pono­nga e mōhio ki tā tōna ariki e mea ai; engari, kua oti koutou te hua e ahau he hoa; ko āku mea katoa hoki i rongo ai ahau ki tōku Matua, kua oti te whaka­kite e ahau ki a koutou.

¹⁶ Kāhore koutou i whiri­whiri i ahau, engari, nāku koutou i whiri­whiri, nāku anō koutou i mea kia haere, kia whai hua, kia mau tonu hoki ō koutou hua; ā, ko tā koutou e īnoi ai ki te Matua i runga i tōku ingoa, ka hoatu e ia ki a koutou.

¹⁷ Ko āku whaka­hau ēnei ki a koutou, kia aroha koutou tētahi ki tētahi.”

Ko te Kino o te Ao

¹⁸ “Ki te mea e kino­ngia ana koutou e te ao, e mōhio ana koutou i kino­ngia ahau i mua i a koutou.

¹⁹ Me­he­mea nō te ao koutou, e aroha­ina e te ao ōna. Tēnā ko tēnei ehara nei koutou i te ao, nāku koutou i whiri­whiri i roto i te ao, koia te ao ka kino ai ki a koutou.

²⁰ Kia mahara ki te kupu i kōrero ai ahau ki a koutou, kāhore te pono­nga e rahi ake i tōna ariki. Ki te mea i whaka­toia ahau e rātou, ka whaka­toia anō koutou; ki te mea i pupuri rātou i tāku kupu, ka pupuri anō rātou i tā koutou.

²¹ Otirā, e meatia katoa­tia ēnei mea e rātou ki a koutou he whaka­aro ki tōku ingoa, nō te mea kāhore rātou i mōhio ki tōku kai­tono mai.

²² Me i kaua ahau te haere mai, te kōrero ki a rātou, pēnei kāhore ō rātou hara. Tēnā ko tēnei kāhore ō rātou whaka­ora­ora mō tō rātou hara.

²³ Ko te tangata e whaka­kino ana ki ahau, e whaka­kino ana hoki ki tōku Matua.

²⁴ Me i kaua te mahia e ahau i roto i a rātou ngā mahi kāhore i mahia e tētahi atu, pēnei kāhore ō rātou hara. Tēnā ko tēnei kua kite rātou, kua whaka­kino anō hoki ki a māua tahi ko tōku Matua.

²⁵ Mā tēnei ia ka rite ai te kupu i tuhi­tuhia ki tā rātou ture, ‘Kua kino noa rātou ki ahau.’

²⁶ “Otiia, ka tae mai te Kai­whaka­mārie e tonoa mai e ahau ki a koutou i te Matua, te Wairua o te pono, e puta mai ana i te Matua, ko ia hei kai­whaka­atu mōku.

²⁷ Ko koutou anō hoki hei kai­whaka­atu, nō te mea i ahau koutou nō te tīma­tanga iho rā anō.”