Hoani 14 - Te Kawenata Hou

Ko Īhu te Huarahi ki te Matua

¹ “Kei pōuri ō koutou ngākau; e whaka­pono ana koutou ki te Atua, whaka­pono hoki ki ahau.

² He maha ngā nohoa­nga i roto i te whare o tōku Matua; me he kāhore, kua kōrero­tia e ahau ki a koutou. Ka haere hoki ahau ki te mea i tētahi wāhi hei tuku­nga ake mō koutou.

³ Ā, ki te haere ahau ki te mea wāhi hei tuku­nga ake mō koutou, ka haere mai anō ahau, ā, ka tango i a koutou ki ahau; kia noho ai hoki koutou ki te wāhi e noho ai ahau.

⁴ Nā, e mātau ana koutou ki te hua­rahi ki te wāhi e haere atu nei ahau.”

⁵ Nā, ka mea a Tamati ki a ia, “E te Ariki, kāhore mātou e mātau ki te wāhi e haere nā koe; me pēhea ka mātau ai mātou ki te hua­rahi?”

⁶ Ka mea a Īhu ki a ia, “Ko ahau te hua­rahi, te pono, te ora; e kore rawa tētahi tangata e haere ake ki te Matua, ki te kāhore ahau.

⁷ Me i mātau koutou ki ahau, kua mātau anō ki tōku Matua. Nā i ēnei ake wā ka mōhio koutou ki a ia, kua kite anō hoki i a ia.”

⁸ Ka mea a Piripi ki a ia, “E te Ariki, whaka­kitea te Matua ki a mātou, ā, ka tatū ō mātou ngākau.”

⁹ Ka mea a Īhu ki a ia, “Roa noa atu tōku noho ki a koutou, ā, kāhore anō koe i mātau noa ki ahau, e Piripi? Ko ia kua kite i ahau kua kite hoki i te Matua; he aha koe ka mea ai, ‘Whaka­kitea mai te Matua ki a mātou?’

¹⁰ E kore ianei koe e whaka­pono, ko ahau kei roto i te Matua, ko te Matua kei roto i ahau? Ko ngā kupu e kōrero nei ahau ki a koutou, ehara i te kōrero nāku ake; engari, nā te Matua e noho ana i roto i ahau, ko ia te mea ana i ngā mahi.

¹¹ Whaka­pono mai ki ahau, kei roto ahau i te Matua, ko te Matua hoki kei roto i ahau; ki te kāhore, whaka­aro ki ngā mahi, ka whaka­pono ai ki ahau.

¹² He pono, he pono tāku e mea atu nei ki a koutou, ki te whaka­pono tētahi ki ahau, ko ngā mahi e mea nei ahau, e meinga anō e ia; ā, nui atu i ēnei āna e mea ai; nō te mea e haere ana ahau ki tōku Matua.

¹³ Ā, ko tā koutou e īnoi ai i runga i tōku ingoa, e meatia tēnei e ahau, kia whai korōria ai te Matua i te Tama.

¹⁴ Ki te īnoia e koutou tētahi mea i ahau i runga i tōku ingoa, māku e whaka­mana.”

Te Whakaaria o te Wairua Tapu

¹⁵ “Ki te aroha koutou ki ahau, kia mau ki āku ture.

¹⁶ Ka īnoi ahau ki te Matua, ā, māna e hoatu ki a koutou tētahi atu Kai­whaka­mārie, hei noho tonu ki a koutou.

¹⁷ Ko te Wairua o te pono; e kore nei e riro i te ao, nō te mea e kore e kite i a ia, e kore anō e mātau ki a ia. Kei a koutou hoki ia e noho ana, ā, ka noho anō i roto i a koutou.

¹⁸ “E kore koutou e waiho pani e ahau. E haere mai anō ahau ki a koutou.

¹⁹ Taro ake, ā, heoi anō kite­nga o te ao i ahau; ko koutou ia e kite i ahau; e ora ana ahau, ka ora anō koutou.

²⁰ Ā taua rā koutou mātau ai kei roto ahau i tōku Matua, ko koutou anō kei roto i ahau, me ahau hoki kei roto i a koutou.

²¹ “Ko te tangata kei a ia nei āku ture, e puri­tia ana hoki e ia, ko ia te aroha ana ki ahau: ki te aroha tētahi ki ahau, ka aroha­ina ia e tōku Matua, ā, ka aroha ahau ki a ia, ka whaka­atu i ahau ki a ia.”

²² Ka mea a Hūrā ki a ia (hāunga a Ikariote) “E te Ariki, he pēhea i whaka­atu ai koe i a koe ki a mātou, ā, kāhore ki te ao?”

²³ Ka whaka­hoki a Īhu, ka mea ki a ia, “Ki te aroha tētahi ki ahau, e puri­tia e ia tāku kupu, ā, ka aroha­ina ia e tōku Matua, ka haere atu māua ki a ia, ka noho tonu ki a ia.

²⁴ Ki te kāhore tētahi e aroha ki ahau, e kore e puri­tia e ia āku kupu. Nā, ehara i ahau ake te kupu e rongo nei koutou, engari, nā te Matua i tonoa mai ai ahau.

²⁵ “Kua kōrero­tia nei e ahau ēnei mea ki a koutou, i ahau e noho nei i a koutou.

²⁶ Nā, ko te kai­whaka­mārie, arā ko te Wairua Tapu, e tonoa mai e te Matua i runga i tōku ingoa, māna koutou e whaka­ako ki ngā mea katoa, māna koutou e whaka­mahara ki ngā mea katoa kua kōrero­tia nei e ahau ki a koutou.

²⁷ “He rangi­mārie tāku e waiho nei ki a koutou, tēnei tāku rangi­mārie te hoatu nei e ahau ki a koutou. E kore e rite ki tā te ao hoatu tāku hoatu ki a koutou. Kei pōuri ō koutou ngākau, kei mataku.

²⁸ Kua rongo nā koutou ki tāku i mea ai ki a koutou, ‘E haere ana ahau, ā, ka hoki mai anō ki a koutou.’ Me i aroha koutou ki ahau, kua hari koutou, nōku i mea, ‘E haere ana ahau ki te Matua.’ He nui ake hoki tōku Matua i ahau.

²⁹ Nā, kua kōrero nei ahau ki a koutou; i te mea kāhore anō i puta, mō te puta rawa mai, ka whaka­pono koutou.

³⁰ E kore e maha ake āku kōrero ki a koutou. E haere mai ana hoki te ariki o tēnei ao, kāhore hoki āna wāhi i roto i ahau;

³¹ otirā, kia mātau ai te ao, e aroha ana ahau ki te Matua; ko tā te Matua anō i whaka­hau mai ai ki ahau, ko tāku tēnā e mea nei. “Whaka­tika, ka haere atu tātou i konei.”