Hoani 10 - Te Kawenata Hou

Te Kupu Whakarite o te Hēpara

¹ “He pono, he pono tāku e mea nei ki a koutou, ki te kāhore tētahi e tomo rā te kūwaha ki te kāinga hipi, ki te piki kē, he tāhae ia, he tangata pāhua.

² Tēnā ko te tangata e tomo ana rā te kūwaha, ko te hēpara ia o ngā hipi.

³ Ka uaki te kai­tiaki tatau ki a ia; ka rongo anō ngā hipi ki tōna reo. Nā, ka karanga­tia e ia āna hipi ake, tō tēnei ingoa, tō tēnei ingoa, ka āra­hina ki waho.

⁴ Ā, ka oti āna ake hipi te tuku ki waho, ka haere ia i mua i a rātou, ka aru ngā hipi i a ia; e mātau ana hoki rātou ki tōna reo.

⁵ E kore ia rātou e aru i te tauhou, engari ka oma i a ia; e kore hoki e mātau ki te reo o ngā tauhou.”

⁶ I kōrero­tia tēnei kupu whaka­rite e Īhu ki a rātou; heoi, kīhai rātou i mōhio ki ngā mea i kōrero­tia e ia ki a rātou.

Ko Īhu te Hēpara Pai

⁷ Nā, ka mea anō a Īhu ki a rātou, “He pono, he pono tāku e mea nei ki a koutou, Ko ahau te tatau o ngā hipi.

⁸ He tāhae, he kai­pāhua te hunga katoa i haere mai i mua i ahau; heoi kīhai ngā hipi i whaka­rongo ki a rātou.

⁹ Ko ahau te tatau; ki te waiho ahau hei hua­rahi tomo­kanga mō tētahi, e ora ia, ā, ka haere ki roto, ka haere ki waho, ka kite hoki i te kai.

¹⁰ Heoi anō tā te tāhae e haere mai ai, he tāhae, he patu, he whaka­mōtī hoki. I haere mai ahau kia whi­whi ai rātou ki te ora, inā, tōna nui noa atu.

¹¹ “Ko ahau te hēpara pai, he hēpara pai, ka tuku i a ia anō kia mate mō ngā hipi.

¹² Tēnā ko te tangata e utua ana, ehara nei i te hēpara, ehara nei i a ia ngā hipi, i tōna kite­nga i te wuruhi e haere mai ana, whaka­rērea ake e ia ngā hipi, oma ana; nā, ka hopu­kia rātou e te wuruhi, ā, whaka­marara­tia ana ngā hipi.

¹³ Ka oma te tangata e utua ana, nō te mea e utua ana ia, kāhore hoki ōna whaka­aro ki ngā hipi.

¹⁴ Ko ahau te hēpara pai, e mātau ana hoki ki āku, ā, e mātau ana āku ki ahau.

¹⁵ Pērā tonu me tō te Matua mātau ki ahau, me tōku mātau hoki ki te Matua. E tuku ana hoki ahau i ahau ki te mate mō ngā hipi.

¹⁶ He hipi atu anō āku, ehara nei i tēnei kāinga. Me ārahi mai rātou e ahau, ā, ka rongo rātou ki tōku reo, ā, e whaka­kotahi­tia te kāhui, kotahi anō hoki hēpara.

¹⁷ “Koia te Matua ka aroha mai ai ki ahau, nō te mea e tuku ana ahau i ahau kia mate, kia whaka­ora ake ai anō ahau i ahau.

¹⁸ Ehara i te mea mā tētahi tangata ahau e whaka­mate, engari, māku anō ahau e tuku ki te mate. Kei ahau te tikanga mō te tuku atu, kei ahau anō te tikanga mō te whaka­ora. Nā tōku Matua tēnei ture kua riro mai nei i ahau.”

¹⁹ Kātahi, ka wehe­wehea ngā Hūrai, nā ēnei kupu.

²⁰ He toko­maha o rātou i mea, “He rēwera tōna, e hau­rangi ana; he aha koutou ka whaka­rongo ai ki a ia?”

²¹ Ko ētahi i mea, “Ehara ēnei i ngā kupu a te tangata e nohoia ana e te rēwera. E āhei koia i te rēwera te mea i ngā kanohi o ngā matapō kia kite?”

Ka Whakarērea a Īhu

²² Nā, i Hiruhārama tēnei, i te Hākari Horo­horo­nga. He hōtoke;

²³ ā, e hāere­ere ana a Īhu i te teme­para, i te whaka­mahau o Horomona.

²⁴ Nā, ka kara­potia ia e ngā Hūrai, ka mea rātou ki a ia, “Kia pēhea te roa o tāu waiho i ō mātou ngākau i hiki­rangi ana? Ki te mea ko te Karaiti koe, kōrero­tia mata­nui­tia mai ki a mātou.”

²⁵ Ka whaka­hoki a Īhu ki a rātou, “Kua kōrero­tia e ahau ki a koutou, ā, kāhore koutou e whaka­pono. Ko ngā mahi e mahi nei ahau i runga i te ingoa o tōku Matua, ko ēnei hei kai­whaka­atu mōku.

²⁶ Otirā, e kore koutou e whaka­pono, nō te mea ehara koutou i te hipi nāku.

²⁷ E rongo ana āku hipi ki tōku reo, e mātau ana ahau ki a rātou, e aru ana hoki rātou i ahau.

²⁸ E hoatu ana e ahau ki a rātou he ora tonu; e kore rātou e ngaro ake ake, e kore anō hoki tētahi e kapo atu i a rātou i roto i tōku ringa.

²⁹ Ko tōku Matua, nāna nei rātou i hōmai ki ahau, nui ake i te katoa; e kore anō rātou e taea e tētahi te kapo atu i roto i te ringa o tōku Matua.

³⁰ Ko ahau, ko te Matua, kotahi māua.”

³¹ Kātahi, ka mau anō ngā Hūrai ki te kōhatu hei āki ki a ia.

³² Ka whaka­hokia e Īhu ki a rātou, “He maha ngā mahi pai kua whaka­kitea nei e ahau ki a koutou, he mea nā tōku Matua. Mō tēhea o aua mahi ka ākina ai ahau e koutou?”

³³ Ka whaka­hoki ngā Hūrai ki a ia, ka mea, “Ehara te mahi pai i te mea e ākina ai koe; engari, mō te kohu­kohu, mō te mea hoki ko koe, tangata nei anō, e whaka­atua ana i a koe.”

³⁴ Ka whaka­hokia e Īhu ki a rātou, “Kāhore rānei i tuhi­tuhia i roto i tō koutou ture, ‘I mea ahau, “He atua koutou”?’

³⁵ Ki te huaina e ia he atua te hunga i tae mai nei te kupu a te Atua ki a rātou, ā, e kore hoki e taea te whaka­kāhore te karaipi­ture.

³⁶ E mea ana oti koutou ki tā te Matua i whaka­tapu ai, i tono mai ai hoki ki te ao, ‘E kohu­kohu ana koe’; nōku i mea, ‘Ko te Tama ahau a te Atua’?

³⁷ Ki te kore ahau e mahi i ngā mahi a tōku Matua, aua ahau e whaka­pono­hia.

³⁸ Tēnā, ki te mahi ahau, ahakoa kāhore koutou e whaka­pono ki ahau, whaka­pono­hia ngā mahi; kia mātau ai koutou kia whaka­pono ai, ko te Matua kei roto i ahau, me ahau hoki kei roto i a ia.”

³⁹ Nā, ka whai anō rātou kia hopu­kia ia; heoi, puta ana ia i ō rātou ringa.

⁴⁰ Nā, ka haere anō ia ki tāwāhi o Horano, ki te wāhi i mātua iri­iri ai a Hoani; ā, noho ana i reira.

⁴¹ Ā, toko­maha hoki i haere ki a ia; i mea rātou “Kīhai a Hoani i mahi i tētahi mere­kara; he pono ia ngā mea katoa i kōrero­tia e Hoani mō tēnei.”

⁴² Ā, he toko­maha o reira i whaka­pono ki a ia.