Epeha 4 - Te Kawenata Hou

Kotahitanga o te Tinana

¹ Koia ahau, tā te Ariki here­here, ka whaka­hau nei i a koutou kia rite tā koutou haere ki te karanga­tanga i karanga­tia ai koutou,

² kia pāpaku rawa te ngākau, kia māhaki, kia manawa­nui, kia āta hanga tētahi ki tētahi, i runga i te aroha;

³ me whai kia mau te kotahi­tanga o te Wairua, he mea pai­here nā te rangi­mārie.

⁴ Kotahi tonu te tinana, kotahi te Wairua, pērā hoki me tō koutou karanga­tanga, kotahi tonu te mea o tō koutou karanga­tanga hei tūmanako­tanga atu;

⁵ kotahi Ariki, kotahi whaka­pono, kotahi iri­iri,

⁶ kotahi Atua, ko te Matua o ngā mea katoa, kei runga nei ia i ngā mea katoa, puta noa ia i ngā mea katoa, kei roto hoki i te katoa.

⁷ Kua oti ia te aroha noa te hōmai ki tēnei, ki tēnei, o tātou, i runga i te mēhua o tā te Karaiti hōmai­tanga.

⁸ Nā reira hoki ia i mea ai: “I tōna kake­nga ki runga, whaka­raua ana e ia ngā whaka­rau, ā, hoatu mea ana ia mā ngā tāngata.”

⁹ Nā, ko tēnei, “I kake ia ki runga,” he aha, me­he­mea kāhore ia i mātua heke ki ngā wāhi o raro rawa o te whenua?

¹⁰ Tērā i heke rā, ko ia anō i kake atu nei ki runga ake i ngā rangi katoa, kia kī ai ngā mea katoa i a ia.

¹¹ Ā, hōmai ana e ia ko ētahi hei āpō­toro; ko ētahi hei poro­piti; ko ētahi hei kai­kauwhau i te rongo­pai; ko ētahi hei hēpara, hei kai­whaka­ako;

¹² kia tino rite ai te hunga tapu mō te mahi minita, mō te hanga i te whare, arā i te tinana o te Karaiti;

¹³ kia tae katoa rā anō tātou ki te kotahi­tanga o te whaka­pono, o te mātau­ranga hoki ki te Tama a te Atua, kia tino tangata, kia eke ki te mēhua o te tino kaumātua­tanga e tutuki ai ki tō te Karaiti.

¹⁴ Kia mutu ai tō tātou tama­riki­tanga, te ākina, te kāhaki­hakina e ngā hau katoa o te whaka­ako, he whaka­wiri­nga kē nā te tangata, he māminga, he whaka­pōhēhē.

¹⁵ Engari, kia kōrero pono ai i runga i te aroha, kia tupu ai tātou ki roto ki a ia i ngā mea katoa, ko te ūpoko nei ia, ko te Karaiti;

¹⁶ nōna nei te tinana katoa, he mea whaka­piri mārie, he mea āta hono e ngā mea­tanga a ngā hono­nga katoa, whaka­rite rawa ki te nui o te mahi­nga a ia wāhi, a ia wāhi, e mea ana i te tinana kia neke ake, hei whare e hanga ana i a ia i runga i te aroha.

Te Oranga Hou i roto i te Karaiti

¹⁷ Nā, ko tāku tēnei e kī nei, e whaka­atu nei i roto i te Ariki, kia kāti tā koutou haere pērā me ērā atu tauiwi, e haere nei i roto i te whaka­hīhī o tō rātou hine­ngaro,

¹⁸ kua oti nei te whaka­pōuri ō rātou whaka­aro, kua tangata kē ki tō te Atua ora, i te kūware o roto i a rātou, he pakeke hoki nō ō rātou ngākau.

¹⁹ Kāhore ō rātou oho­oho­nga, ā, tukua ana rātou e rātou anō ki te hia­hia tai­kaha; riro pū rātou ki te mahi i ngā mea poke katoa.

²⁰ Ko koutou ia kīhai i pērā tō koutou ako i a te Karaiti;

²¹ ki te mea kua rongo koutou ki a ia, kua whaka­akona e ia ki ngā mea e rite ana ki te pono i roto i a Īhu.

²² Kia whaka­rērea e koutou te tangata tawhito, he āhua nō tō koutou whaka­haere ō mua; he mea pirau nei hoki ia i runga i ngā hia­hia tini­hanga;

²³ kia whaka­hou­tia te wairua o tō koutou hine­ngaro;

²⁴ kia kākahu­ria iho hoki ki a koutou te tangata hou, nō tā te Atua nei te hanga­nga i runga i te tika, i te tapu o te pono.

²⁵ Heoi, whaka­rērea atu te teka; kia pono te kōrero ki tōna hoa, ki tōna hoa; he wāhi hoki tātou tētahi nō tētahi.

²⁶ “Kia riri, ā, kaua e hara”: kei toene te rā ki tō koutou riri,

²⁷ kaua hoki tētahi wāhi e tukua ki te rēwera.

²⁸ Ko te tangata tāhae, me whaka­mutu tāna tāhae; engari me mahi ko ōna ringa anō hei mahi i te mea pai, kia whai rawa ai ia hei hoatu­tanga māna ki te rawa­kore.

²⁹ Kei puta tētahi kupu kino i ō koutou māngai, engari hei te mea e tau ana hei hanga i te pai, kia whi­whi ai ki te pai ngā tāngata e rongo ana.

³⁰ Kaua hoki e whaka­pōuri­tia te Wairua Tapu o te Atua, nāna nei koutou i hīri mō te rā o te whaka­ora­nga.

³¹ Kia wehea rawa­tia atu i roto i a koutou te nana­kia, te riri, te ārita­rita, te nga­ngau, te kōrero kino, me te mauā­hara katoa;

³² kia ngā­wari tō koutou tikanga tētahi ki tētahi, kia pai te ngākau, me te hohou noa iho i te rongo tētahi ki tētahi, kia pērā anō me te Atua i hohou nei i te rongo ki a koutou i roto i a te Karaiti.