Epeha 1 - Te Kawenata Hou

He Mihi

¹ Nāku, nā Paora, i pai­ngia e te Atua hei āpō­toro mā Īhu Karaiti – Ki te hunga tapu e noho ana i Epeha, arā ki te hunga whaka­pono i roto i a Karaiti Īhu:

² Kia tau ki a koutou te aroha noa me te rangi­mārie, he mea nā te Atua, nā tō tātou Matua, nā te Ariki hoki, nā Īhu Karaiti.

Ngā Manaakitanga Wairua i roto i te Karaiti

³ Kia whaka­pai­ngia te Atua, te Matua o tō tātou Ariki, o Īhu Karaiti, nāna nei tātou i manaaki ki ngā manaaki katoa o te wairua ki ngā wāhi o te rangi, i roto i a te Karaiti;

⁴ i runga i te tikanga i whiri­whiria ai tātou e ia i roto i a ia i mua i te oroko­hanga­nga o te ao, hei hunga tapu, koha­kore i tōna aro­aro. I runga i te aroha

⁵ he mea whaka­rite hoki tātou nāna i mua, hei tama māna, i roto i a Īhu Karaiti, ko tā tōna whaka­aro hoki i pai ai,

⁶ hei whaka­moe­miti mō te korōria o tōna aroha noa, i ata­whai­tia ai tātou i roto i tāna i aroha ai.

⁷ Kei roto nei i a ia tō tātou whaka­ora­nga i runga i ōna toto, arā te muru­nga o ngā hē; he hua hoki nō tōna aroha noa,

⁸ i hira rawa nei ki a tātou i runga i ngā whaka­aro nui. I ngā whaka­aro mōhio katoa;

⁹ whaka­kitea mai ana hoki e ia ki a tātou tāna whaka­aro ngaro, tāna hoki i āhua­reka ai, tāna i whaka­takoto ai i mua i roto i a ia,

¹⁰ mō te tikanga ina rite ngā wā, kia hui­huia ngā mea katoa i roto i a te Karaiti, ngā mea i te rangi, me ngā mea i te whenua; i roto anō i a ia.

¹¹ I whaka­whiw­hia nei mātou i roto i a ia, he mea whaka­rite i mua i runga i tāna i whaka­takoto ai, e mahia ana hoki e ia ngā mea katoa i runga i tā tōna whaka­aro i pai ai;

¹² kia ai mātou hei whaka­moe­miti mō tōna korōria, arā mātou, te hunga kua tū­mana­ko wawe ki a te Karaiti.

¹³ Me koutou hoki tū­mana­ko ana anō koutou ki a ia, i tō koutou rongo­nga ki te kupu o te pono, ki te rongo­pai o tō koutou ora; ā, i tō koutou whaka­pono­tanga ki a ia, nā, hīri­tia ana koutou e te Wairua Tapu i kōrero­tia mai i mua;

¹⁴ hei taumau i ngā taonga mō tātou, kia whaka­ora­ngia rā anō tā te Atua mea i hokona, hei whaka­moe­miti mō tōna korōria!

Te Īnoi a Paora

¹⁵ Nā konei ahau, i tōku rongo­nga ki tō koutou whaka­pono ki te Ariki, ki a Īhu, ki te aroha anō hoki ki te hunga tapu katoa,

¹⁶ kāhore e mutu tāku whaka­whetai mō koutou, me te whaka­hua anō i a koutou i āku īnoi­nga;

¹⁷ kia hōmai ki a koutou e te Atua o tō tātou Ariki, o Īhu Karaiti, e te Matua o te korōria, te wairua o te whaka­aro nui, o te whaka­kite­nga i runga i te mōhio ki a ia.

¹⁸ Kia whaka­mārama­tia ngā kanohi o tō koutou hine­ngaro; kia mātau ai koutou ki te mea o tāna karanga e tūmanako­hia atu nei, ki te korōria nui hoki o tōna taonga i roto i te hunga tapu,

¹⁹ ki te nui whaka­hara­hara hoki o tōna kaha ki a tātou ki te hunga e whaka­pono nei, i runga i te mahi­nga a te mana o tōna kaha,

²⁰ i mahi ai ia i roto i a te Karaiti i tāna whaka­ara­hanga i a ia i te hunga mate, ā, whaka­noho­ia ana ia ki tōna matau, ki ngā wāhi i te rangi,

²¹ ki runga ake i ngā kāwana­tanga katoa, i te mana, i te kaha, i te ranga­tira­tanga, i ngā ingoa katoa hoki e whaka­hua­tia ana, ehara i te mea ko o tēnei ao anake, ko o tērā ao anō hoki.

²² Ā, tukua ana e ia ngā mea katoa ki raro i ōna wae­wae, meinga ana hoki ia hei ūpoko i runga i ngā mea katoa mō te hāhi,

²³ arā, mō tōna tinana, e kī tonu nei i a ia, i te kai­whaka­kī o ngā mea katoa i roto i te katoa.