2 Pita 1 - Te Kawenata Hou

He Mihi

¹ Nā Haimona Pita, he pono­nga, ā, he āpō­toro nā Īhu Karaiti – Ki te hunga kua whi­whi tahi nei tātou ki te whaka­pono utu nui, i runga o te tika o tō tātou Atua, o Īhu Karaiti, o te Kai­whaka­ora:

² Kia whaka­nuia te aroha noa me te rangi­mārie ki a koutou, i runga i te mātau­ranga ki te Atua, ki a Īhu hoki, ki tō tātou Ariki.

Te Karangatanga, te Whiriwhiringa a te Atua

³ Kua hōmai nā hoki e tōna kaha Atua ki a tātou ngā mea katoa mō te ora, mō te kara­kia pai, i te mea ka mātau nei ki te Kai­karanga i a tātou i runga i te korōria, i te pai.

⁴ Nā ēnei hoki i riro mai ai i a tātou ngā kupu whaka­ari, he mea nui whaka­hara­hara, he mea utu nui; mā ēnei hoki koutou ka whi­whi ai ki te āhua Atua, i a koutou ka mawhiti nei i te pirau i te ao, arā i tō te hia­hia.

⁵ Mā reira nei hoki, me whaka­pau rawa tō koutou uaua, honoa iho anō te pai ki runga ki tō koutou whaka­pono; ki runga hoki ki te pai ko te mātau­ranga;

⁶ ki runga ki te mātau­ranga ko te pēhi o te hia­hia; ki runga ki te pēhi o te hia­hia ko te manawa­nui; ki runga ki te manawa­nui ko te kara­kia pai;

⁷ ki runga ki te kara­kia pai ko te ata­whai ki ngā tēina; ki runga ki te ata­whai ki ngā tēina ko te aroha.

⁸ Ki te mea hoki kei a koutou ēnei mea, ki te nui haere hoki, ka meinga koutou kia kaua e māngere, kia kaua e hua­kore i runga i te mātau­ranga ki tō tātou Ariki, ki a Īhu Karaiti.

⁹ Ko te tangata hoki kāhore nei i a ia ēnei mea, he matapō, he ata­rua, kua ware­ware ki te horoi­nga o ōna hara ō mua.

¹⁰ Mō konei, e ōku tēina, kia puta tō koutou uaua ki te whaka­pūmau i tō koutou karanga­tanga, i tō koutou whiri­whiringa. Ki te pēnei hoki tā koutou mahi e kore rawa koutou e tapepa.

¹¹ Pēnei hoki ka whi­whi nui koutou ki te hua­rahi tomo atu ki te ranga­tira­tanga mutunga­kore o tō tātou Ariki, arā o te Kai­whaka­ora, o Īhu Karaiti.

¹² Mō reira anō e kore ahau e māngere ki te whaka­mahara tonu i a koutou ki ēnei mea, e mātau ana rāia koutou, kua oti anō te whakaū ki runga ki te mea pono, kei a koutou nā.

¹³ Ki tōku whaka­aro hoki, i ahau e noho ana i tēnei ta­pe­nā­kara, he mea tika anō kia whaka­oho ahau i a koutou, kia whaka­mahara;

¹⁴ e mōhio ana hoki ahau e kore e wheau ka mahue tēnei ta­pe­nā­kara ōku, ka pērā anō me tā tō tātou Ariki, me tā Īhu Karaiti, i whaka­kite mai ai ki ahau.

¹⁵ Ka puta anō hoki tōku uaua kia mau tonu tō koutou mahara ki ēnei mea i muri i tōku mate­nga.

He Kaititiro i te Nui o Īhu Karaiti

¹⁶ Ehara hoki i te mea he whai tā mātou i ngā kupu i titoa e te whaka­aro tini­hanga, i te whaka­pua­kanga o te kaha, o te haere­nga mai o tō tātou Ariki, o Īhu Karaiti ki a koutou; engari he kai­titiro anō mātou ki tōna nui.

¹⁷ I riro hoki i a ia he hōnore, he korōria nā te Atua Matua, i te pu­tanga mai o taua reo ki a ia i roto i te korōria nui rawa, “Ko tāku Tama tēnei i aroha ai, ko tāku i āhua­reka ai.”

¹⁸ I rongo anō mātou ki tēnei reo e puta mai ana i te rangi, i a mātou i tōna taha i runga i te maunga tapu.

¹⁹ Kātahi ka ū rawa te kupu poro­piti ki a tātou ināia­nei; pai tonu ki te anga tō koutou whaka­aro ki reira, he rama hoki e tīaho ana i te wāhi pōuri, kia pūao rā anō te rā, kia ara rā anō te whetū o te ata i roto i ō koutou ngākau.

²⁰ Kia mōhio hoki i te tua­tahi, kāhore he poro­piti­tanga o te karaipi­ture nōna ake ōna tikanga.

²¹ Ehara hoki i te mea nā te whaka­aro o te tangata i puta mai ai te poro­piti­tanga i mua, engari he mea whaka­mahara nā te Wairua Tapu i kōrero ai ngā tāngata tapu a te Atua.