2 Koriniti 4 - Te Kawenata Hou

He Taonga Wairua kei roto i ngā Oko Oneone

¹ Nā konei, i te mea kei a mātou tēnei mahi minita, i te mea ka tohu­ngia nei mātou, kāhore mātou e ngākau­kore.

² Engari kua whaka­rērea e mātou ngā mea huna o te whaka­mā, kore ake mātou e haere i runga i te tini­hanga, kāhore hoki e māminga ki te kupu a te Atua; ka waiho ia ko te whaka­pua­kanga o te pono hei whaka­atu i tō mātou pai ki te hine­ngaro tangata i te aro­aro o te Atua.

³ Nā, ki te mea he mea hīpoki tā mātou rongo­pai, he mea hīpoki ki te hunga e whaka­ngaro­mia ana.

⁴ I roto nei i a rātou te atua o tēnei ao, e whaka­matapō ana i ngā whaka­aro o te hunga kore whaka­pono, kei whiti­ngia rātou e te mārama o te rongo­pai o te korōria o te Karaiti, ko ia nei te āhua o te Atua.

⁵ He teka hoki ko mātou te kauwhau­tia nei e mātou, engari, ko Karaiti Īhu hei Ariki, ā, ko mātou nei hei pono­nga mā koutou, he whaka­aro ki a Īhu.

⁶ Ko te Atua hoki nāna nei i kī, “Te mārama kia whiti i roto i te pōuri,” kua whiti ki roto ki ō mātou ngākau, hei hōmai i te mārama o te mātau­ranga o te korōria o te Atua i te mata o Īhu Karaiti.

⁷ Ko tēnei taonga ia o mātou kei roto i te oko one­one, kia kīa ai te kaha nui whaka­hara­hara nō te Atua, ehara hoki i a mātou.

⁸ E ākina ana mātou i ngā taha katoa, heoi kāhore e pau te whaka­aro; e raru­raru ana, heoi kāhore e ngākau­kore;

⁹ e whaka­toia ana, heoi kāhore i whaka­rērea; e tāia ana ki raro, heoi kāhore i whaka­ngaro­mia;

¹⁰ e mau tonu ana hoki te mate­nga o Īhu ki ō mātou tinana, i a mātou e hāere­ere nei; kia mārama ai tō Īhu ora i roto i ō mātou tinana.

¹¹ Ko mātou hoki e ora nei, e tukua tonu­tia ana ki te mate mō te whaka­aro ki a Īhu, kia mārama ai hoki tō Īhu ora i roto i ō mātou kiko­kiko mate­mate.

¹² Nā, ko te mate te mahi ana i roto i a mātou, ko te ora ia i roto i a koutou.

¹³ Otirā, i te mea kei a mātou taua wairua rā anō o te whaka­pono, te mea i tuhi­tuhia rā, “I whaka­pono ahau, koia ahau i kōrero ai,” whaka­pono ana anō mātou, koia hoki mātou ka kōrero nei;

¹⁴ e mātau ana hoki mātou, tērā te kai­whaka­ara o te Ariki, o Īhu, e whaka­ara anō hoki i a mātou me Īhu, e whaka­tū ngā­tahi anō i a mātou me koutou.

¹⁵ Hei painga hoki ki a koutou ngā mea katoa, kia waiho ai mā te aroha noa, e whaka­nuia nei e te toko­maha, e whaka­whetai, kia hira rawa ai te korōria o te Atua.

E Ora ana i te Whakapono

¹⁶ Koia hoki tātou tē ngākau­kore ai; heoi, ahakoa haere iho tātou ki te pirau, arā tō waho tangata, e whaka­hou­tia ana anō tō roto i tēnei rā, i tēnei rā.

¹⁷ Ko tō tātou mamae māmā nei hoki, rangi­tahi kau nei, hei whaka­whi­whi i a tātou kia tino nui haere rawa atu te tai­maha o te korōria, he mea mau tonu.

¹⁸ I a tātou kāhore nei e ti­tiro ki ngā mea e kitea ana, engari ki ngā mea kāhore e kitea. He mea nō nāia­nei noa hoki ngā mea e kitea ana; he mea mau tonu ia ngā mea kāhore e kitea.