2 Koriniti 12 - Te Kawenata Hou

Ngā Putanga me ngā Whakakitenga a te Ariki ki a Paora

¹ Ehara hoki i te pai kia whaka­mana­mana ahau; heoi, me neke atu ahau ki ngā pu­tanga, ki ngā whaka­kite­nga mai a te Ariki.

² E mātau ana ahau ki tētahi tangata i roto i a te Karaiti, ka tekau mā whā ēnei tau, i roto rānei i te tinana, kāhore ahau e mātau; i waho rānei o te tinana, kāhore ahau e mātau; ko te Atua te mātau ana; kā­hakina atu ana taua tangata ki te tua­toru rā anō o ngā rangi.

³ Heoi, mātau tonu ahau ki taua tangata, i roto rānei i te tinana, i waho rānei o te tinana, kāhore ahau e mātau; ko te Atua te mātau ana;

⁴ kā­hakina atu ana ia ki Pararaiha, ā, rongo ana i ngā mea e kore e taea te kōrero, e kore anō e tika kia kōrero­tia e te tangata.

⁵ Ka whaka­mana­mana ahau ki taua tangata; otiia, e kore ahau e whaka­mana­mana ki ahau ake, engari ki ōku ngoi­kore­tanga.

⁶ Ki te hia­hia hoki ahau kia whaka­mana­mana, e kore ahau e wai­rangi; ka kōrero tonu ahau i te mea pono. Heoi, ka waiho e ahau, kei nui atu tā tētahi e whaka­aro ai ki ahau i tāna e kite nei i ahau, i tāna rānei e rongo ai ki ahau.

⁷ Nā, i te tino nui rawa o ngā whaka­kite­nga mai, he mea kei kake rawa ake ahau, kua hōmai ki ahau he koi­koi i te kiko­kiko, he ana­hera nā Hātana hei kuru i ahau, kia kaua ai ahau e kake rawa.

⁸ E toru āku inoi­nga ki te Atua mō tēnei mea kia neke atu i ahau.

⁹ Ā, kua mea mai ia ki ahau, “E ranea ana tōku ata­whai hei mea mōu; mana tonu hoki tōku kaha i runga i te ngoi­kore.” Nā, pai rawa atu ki ahau te whaka­mana­mana ki ōku ngoi­kore, kia ai ai te kaha o te Karaiti hei taupoki mōku.

¹⁰ Mō reira āhua­reka tonu ahau ki ngā ngoi­kore­tanga, ki ngā tūkino­tanga, ki ngā aituā, ki ngā whaka­toi­nga, ki ngā raru­nga, mō te Karaiti; i ahau hoki e ngoi­kore ana ko reira ahau kaha ai.

Te Māharahara o Paora ki te Hunga Koriniti

¹¹ Nā, kua wai­rangi ahau! He kaha nō tā koutou ki ahau. I tika kē hoki mā koutou ahau e whaka­pai; kāhore hoki ahau i hoki iho i ngā tino āpō­toro i te aha, i te aha, ahakoa rā he kāhore noa iho ahau nei.

¹² He pono i mahia i roto i a koutou ngā tohu o te āpō­toro, pau rawa anō hoki te manawa­nui, i runga i ngā tohu, i ngā mea whaka­mīharo, i ngā mere­kara.

¹³ He aha koia te mea i iti iho ai koutou i ērā atu hāhi, ko tēnei anake pea, ko tōku kore­nga e tai­maha ki a koutou? Whaka­rērea noatia iho tēnei hē ōku.

¹⁴ Nā, ko te tua­toru tēnei o ngā wā ka takatū nei ahau ki te haere atu ki a koutou. E kore anō koutou e pēhia e ahau ki tētahi mea māku; ehara hoki i te mea ko tā koutou tāku e rapu nei, engari ko koutou. Nā, ehara mā ngā tama­riki te whaka­pū­ranga taonga mā ngā mātua, engari mā ngā mātua mā ngā tama­riki.

¹⁵ Nā, ka tino pai ahau ki te whaka­pau i āku, kia whaka­paua hoki ahau i te mea­tanga mō ō koutou wairua. Me­he­mea i hira ake tōku, aroha ki a koutou, e hoki iho rānei te aroha mōku?

¹⁶ Heoi rā, kīhai ahau i whaka­tai­maha i a koutou; engari i tōku korokē, hopu­kina ana koutou e ahau ki te tini­hanga.

¹⁷ I meinga rānei e ahau tētahi o te hunga i tonoa atu e ahau ki a koutou hei whaka­pati i ā koutou taonga mōku?

¹⁸ I whaka­haua atu e ahau a Taituha, i tonoa atu hoki tētahi teina hei hoa mōna. I whaka­pati rānei a Taituha i ā koutou taonga mōna? He teka ianei i runga i te wairua kotahi tā māua haere? He teka rānei i haere tahi māua ko aua tapu­wae rā anō?

¹⁹ Tēnei koutou te mahara nei i ēnei wā katoa he whaka­tika­tika mō mātou tā mātou ki a koutou. I te aro­aro o te Atua e kōrero ana mātou i roto i a te Karaiti. Otiia, ko ēnei mea katoa, e ōku hoa aroha, hei pai mō koutou, hei hanga mō te whare.

²⁰ E wehi ana hoki ahau, kei roko­hanga atu koutou e ahau, ina tae atu, kāhore e rite ki tāku e pai nei, kei kitea hoki ahau e koutou, kāhore e rite ki tā koutou e pai ai. Kei roko­hanga atu he whawhai, he hae, he riri, he totohe, he ngau­tuarā, he kō­muhu­muhu, he whaka­puta, he tutū;

²¹ kei whaka­iti­tia ahau e tōku Atua i ō koutou aro­aro, ina tae atu anō ahau, ā, kei toko­maha hoki e tangi­hia e ahau o te hunga i hara i mua, ā, kāhore anō i rīpe­netā mō te poke, mō te moe­puku, mō te hia­hia tai­kaha, i mahia nei e rātou.