1 Timoti 5 - Te Kawenata Hou

He Kawenga ki te Hunga Whakapono

¹ Kaua e whaka­tūpehu­pehu ki te kaumātua; engari āta kōrero­tia atu ānō he matua; ko ngā tai­tama­riki hoki ānō he tēina;

² ko ngā rūruhi ānō he whaea; ko ngā wāhine tai­tama­riki ānō he tuā­hine, i runga i ngā whaka­aro mā katoa.

³ Whaka­hōnore­tia ngā pouaru, arā ngā tino pouaru.

⁴ Ki te mea ia he tama­riki, he moko­puna rānei a tētahi pouaru, kia whaka­akona rātou i te tua­tahi kia whaka­aro tika ki tō rātou whare ake, kia utua hoki tā ngā mātua; he mea pai hoki tēnei, he mea e manako­hia ana i te aro­aro o te Atua.

⁵ Nā, ko te tino pouaru, ko te mea moke­moke, e tū­mana­ko ana ia ki te Atua, e mau tonu ana ki ngā īnoi, ki ngā kara­kia, i te pō, i te ao.

⁶ Ko te pouaru ia e whai ana ki ngā āhua­reka a te tinana he tū­pā­paku ia, ahakoa ora.

⁷ Ākona atu ēnei mea, kei eke­ngia rātou e te kupu.

⁸ Engari ki te kore tētahi e whaka­aro ki ōna ake, ā, ki te hunga rawa anō o tōna whare, kua whaka­kāhore­tia e ia te whaka­pono, ā, he kino atu tāna i tā te tangata whaka­pono kore.

⁹ Kaua tētahi e whaka­urua ki te rā­rangi o ngā pouaru i te mea kāhore anō ōna tau i ono tekau, hei te wahine i tūturu ki te tāne kotahi,

¹⁰ hei te mea e whaka­ae­tia ana āna mahi pai: me­he­mea ia i whaka­tupu tama­riki, me­he­mea ia i ata­whai manu­hiri, me­he­mea i horoi i ngā wae­wae o te hunga tapu, me­he­mea i manaaki i te hunga e tūkino­tia ana, me­he­mea ia i whai ki ngā mahi pai katoa.

¹¹ Ko ngā pouaru tai­tama­riki ia me whaka­rere; ki te tupu hoki tō rātou whaka­aro pō­au­au takahi i tā te Karaiti, ka hia­hia ki te mārena;

¹² ka tau te hē ki a rātou, nō te mea kua whaka­rērea e rātou tō rātou whaka­pono tua­tahi.

¹³ Ka ako anō hoki rātou ki te noho māngere, ki te hāere­ere noa ki tētahi whare, ki tētahi whare; ā, ehara i te mea ko te māngere kau, he mate kōrero­rero anō ia tō rātou, he poka­noa ki tā tērā, ki tā tērā, ko tā rātou e kōrero ai ko ngā mea e kore e tika.

¹⁴ Koia ahau ka mea ai kia mārena ngā pouaru tai­tama­riki, kia whānau tama­riki, kia tohu­tohu i ngā mea o te whare, kia kaua e hoatu ki te hoa­riri tētahi take tāwai.

¹⁵ Kua tahuri kē nei hoki ētahi ki te whai i a Hātana.

¹⁶ Ki te mea he pouaru a tētahi tangata whaka­pono a tētahi wahine whaka­pono rānei, māna anō rātou e ata­whai, kaua hoki te hāhi e whaka­tai­maha­tia; ko āna hoki e ata­whai ai ko ngā tino pouaru.

¹⁷ Kia nui ake te hōnore mō ngā kaumātua e tohu­tohu pai ana; engari rawa ia mō te hunga ko tā rātou nei mahi ko te kupu, ko te whaka­ako.

¹⁸ E mea ana hoki te karaipi­ture, “Kaua e whaka­mōkā­tia te māngai o te kau patu wīti” me tēnei hoki, “Ka tika te utu mō te kai­mahi.”

¹⁹ Kaua e whaka­rongo ki te whaka­wā mō te kaumātua, kia puta rā anō i ngā māngai o ētahi kai­whaka­atu toko­rua, toko­toru rānei.

²⁰ Ko te hunga hara rīria i te aro­aro o te katoa, kia mataku ai hoki ērā atu.

²¹ Ko tāku kupu nui tēnei ki a koe i te aro­aro o te Atua, o Karaiti Īhu hoki, ā, o ngā ana­hera whiri­whiri, puri­tia ēnei mea, kaua e pokaia he tikanga, kaua e mahi i runga i te whaka­hoa.

²² Kei hohoro te whaka­pā i ngā ringa­ringa ki tētahi tangata. Kaua anō e uru ki ngā hara o te tangata kē; kia mau tōu hara­kore.

²³ Kāti tōu inu wai; engari hei te wāina māu, kia iti, hei mea mō tōu puku, mō ōu mate e hono­hono nā.

²⁴ Ko ngā hara o ētahi tāngata mārama noa ake, e haere ana i mua ki te whaka­wā­kanga; ko o ētahi ia e whai mai ana i muri i a rātou.

²⁵ Wai­hoki ko ngā mahi pai e mārama noa ake ana; ā, ko ngā mea e rere kē ana e kore e taea te huna.