1 Teharonika 3 - Te Kawenata Hou

¹ Nā, i te kore e taea te ngākau te pēhi tonu, i pai mātou kia mahue ko mātou anake i Atene;

² ā, tonoa ana e mātou a Tīmoti, tō mātou teina, he minita nā te Atua, he hoa mahi nō mātou ki te rongo­pai o te Karaiti, hei whakaū i a koutou, hei kōrero whaka­mārie ki a koutou mō ngā mea o tō koutou whaka­pono.

³ Kei whaka­ngāue­ue­tia tētahi e ēnei tūkino­tanga. E mātau ana anō hoki koutou he mea momotu kē tātou mō tēnei mea.

⁴ I a mātou hoki e noho ana i a koutou, i kōrero wawe anō mātou ki a koutou, tērā tātou e tūkino­tia; koia anō tēnei, ka mātau nei koutou.

⁵ Nā reira, i te mea tē taea tōku ngākau te pēhi tonu, ka tono tāngata atu ahau kia mōhio ai ahau ki tō koutou whaka­pono, kei whaka­waia pea koutou e te kai­whaka­wai, ā, mau­mau kau tā mātou mahi.

⁶ Tēnā ko tēnei, ka tae mai nei a Tīmoti ki a mātou i a koutou, ka pai hoki tāna kōrero ki a mātou mō tō koutou whaka­pono, mō tō koutou aroha, mō koutou hoki e whai mahara pai ana ki a mātou i ngā wā katoa, e hia­hia ana kia kite i a mātou, he pērā anō me tō mātou ki a koutou.

⁷ Nā, kua whai whaka­mārie­tanga mātou i a koutou, e ōku tēina, i ō mātou tūkino­tanga katoa, i ō mātou mate­nga, he mea nā tō koutou whaka­pono.

⁸ Ko tō mātou ora nei hoki tēnei, arā, kia tū tonu koutou i runga i te Ariki.

⁹ Me aha hoki he whaka­whetai mā mātou ki te Atua mō koutou, mō ngā hari katoa e hari nei mātou ki a koutou, i te aro­aro o tō tātou Atua?

¹⁰ Nui atu tā mātou īnoi i te pō, i te ao, kia kite i ō koutou kanohi, kia whaka­otia anō hoki e mātou ngā wāhi o tō koutou whaka­pono i hapa.

¹¹ Nā, mā te Atua ake anō, arā mā tō tātou Matua, mā tō tātou Ariki hoki, mā Īhu Karaiti, e whaka­tika tō mātou ara ki a koutou.

¹² Mā te Ariki anō hoki e mea kia nui, kia hira tō koutou aroha tētahi, ki tētahi, ki ngā tāngata katoa hoki, kia pēnei anō me tō mātou ki a koutou.

¹³ Kia whaka­ū­kia ai ō koutou ngākau he mea kāhore he hē i runga i te tapu i te aro­aro o te Atua, o tō tātou Matua, i te taenga mai o tō tātou Ariki, o Īhu Karaiti, rātou ko tāna hunga tapu katoa.