1 Koriniti 10 - Te Kawenata Hou

He Whakatūpato ki ngā Whakapakoko

¹ E kore ahau e pai, e ōku tēina, kia kūware koutou, i raro katoa ō mātou mātua i te kapua, i haere katoa anō hoki rā roto i te moana;

² i iri­iria anō rātou katoa ki a Mohi i roto i te kapua, i roto hoki i te moana;

³ ā, i kai rātou i te kai kotahi, he mea wairua;

⁴ i inu hoki rātou katoa i te wai kotahi, he mea wairua. Nō te mea i inu rātou i tā te mea wairua, arā i tā te toka i whai nei i a rātou; ā, ko taua toka rā ko te Karaiti.

⁵ Otiia, kīhai te Atua i āhua­reka ki te nuinga o rātou; i tura­kina iho hoki rātou i te koraha.

⁶ Nā, hei tohu ēnei mea ki a tātou, kia kaua tātou e hia­hia, ki ngā mea kino, kei pērā me rātou i hia­hia rā.

⁷ Kaua anō koutou e kara­kia ki ngā whaka­pakoko, kei pērā me ētahi o rātou; kua oti rā hoki te tuhi­tuhi, “I noho te iwi ki te kai, ki te inu, ā, whaka­tika ana ki te tākaro.”

⁸ Kaua hoki tātou e moe­puku, kei pērā me ētahi o rātou i moe­puku, ā, hinga ana e rua tekau mā toru ngā mano i te rā kotahi.

⁹ Kaua hoki tātou e whaka­mā­tau­tau a te Karaiti, kei pērā me ētahi o rātou i whaka­mā­tau­tau rā, ā, ngaro ana te nākahi.

¹⁰ Kaua hoki koutou e amu­amu, kei pērā me ētahi o rātou i amu­amu, ā, ngaro ana rātou i te kai­whaka­ngaro.

¹¹ Nā, i pā ēnei mea ki a rātou hei tohu; kua tuhi­tuhia nei hoki hei whaka­tūpato i a tātou, i te hunga ka tae nei ki ngā whaka­mutu­nga o te ao.

¹² Nā reira, ko te tangata e mea ana e tū ana ia, kia tūpato ia kei hinga.

¹³ Kāhore anō kia pono ki a koutou tētahi whaka­mā­tau­tau e rere kē ana i tō te tangata. He pono hoki te Atua, e kore nei e tuku kia nui ake i tō koutou kaha te whaka­mā­tau­tau mō koutou; engari, tahi me te whaka­mā­tau­tau ka meatia e ia he pu­tanga, kia ū ake ai koutou.

¹⁴ Nā reira, e ōku hoa aroha, rere atu i te kara­kia whaka­pakoko.

¹⁵ Ko tāku kōrero nei he mea ki te hunga mahara; whaka­aroa tāku e mea nei.

¹⁶ Ko te kapu whaka­pai­nga e whaka­pai nei tātou, ehara koia i te inu tahi i ngā toto o te Karaiti? Ko te taro e whati­whatia nei e tātou, ehara ianei i te kai tahi i te tinana o te Karaiti?

¹⁷ Inā hoki ko tātou toko­maha nei, kotahi anō taro, kotahi anō tinana; kotahi tonu nei hoki taua taro e kainga nei e tātou katoa.

¹⁸ Whaka­aroa a Īharaira o te kiko­kiko; he teka ianei ko te hunga e kai ana i ngā patu­nga tapu, e uru tahi ana ki tō te āta?

¹⁹ Nā, he pēhea rā tāku kōrero? He tikanga mea rānei te mea e patua ana mā te whaka­pakoko? He tikanga mea rānei te whaka­pakoko?

²⁰ Otirā, e kī ana ahau, ko ngā mea e i patua ana e ngā tauiwi, e patua ana mā ngā rēwera, he teka mā te Atua. E kore hoki ahau e pai kia uru tahi koutou ko ngā rēwera.

²¹ E kore koutou e āhei te inu i te kapu a te Ariki, i te kapu anō a ngā rēwera. E kore koutou e āhei te kai i te tēpu a te Ariki, i te tēpu hoki a ngā rēwera.

²² E mea ana rānei tātou kia hae mai te Ariki? He kaha koia tātou i a ia?

²³ “He tika ngā mea katoa,” otirā, e kore e pai katoa. “He tika ngā mea katoa,” otirā, e kore e oti te wai­hanga e ngā mea katoa.

²⁴ Kaua tētahi e rapu ki tāna ake, engari, me rapu katoa i te pai mō tērā, mō tērā.

²⁵ Ko ngā mea katoa e hokona ana i te mākete, kainga, kaua e uiui, kei hē te hine­ngaro.

²⁶ “Nō te Ariki hoki te whenua me ōna tini mea.”

²⁷ Ki te karanga­tia koutou e tētahi o te hunga whaka­pono kore, ā, ka pai koutou kia haere; ko ngā mea katoa e whaka­takoto­ria mai ki tō koutou aro­aro, kainga, kaua e uiui, kei hē te hine­ngaro.

²⁸ Ki te mea ia tētahi ki a koutou, “I patua tēnei mā te whaka­pakoko,” kaua e kai, me whaka­aro ki te kai­whaka­atu, ki te hine­ngaro hoki.

²⁹ Ko te hine­ngaro, e kī ana ahau, ehara i tōu, engari, ko tō tētahi; he aha tōku here­kore­tanga kia whaka­korea e tērā atu hine­ngaro?

³⁰ Ki te mea hoki nā te aroha noa ahau i kai ai, he aha ahau i kōrero­tia kino­tia ai mō te mea i whaka­whetai ai ahau?

³¹ Nā reira, ahakoa kai, ahakoa inu, aha rānei, meinga katoa­tia hei whaka­korōria mō te Atua.

³² Kei waiho koutou hei tūtuki­tanga wae­wae ki ngā Hūrai, ki ngā Kariki rānei, ki te hāhi rānei a te Atua;

³³ kia pēnei me ahau e whaka­mānawa­reka nei i te katoa i ngā mea katoa, i ahau kāhore nei e rapu i te pai mōku ake, engari i tō te toko­maha, kia ora ai rātou.