1 Hoani 4 - Te Kawenata Hou

He Wairua Pono, Wairua Teka Rānei

¹ E ngā hoa aroha, kaua e whaka­pono atu ki ngā wairua katoa, engari me whaka­mātau ngā wairua nō te Atua rānei; he toko­maha hoki ngā poro­piti teka kua haere mai ki te ao.

² Mā konei koutou ka mātau ai ki te Wairua o te Atua. Ko ngā wairua katoa e whaka­ae ana i haere mai a Īhu Karaiti i te kiko­kiko, nō te Atua ērā.

³ Ko ngā wairua katoa hoki kāhore e whaka­ae i haere mai a Īhu Karaiti i te kiko­kiko, ehara i te mea nō te Atua. Ko tō te ana­tika­raiti wairua anō tēnei, i rongo nei koutou e haere mai ana; ā, tēnei anō kei te ao nei ināia­nei.

⁴ Nō te Atua koutou, e āku tama­riki no­nohi, kua kaha anō koutou i a rātou. Nō te mea nui atu tēnei i roto i a koutou, i tērā i roto i te ao.

⁵ Nō te ao rātou; nā reira nō te ao nei anō ā rātou kōrero, ā, e whaka­rongo ana te ao ki a rātou.

⁶ Nō te Atua tātou; ko te tangata e mātau ana ki te Atua, e whaka­rongo ana ia ki a tātou; ko te tangata ehara nei i tā te Atua, e kore ia e whaka­rongo ki a tātou. Mā konei tātou ka mātau ai ki te wairua o te pono, ki te wairua o te hē.

He Aroha te Atua

⁷ E ngā hoa aroha, kia aroha tātou tētahi ki tētahi, nō te Atua hoki te aroha; ko te hunga katoa hoki e aroha ana, kua whānau i te Atua, e mātau ana hoki ki te Atua.

⁸ Ko te tangata kāhore e aroha, kāhore ia e mātau ki te Atua; he aroha hoki te Atua.

⁹ Nā konei i kitea mai ai te aroha o te Atua ki a tātou, nā te mea kua tonoa mai e te Atua tāna Tama kotahi ki te ao, kia ora ai tātou i a ia.

¹⁰ Ko te aroha tēnei, ehara i te mea ko tātou kua aroha ki te Atua, engari, ko ia kua aroha ki a tātou, ā, tonoa mai ana e ia tāna Tama hei whaka­mārie mō ō tātou hara.

¹¹ E ngā hoa aroha, ki te mea i pēnei te aroha o te Atua ki a tātou, he tika anō hoki kia aroha tātou tētahi ki tētahi.

¹² Kāhore he wā i kite ai tētahi i te Atua. Ki te aroha tātou tētahi ki tētahi, e noho ana te Atua i roto i a tātou, kua rite pū anō tōna aroha i roto i a tātou.

¹³ Nā konei tātou i mātau ai e noho ana tātou i roto i a ia, me ia i roto i a tātou, nā te mea kua hōmai e ia tā tōna Wairua ki a tātou.

¹⁴ Kua kite anō mātou, ka whaka­atu nei anō hoki, i tonoa mai te Tama e te Matua hei Kai­whaka­ora mō te ao.

¹⁵ Ko te tangata e whaka­ae ana ko Īhu te Tama a te Atua, e noho ana te Atua i roto i a ia, me ia anō hoki i roto i te Atua.

¹⁶ Kua mātau nei anō hoki tātou, kua whaka­pono ki te aroha o te Atua ki a tātou. He aroha te Atua, ko te tangata hoki e noho ana i runga i te aroha e noho ana i roto i te Atua, me te Atua anō hoki i roto i a ia.

¹⁷ Nā konei te aroha i roto i a tātou i rite pū ai, ā, ka whai māia­tanga anō tātou ā te rā whaka­wā; nā te mea e rite ana ki a ia tātou e noho nei i tēnei ao.

¹⁸ Kāhore he mataku i roto i te aroha; engari, ka makā te mataku ki waho e te aroha ina tino rite; nō te mea he mamae tō te mataku. Ko te tangata hoki e mataku ana, kāhore ia i tino rite i roto i te aroha.

¹⁹ E aroha ana tātou ki a ia, nō te mea ko ia kua mātua aroha ki a tātou.

²⁰ Ki te mea tētahi, “E aroha ana ahau ki te Atua,” ā, e mauā­hara ana ki tōna teina, he tangata teka ia. Ko te tangata hoki kāhore e aroha ki tōna teina i kitea nei e ia, me pēhea ka aroha ai ia ki te Atua kāhore nei i kitea e ia?

²¹ Kei a tātou anō hoki tēnei ture, he mea nāna, “Ko te tangata e aroha ana ki te Atua, kia aroha hoki ki tōna teina.”