1 Hoani 3 - Te Kawenata Hou

He Tamariki nā te Atua

¹ Kia kite koutou i te tikanga o te aroha i hōmai nei e te Matua ki a tātou, arā kia huaina tātou he tama­riki nā te Atua! He pērā hoki tātou, koia te ao tē mātau ai ki a tātou, kāhore hoki i mātau ki a ia.

² E ngā hoa aroha, he tama­riki tātou nā te Atua ināia­nei; ā, kāhore anō i kitea noatia he aha rānei tātou ā mua. Otirā, e mōhio ana tātou, ki te puta mai ia, ka rite tātou ki a ia. Ka kite hoki tātou i a ia, i tōna āhua ake anō.

³ Nā, ki te mea kei tētahi tēnei tū­mana­ko ki a ia, ka tahia atu e ia ōna hē, kia rite ai ki a ia kāhore nei he hē.

⁴ Ko te tangata e mea ana i te hara, he takahi tāna i te ture; he takahi hoki te hara i te ture.

⁵ E mātau ana anō koutou i whaka­kitea mai ia hei waha atu i ō tātou hara; kāhore anō hoki he hara i roto i a ia.

⁶ Ko te tangata e mau ana i roto i a ia e kore e hara: ko te tangata e hara ana, kāhore i kite i a ia, kāhore anō i mātau ki a ia.

⁷ E āku tama­riki no­nohi, kei whaka­pōhēhē­tia koutou e tētahi. Ko te tangata e mea ana i te tika, he tika anō ia, pērā hoki me tērā e tika ana.

⁸ Ko te tangata e mea ana i te hara, nō te rēwera ia; he hara hoki tō te rēwera nō te tīma­tanga rā anō. Mō konei te Tama a te Atua i whaka­kitea mai ai, kia whaka­kāhore­tia ai e ia ngā mahi a te rēwera.

⁹ Ko te tangata kua whānau i te Atua e kore e mea i te hara; nō te mea e mau ana tana pura­pura i roto i a ia. E kore hoki e āhei i a ia te hara, nō te mea kua whānau ia i te Atua.

¹⁰ Mā konei ka kitea ai ngā tama­riki a te Atua me ngā tama­riki a te rēwera. Ko te tangata e kore e mahi i te tika, ehara ia i te Atua, me ia anō hoki e kore e aroha ki tōna teina.

Kia Aroha tētahi ki tētahi

¹¹ Ko te kōrero hoki tēnei i rongo ai koutou nō te tīma­tanga, kia aroha tātou tētahi ki tētahi.

¹² Kaua rā e pērā me Kaina; nō te wairua kino nei ia, ā, kōhuru­tia ana e ia tōna teina. Nā te aha hoki ia i kōhuru ai i a ia? Nō te mea he kino āna mahi, ko ā tōna teina ia he tika.

¹³ Kaua e mīharo, e ōku tēina, ki te kino te ao ki a koutou.

¹⁴ E mātau ana tātou kua whiti tātou i te mate ki te ora, nō te mea e aroha ana tātou ki ngā tēina. Ko te tangata kāhore e aroha ki te teina, e noho ana ia i roto i te mate.

¹⁵ Ko te tangata e mauā­hara ana ki tōna teina, he kai­patu tangata ia; ka mātau hoki koutou, ko te kai­patu tangata kāhore he ora tonu e mau ana i roto i a ia.

¹⁶ Nā konei tātou i mātau ai ki te aroha, i tuku atu hoki ia i a ia kia mate mō tātou. He tika anō kia tukua tātou e tātou anō ki te mate mō ngā tēina.

¹⁷ Ko te tangata ia i a ia nei ngā oranga o tēnei ao, ā, ka kite e matea ana tētahi mea e tōna teina, nā, ka tū­taki­na iho e ia tōna ngākau aroha ki a ia, e mau pēhea ana te aroha o te Atua i roto i a ia?

¹⁸ E āku tama­riki no­nohi, kaua e waiho mā te kupu, mā te arero te aroha; engari mā te mahi, mā te pono.

Ka Māia i te Aroaro o te Atua

¹⁹ Mā konei hoki tātou ka mātau ai nō te pono tātou, ka whakaū ai hoki i ō tātou ngākau i tōna aro­aro.

²⁰ Ki te mea ka whaka­hē mai ō tātou ngākau i a tātou, nui atu te Atua i ō tātou ngākau; e mātau ana anō ia ki ngā mea katoa.

²¹ E ngā hoa aroha, ki te kore ō tātou ngākau e whaka­hē i a tātou, ka māia tātou ki te Atua;

²² ā, ko te mea e īnoia ana e tātou, ka hōmai e ia ki a tātou, nō te mea e pupuri ana tātou i āna ture, e mea ana hoki i ngā mea e āhua­reka ana ki tāna ti­tiro.

²³ Ko tāna ture anō tēnei, kia whaka­pono tātou ki te ingoa o tāna Tama, o Īhu Karaiti, kia aroha anō tētahi ki tētahi, kia rite anō ki te ture i hōmai e ia ki a tātou.

²⁴ Nā, ko te tangata e pupuri ana i āna ture, e mau ana i roto i a ia me ia anō i roto i a ia. Nā konei anō tātou i mātau ai e mau ana ia i roto i a tātou, nā te Wairua kua hōmai nei e ia ki a tātou.