Ululahu Tesalonika 3 - Buka Blahi Ka Cheke Holo

¹ Ghehati neke theome tangomana ari ka ghotilo, nu ninhigrana fara ofo te raugha na. Eghume ghehati ghaoghatho mala au kolho ka namono Atens themi,

² eghuteuna neke kuru arini mae kherada Timoti ka ghotilo. Mae Timoti kaisei mae nogna gloku God te loku balumi ghehati mala toutonu ranghidi naiknore Nonomho te Keli eigna mae Kraes. Ghehati kuru arini mala farheta ghami nei toghodi eghu mana nomi fatutuani ghotilo re.

³ Ghehati kuru arini mana mala theo kaisei ka ghotilo te figri fapulo ka nogna fatutuani na eidi naꞌau papara gognaro gre. Eigna ghotilo themi lasedi nafnata naꞌau papara igre u gaoghathogna God malada tahati.

⁴ Kani au teku balumi ia, ghehati neke kulu chekedi ka ghotilo naꞌau papara te thoke mei ka tahati te gnafa igre. Eghuteuna ghotilo lasenihi igne thofno thakle mei tutuani fara.

⁵ Naugna igne, iara kuru arini mae Timoti ka ghotilo mala tangomana iara te laseni nomi fatutuani ghotilo na. Iara kuru arini mana kate theome tangomana ofo te raugha. Te mhaghuni iara na mae Satan jame neke fariuriu ghami ghotilo, eghuteuna nakmusa fateo te edi tahati igre ginauna na theo nafudi kolho.

⁶ Nu mae Timoti gne kela pulo mei ka ghehati funu ka ghotilo. Mana hata mei famane nonomho te keli eigna nomi fatutuani nei namha. Mana toutonu ka ghehati eimi ghotilo te ghatho ghami fabrahu ka puhi te keli, nei magnahaghei filo ghami fara jateula ghehati te magnahaghei filo ghami ghotilo.

⁷ Eghume kheraguro, nonomho te keli teke nomhini ghehati eigna nomi fatutuani na fameomego ghami farihoteidi puhi biꞌo nei naꞌau papara gre. Naugna gognaro na ghehati laseni ghotilo thofno kegra maku ka nomi fatutuani na.

⁸ Gognaro na ghehati kela phanga fapulo naugna ghotilo te kegra maku ka Lord.

⁹ Tutuani fara, ghehati tangomana te cheke fakelini God eimi ghotilo. Nu nomi kilo fnakno ghehati na theome nabagna u gleale'a biꞌo ke ulugna noda God eimi ghotilo!

¹⁰ Eghuteuna ghehati tarai heta fabrahu eimi ghotilo bongi narane. Ghehati tarai mala tangomana teke filo ghami nei tusu ari tami gobigna lepo te nabami ghotilo mala farhetadi nomi fatutuani.

¹¹ Ghehati tarai ka God Kmada thegna nei noda Lord Jisas Kraes mala kuru fapulo ghami ka ghotilo thogheiro.

¹² Iara toreni Lord mala fabruarani nei fathovuni nomi namha na fari themi nei naikno te gnafa jateula ghehati te namha ghami ghotilo.

¹³ Ka nafnata puhi igne mana ginauna farhetadi nagnafami, eghuteuna ghotilo ginauna klino nei blahi ke ulugna God Kmada kate pulo mei noda Lord Jisas Kraes baludi nogna naikno blahi fateote'o.