Ululahu Tesalonika 2 - Buka Blahi Ka Cheke Holo

Nogna gloku mae Pol Tesalonika

¹ Uve kheraguro, ghotilo lasenihi nomi thei teke ari ghotilo ia theome khobagna.

² Ghotilo laseni ame ari posa nga ka ghotilo teku na, ghehati neke au papara ka namono Filipae. Mae biꞌo mala baubatu ka namono tuana cheke fadiꞌa ghami ghehati. Nu neubane khale ghami kmana hoholo, noda God ne togho ghami ghehati mala frane te toutonuni ka ghotilo u Nonomho te Keli na.

³ Eghume cheke te edi ghehati te mala farerhetadi nomi fatutuani ghotilo re theome chaghi, theome gaoghatho fadiꞌa ba theome saosagro ghami.

⁴ Nu God neke fariuriu nei fatutuani ghami ghehati te mala toutonuni Nonomho te Keli gne. Kate toutonuni Nonomho te Keli na ghehati theome fariuriu mala keli tadi naiknore. Theo. Ghehati fariuriu mala keli tagna God, mae ihei te fariuriudi nagnafadare.

⁵ Ghotilo laseni igne, ghehati theome cheke famaemahe mala hata ghami ghotilo, ba saosagro mala hata sileni ka ghotilo. Theo. Ghehati theome poruni khiri na ka ghotilo, God laseni igne tutuani fara.

^6-7 Ghehati theome hironi nafnakno na ka ghotilo, ba ka ihei. Ghehati nogna khuru mae Kraes. Naugna igne, kate au balumi ghotilo na, ghehati tangomana te tore glepo ka ghotilo. Nu ghehati faꞌamama ka ghotilo jateula kaisei gaꞌase te taegodi goro thugna.

⁸ Naugna ka nomi namha biꞌo ranghi ghami ghotilo ia ghehati keli tami fara te falase ari ka ghotilo Nonomho te Keli eigna mae Jisas Kraes. Theome tuana kolho. Nu ghehati jaola keli tami mala lehe eimi ghotilo.

⁹ Uve, kheraguro, ghotilo lase ghamihi ghehati loku heta fara bongi narane mala foli unha te nabami themi. Naugna ghehati theome magnahagheni te eni kaisei puhi biꞌo ka ghotilo kate toutonuni Nonomho te Keli gne.

¹⁰ Kate au balumi ghotilo naikno khiloau re, ghotilo theome filoni kaisei najafra ba kaisei puhi biꞌo ka ghehati naugna ghehati nakarhami na doglo fara ke ulugna God. Ghotilo themi laseni igne. God thegna jaola laseni unha teke eni ghehati ka ghotilo na thofno klino fara.

¹¹ Jateula tuana, ghotilo laseni, ghehati sopa togho ghami ghotilo jateula kaisei mae te toghodi goro thugna.

¹² Ghehati faheta ghami, togho ghami nei cheke ranghi ghami ghotilo mala leghuni nafnata nakarha te keli tagna God. Mana kilo ghami mala au ka thofno nakarha nate keli te funei frunini God ginauna.

¹³ Eghuteuna ghehati jaola cheke fakelini God leghu narane, kate hatini ghotilo chekegna God te nomhini ka ghehati. Naugna ghotilo theome hatini jateula nogna cheke naikno kolho eghu, nu thofno chekegna God. Eghuteuna thofno chekegna God igne loku ke lamnami ghotilo iheire te fatutuani.

¹⁴ Uve kheraguro, ghotilo filo leghudi naikno khiloau te au ka namono Judia. Ghotilo neke au papara ka kherami themi, jateula naikno khiloau teke au papara ka hatimare mae Jiu.

¹⁵ Mae Jiu tuare neke faleheni noda Lord Jisas nei hatimare mae profet. Eghuteuna mare jaola huhuru ghita mala jifla ka namono tuana. Mare theome keli ranghini God, eghuteuna mare nodi naoka naikno te gnafa.

¹⁶ Mare fariuriu lhoti ghami ghehati te mala cheke ranghidi iheire te theome Jiu mala fakarhidi. Kate eni igne, mae Jiu tuare fodu salaꞌui ka nakhibo. Eghuteuna leghu lahu na, diꞌatagna God na la meihi ke klignadi mare.

Mae Pol magnahaghei fapea sighodi

¹⁷ Uve kheraguro, neubane kuru fajifla ghami mare katha vido kmoꞌei, gaoghathomire ghehati au ngala ka ghotilo. Eghume ghehati neke thofno fariuriu fara mala ke ari filo ghami ghotilo.

¹⁸ Ghehati magnahaghei ari sigho ghami, tulao iara mae Pol fariuriu kmana fata, nu mae Satan lhoti ghami ghehati te ari na.

¹⁹ Eigna ghotilo nomi grouronu, nomi gleale'a, nei nomi nafnakno. Uve, naugna eimi ghotilo, ghehati thofno gleale'a fara kate kegra fodu balugna Lord Jisas Kraes kate pulo mei mana na.

²⁰ Tutuani fara ghotilo nomi nafnakno nei nomi gleale'a.