Ululahu Samuel 9 - Buka Blahi Ka Cheke Holo

Mae Sol ne thafoni mae Samuel

¹ Kaisei mae dedei, nanghagna na mae Kis eghuteuna naiknore ghatho tahuni fara mana. Mae Kis gne neke thugna mae Abiel, gragna mae Seroa neke karha ka mae Bekorat, eghuteuna mae Bekorat gne neke thugna mae Afia ka vikegna mae Benjamin.

² Mae Kis au kaisei thugna nalhaꞌu, nanghagna na mae Sol. Theo kaisei mae gna Israel te jateula mana teu te brahu fara nei famane mae majaghani fara teuna.

³ Kaisei narane keha nogna dongki mae Kis gre tei ne snivi, aonu mana ne cheke eghu ka mae thugna na, “Ghema Sol, iagho hata kaisei mae balumu mala tei hirodi dongki ra.”

⁴ Aonu mae Sol ne hata balugna kaisei mae ne tei ka thogele ka nohi Efrem mala hirodi dongki te snivi ra ka vido te gnafa falithuini Salisa, nu phiamare jaola ne theome tangomana te kadire ka vido te gnafa igre. Ke leghu, phiamare ne tei ka nohi Salim, nu phiamare ne theome kadi ka nohi Salim. Aonu phiamare ne tei ke lamnagna nohigna Benjamin, nu dongki igre jaola ne dofidi ka nohi igne.

⁵ Kate tei phiamare ke lamnagna nodi vido glose vikegna mae Suf igne na, mae Sol ne cheke eghu ka mae gloku na, “Tapa nake figri ka namono. Jame te theo na, mama ginauna na theome ghathodi dongki igre, nu mana ginauna nanga ghita tapa kolho.”

⁶ Nu mae gloku igne ne cheke eghu, “Ginau sagho! Kaisei mae nogna profet God na au ka namono igne. Naiknore ghatho tahuni fara mana naugna gobigna lepo te chekedi mana re thofno tutuani fara. Jame te keli na tapa na tei filoni mana. Glahu tangomana mana te chekeni ka vido aheva te au teu dongki igre.”

⁷ Eghuteuna mae Sol ne cheke eghu, “Nu jame te tei tapa ka mana na, unha glepo gne nate tusu lao tapa ka mana na? Gognarona theo kaisei gano te au ka gloi tapa na.”

⁸ Aonu mae gloku igne ne cheke eghu, “Iara au katha seleni nate tangomana iara nate tusu lao ka mana na, mala chekeni mana ka tapa ka vido aheva te au teu dongki igre.”

^9-10 Mae Sol ne cheke eghu, “Keli fara. Tapa na tei ka mae igne mala filoni kaisei mifi.” Mana cheke eghu naugna ka narane igre, naiknore kilodi mae profet gre mae khaekae. Eghuteuna kate magnahaghei laseni unha ka God na, mare tangomana te cheke eghu na, “Tahati na tei ka mae khaekae.” Aonu phiamare ne tei ka namono aheva te au teu mae te mala chekeni chekegna God na.

¹¹ Kate haghe phiamare ka thogele na te mala tei lamna namono na, phiamare ne thafodi goro gaꞌase te soru mala toho khoꞌu teure. Eghuteuna phiamare ne ghusna eghu ka reꞌe, “Ba, mae khaekae na au ka namono, ba theo?”

^12-13 Aonu gaꞌase igre ne cheke eghu, “Uve, mana na au ngala. Mana na la kulu nolo la haghehi ke ulumi ghopa gognarogne. Jame faghosei me tei ghopa meuna, ghopa ginauna tangomana te thokeni mana kate tei ghopa ka grengathagna namono na. Mana jame ao ngala thoke ngau ka namono gognaro na, naugna gognarogne, keha mae ei fafara ka vido blahi na ka thogele holo ke kosigna namono na. Eghuteuna mare ginauna ghamu fodu jare, nu mare theome tangomana te ghamu na ghilei thokeni vido te mala fablahi gna u fafara na. Jame faghose ghopa meuna, ghopa ginauna tangomana te deni mana kate theome haghe nga teu mana ka thogele na.”

¹⁴ Aonu kate tei phiamare ke lamnagna namono na, phiamare ne filoni mae Samuel te jifla mei te mala tei ka vido blahi na.

¹⁵ Ka narane ame mei nga mae Sol me thafoni mae Samuel tekuna, Lord neke kulu cheke eghu ka mae Samuel,

¹⁶ “Iara la filodihi nodi diꞌanagnafa nogu naikno iara re, eghuteuna iara la nomhidihi te tanhi mare ka iara mala toghodi iara teure. Nathuꞌu jateula gognarogne teuna, iara ginauna kuru ari kaisei mae ka vikegna mae Benjamin mala ari filo nigho iagho. Iagho ginauna tofa oel ka phaꞌugna mana na mala fablahini mana mala king gna Israel. Eghuteuna mana ginauna fakarhi ghami ghotilo ka nodi nolaghi maedi Filistia.”

¹⁷ Aonu ka narane ke leghugna igne mae Samuel ne filoni mae Sol, eghuteuna Lord ne cheke eghu ka mana, “Tuana ngala mae teke chekeni iara gnora ka iagho ia. Mana ginauna funei frunidi nogu naikno iara re.”

¹⁸ Aonu ka narane igne mae Sol ne thafoni mae Samuel ka grengathagna namono na ne ghusna eghu ka mana, “Aheva si sugagna mae khaekae na ia?”

¹⁹ Mae Samuel ne cheke eghu ka mana, “Iara ngala mae khaekae na. Ghopa age ke ulugu iara ka vido blahi ana. Ghopa ginauna ghamu balugu iara gognarogne. Eghuteuna hamerane nathuꞌu, iara ginauna cheke balumu iagho eidi gobigna lepo te magnahaghei lasedi iagho re, eghuteuna iara ginauna nake kuru tei nigho iagho.

²⁰ Dongki teke dofidihi nabagna thilo narane igre, iagho thosei nanga noudi naugna mare kela filodihi. Fanomho sagho, naiknodi Israel gre magnahagheni fara te hironi mae ihei sigrea? Mare magnahaghei nigho iagho balugna tharaknamu iagho na.”

²¹ Aonu mae Sol ne cheke eghu ka mae Samuel. “Iara vikegna mae Benjamin, eghuteuna vike ikoi kolho ke lamnagna vikeda tahati maeda Israel. Eghuteuna vikegna mae kmagu iara na theo nanghagna ka vikegna mae Benjamin. Eghume naugna unha sagho te eni ka iara u nafnata cheke ignea?”

²² Ke leghugna te cheke te gnafa mae Sol igne, thilo mare tei ka vido blahi na ne tei ruma ka chogho mala ghamu na. Mae Samuel ne fagnokrodi phiamare ka phaꞌugna tevo na. Ka vido igne, tolufulu mae teke eni gna fafara igne la gnokrohi jare tarabana mala ghamu.

²³ Eghuteuna mae Samuel ne cheke eghu ka mae te mala gahu gano na, “Hata mei vido nafnahi teke faꞌari iara ka iagho mala tarabana ranghini kaisei mae biꞌo teku ia.”

²⁴ Aonu mae te mala gahu gano igne ne hata famane nafnahi ghahegna sipu na ne mei lilisei ka tevo na rhegna mae Sol. Eghuteuna mae Samuel ne cheke eghu ka mae Sol, “Filo sagho, vido nafnahi igne, iara neke tarabana malamu iagho neku. Iara neke vahini vido nafnahi igne malamu iagho mala ghamu iagho gognarogne baludi mae teke kilodi iara te mala mei ghamu fodu ka gano igre. Ghamu sagho.” Aonu mae Sol ne ghamu balugna mae Samuel ka narane igne.

Profet Samuel ne fablahini mae Sol mala King

²⁵ Gnafa teuna mare jifla ka vido blahi igne neke kafe soru ka namono na. Eghuteuna mae Samuel hatani mae Sol ne haghe ke tagru suga ne toutonu balugna mana jare. Eghuteuna mae Sol ne thuru ka vido igne.

²⁶ Mae Samuel dofra haghe hamerane boibongi ne ehani mae Sol ne cheke eghu ka mana, “Dofra gho. Iara ginauna tei lisei ghami ghopa ka nabrou gno mala tei ka namono.” Aonu mae Sol dofra haghe, eghuteuna mae Samuel ne jifla baludi phiamare ka namono na.

²⁷ Kate thoke thilo mare ka khukrugna namono na, mae Samuel ne cheke eghu ka mae Sol, “Iagho chekeni mae gloku ana mala kulu ari.” Aonu ke leghugna tela teihi mana na, mae Samuel ne cheke eghu ka mae Sol, “Iagho aughu katha vido ikoi balugu iara, eghuteuna iara ginauna toutonu ka iagho unha teke chekeni God ka iara malamu iagho tekuna.”