Ululahu Samuel 7 - Buka Blahi Ka Cheke Holo

¹ Aonu maedi Kiriat-Jaerim igre ne tei hata Bokis Blahi igne. Mare ne lilisei ka nogna suga mae Abinadab te au holo ka thogele na. Eghuteuna mare ne taofini mae Eleasa kaisei thugna mae Abinadab, mala reireghini Bokis Blahi igne.

² Eghuteuna funu ka narane tuana, Bokis Blahi igne ne au jare nabagna varadaki finogha. Ka narane tuare maedi Israel igre ne tanhi ka Lord mala toghodi.

Profet Samuel ne funei gna Israel

³ Profet Samuel ne cheke eghu ka maedi Israel gre, “Jame te magnahaghei figri ghotilo gaoghathomi are teke pulo ka Lord na, ghotilo koko mumuju gna gaꞌase god Astarot baludi keha god are. Eghuteuna ghotilo lisa lao nakarhami fateote'o are ka Lord, eghuteuna ghotilo mala tufru soruni mana kolho. Jame te eghu ghotilo na, mana ginauna fakarhi ghami ghotilo ka nodi nolaghi naiknodi Filistia.”

⁴ Aonu mare ne koko mumuju gna Baal nei mumuju gna Astarot, eghuteuna mare ne funu tufru soruni Lord kolho.

⁵ Aonu mae profet Samuel ne fatei cheke igre ka naiknodi Israel, “Ghotilo mei mala salofodu ka namono Mispa. Jare iara ginauna na tarai ka Lord eimi ghotilo.”

⁶ Aonu mare ne kafe khapru Mispa balugna mae Samuel mae ihei te nodi mae funei mare na. Eghuteuna mare ne krisu khoꞌu ne tofa soru ka glose na jateula fafara eghu ka Lord. Eghuteuna mare ne theome ghamu kaisei narane thongana, eghuteuna mare ne cheke thakleni eigna mare te tapla jafra fara ka tathagna Lord na.

⁷ Kate nomhini te khapru naiknodi Israel gre jare Mispa na, glima king di Filistia gre ne hata armi mala magra ka mare. Eghuteuna kate nomhini u nonomho igne, naiknodi Israel igre ne mhaghu nodi fara.

⁸ Aonu mare ne cheke eghu ka mae profet Samuel, “Iagho tarai heta ka Lord, noda God mala fakarhi ghita ka maedi Filistia!”

⁹ Aonu mae Samuel ne aknu falehe kaisei sipu ikoi ne gahu knoro ka khaꞌaghi jateula kaisei fafara neu ka Lord. Eghuteuna mana ne tarai heta ka Lord mala toghodi naiknodi Israel. Eghuteuna Lord ne nomho ka nogna tharai mana na.

¹⁰ Ka narane te eni mae Samuel u fafara igne, maedi Filistia gre ne kafe thugha mei mala fufunu gna magra na. Nu Lord ne famei fila ne soru poha ke klignadi mare. Aonu mare ne mhaghu nodi fara balu fagoigoli ne rikha kokodi maedi Israel.

¹¹ Eghuteuna maedi Israel igre jifla Mispa ne ngolhidi mae soldiadi Filistia re ne tei thoke rhegna namono Bet-Ka, eghuteuna mare ne aknu falehe ne gnafa mae soldia te tei thafodi mare re.

¹² Eghuteuna ke leghu, mae Samuel ne lisei haghe kaisei thina biꞌo ka kaisei vido farihoteidi phei namono Mispa ghe namono Sanai. Eghuteuna mana kiloni thina igne Ebenesa, naugna mana neke cheke eghu, “Lord na togho ghita fabrahu la ghilei mei posa gognarogne.”

¹³ Aonu Lord ne toghodi soldia di Israel ne tapla faparini armigna Filistia, eghuteuna armi gna Filistia igne neke theome pulo mei magra ke lamnagna kantri Israel ka narane te kegra funei mae Samuel igre.

¹⁴ Hatimare maedi Israel neke hata fapulo ka maedi Filistia nodi namono nei vido eghu te au farihoteidi phei namono Ekron ghe Gat. Eghuteuna ka narane igre mare ne au ka pharikeli baludi keha naikno te au ke lamnagna namono Kenan.

¹⁵ Mae Samuel ne funei ranghidi naiknodi Israel ne ghilei lehe.

¹⁶ Leuleghu finogha na, mana tei ka thilo namono Betel, Gilgal nei Mispa. Naiknore mei koba ka mana ka thilo namono igre mala cheke fajifladi nei mala fadoglidi eghu mana nodi puhi biꞌo nei magra teure.

¹⁷ Nu leuleghu fata na, mana ke pulo mei Rama ka nogna namono na. Eghuteuna mana jaola fatedi puhi biꞌo te edi naiknore. Eghuteuna ka namono igne mana ne eni kaisei olta mala tufru soruni Lord.