Ululahu Samuel 5 - Buka Blahi Ka Cheke Holo

Puhi biꞌo ne thokedi naiknodi Filistia

¹ Kate hata maedi Filistia gre nogna Bokis Blahi God na, mare pala funu ka namono Ebenesa ne tei thoke ka namono Asdod.

² Aonu mare tei ne lilisei lamna ka nogna Sugablahi kaisei nodi god mare te kiloi Degon. Mare ne lilisei rhegna mumuju gna Degon teke horo mare ka thina na.

³ Hamerane boibongi ka keha narane na, naiknodi Asdod igre tei ka Sugablahi na ne filoni mumuju gna Degon igne ne uka pari. Aonu tathagna nei foflogna teu mumuju igne ne tufru soru pari ka glose na ke ulugna nogna Bokis Blahi Lord na. Mare pala haghe mumuju igne ne lilisei fakeli ka mala au gna na.

⁴ Eghuteuna hamerane boibongi ka keha narane na, mare filoni mumuju igne neke uka soruni pari ke ulugna Bokis Blahi na. Nu phaꞌugna nei phei khamegna teu mumuju igne ne klopa, eghuteuna thilo nanghuja igre ne naga tafri ka grengathagna Sugablahi na. Thinigna mumuju igne au sopa neu thegna.

⁵ Naugna igne, te mei posa gognarona, nogna mae pris god igne baludi naiknodi Asdod te tarai ka Degon igre ne theome tapla ka nathapla gna vido aheva teke uka soru Degon igne. Mare tangomana te tei falithui gognarona.

⁶ Ka narane tuare, Lord ne goigonidi naiknodi Asdod baludi naikno te au faligohoni namono tuana, eghuteuna mana eni igne ne thono mhaghu nodi naiknore. Eghuteuna naiknore ne nhuge ka thinidi re.

⁷ Kate filoni igne, naiknodi Asdod gre ne cheke eghu, “Nodi God mae Israel igne la ei puhi biꞌo la thoke ghita tahati balugna noda god Degon! Eghume tahati theome magnahagheni Bokis Blahi igne.”

⁸ Aonu mare ne kurudi keha mae mala tei kilo glima king di Filistia mala mei faidu. Eghuteuna mare ne ghusna eghu ka mae king igre, “Unha nate eni tahati ka nodi Bokis Blahi maedi Israel igne?” Mae king igre ne cheke eghu, “Ghotilo hata fajifla Bokis Blahi tuana mala pala tei Gat.” Aonu mare pala ne tei Bokis Blahi igne Gat, kaisei nodi namono ulu mae Filistia.

⁹ Nu kate hata te tei mare ka namono igne na, Lord jaola ne neneidi naiknogna namono tuana, aonu naiknore ne mhaghu nodi fara ne ghilei fagoigoli, naugna mana ne goigonidi mare balu nhuge biꞌo ka thinidi re, neubane mae kuekuꞌe ba me majaghani.

¹⁰ Aonu mare hata ne tei Bokis Blahi igne Ekron, keha nodi namono mae Filistia. Kate pala mare Bokis Blahi igne te tei thoke Ekron na, naiknogna namono igne ne eha eghu fabiꞌo, “Sei! Mare hata mei nodi Bokis Blahi mae Israel igne ka noda namono tahati gne. Mare jau magnahaghei te falehe ghita tahati sini!”

¹¹ Aonu mare ne kurudi keha mae mala tei cheke eghu ka mae funeidi Filistia, “Ghotilo hata ke pulo Bokis Blahi igne ka namonogna na, mala theome tangomana nodi God mae Israel te falehe ghita na!” Naiknogna namono igne ne kafe mhaghu nodi fara, naugna God ne goigonidi fara naiknore.

¹² Eghuteuna naikno te nhuge nu theome lehe teu igre kabru ghedi fara ne tanhi fabiꞌo ka nodi god thedire mala toghodi.