Ululahu Samuel 4 - Buka Blahi Ka Cheke Holo

¹ Eghuteuna kate cheke mae Samuel na, tharaknagna Israel igne ne kafe fanomho ka mana. Kaisei fata, maedi Israel igre ne tei magra ka maedi Filistia. Maedi Israel igre ne lisei haghe nodi suga tapuale re ka namono Ebenesa, eghuteuna maedi Filistia gre jaola ne lisei haghe nodi suga tapuale re ka namono Afek.

Naiknodi Filistia igre ne hata fajifla Bokis Nhaꞌa Cheke na

² Eghuteuna maedi Filistia igre jifla mei ne magra ka maedi Israel. Mare magra heta ne aknu falehe fati thogha maedi Israel.

³ Kate pulo mei ka namono na maedi Israel teke theome lehe ka magra igre na, nodi mae mala baubatu re ne cheke eghu, “Naugna unha si Lord te snakredi maedi Filistia gre te ulu ghita tahati gognaro gnea? Tahati na kafe tei Saelo mala pala mei nogna Bokis Nhaꞌa Cheke Lord ia. Eghuteuna kate tei tahati ka magra na, Lord ginauna tei baluda tahati mala togho ghita, eghuteuna mae naoka re ginauna theome tangomana te ulu ghita tahati na.”

⁴ Aonu mare ne kurudi keha mae mala tei Saelo, mala pala mei Bokis Blahi na. Phei thugna mae Eli, Hofni ghe mae Finihas, phiamare ne mei balugna Bokis Blahi aheva siasiglagna Lord mae ihei te au nolaghi fateote'o na gnokro jateula king eghu farihoteidi phei engel igre.

⁵ Kate filoni maedi Israel gre nogna Bokis Blahi Lord na te mei thoke ka vido igne na, mare ne thagru fabiꞌo naugna mare ne kelitadi fara, eghuteuna glose na ne nghali tongana.

⁶ Kate nomhini maedi Filistia igre naogla biꞌo igne, mare ne cheke eghu fari thedi, “Tore! Naugna unha si tela thagru fabiꞌo fara mae Hibru grea?” Eghuteuna kate nomhini mare Bokis Blahi igne tela meihi ka vido te au mae Israel igre na,

⁷ mare mhaghu nodi ne fififri fara, ne cheke eghu, “Kaisei god la mei ka nodi namono mare na! Mare ginauna goigoni ghita tahati! Theo kaisei glepo jateula igne teku teke thoke ghita tahati tifa na!

⁸ Nodi God mare igne au nogna nolaghi! Mae ihei gne te tangomana nate hata fajifla ghita ka nogna nolaghi mana na? Igne ngala god mae ihei teke kuru mei puhi biꞌo teke falehedi maedi Ijep ka namono nagou ia.

⁹ Tahati mala kegra heta! Jame te theo na, tahati ginauna mala nodi naikno sneka mae Hibru kolho, jateula mare teke noda naikno sneka tahati tifa ra eghu. Uve, tahati nalhaꞌu sia! Gognarona tahati mala magra heta!”

¹⁰ Aonu mare tei neke magra, eghuteuna naugna te magra heta mare na, mare ne uludi hatimare maedi Israel. Mare ne aknu falehe tolufulu thogha soldia di Israel. Eghuteuna keha maedi Israel rikha ne tei ka nodi namono thedire.

¹¹ Mae Hofni ghe mae Finihas, phei thugna mae Eli igre jaola ne lehe ka magra igne. Eghuteuna maedi Filistia igre hata ne tei nogna Bokis Blahi Lord na.

Mae Eli ne lehe

¹² Kaisei mae ka tharaknagna mae Benjamin teke rikha ka magra na, mana ne tei posa Saelo ka narane tuanala. Mana ne rerheku nogna pohe na ne ghiha glose ka phaꞌugna na fagaglana te diꞌanagnafa na.

¹³ Mae Eli gnokro ka nogna chea na filo neu ka nabrou na, naugna mana nanga nogna fara ka nogna Bokis Blahi Lord na. Aonu mae soldia te rikha igre ne toutonu eigna magra igne ka naiknogna namono na. Aonu kate nomhini igne, naiknore ne thono mhaghu nodi fara ne eha fabiꞌo.

^14-15 Ka narane igne mae Eli nheva salei nhana finogha gna la dofuhi tathagna re. Aonu mae Eli nomhidi te eha fabiꞌo naiknore ne ghusna eghu, “Unha site eha fabiꞌo fara ghotilo gnea?” Aonu mae soldia teke rikha igne tei ka mae Eli ne cheke eghu ka mana,

¹⁶ “Iara rikha ka magra ginei na, eghuteuna iara aongala posa meinga agne gognarogne.” Mae Eli ne ghusna eghu ka mana, “Thuguo, ne faꞌunha?”

¹⁷ Mae igne ne cheke eghu, “Kmana mae noda soldia tahati ra la lehe, eghuteuna ghehati mae te karha teu aro ne rikhani armi gna Filistia na. Eghuteuna keha glepo na, phei mae thumu iagho ra la jaola lehe, eghuteuna maedi Filistia ra hata la tei nogna Bokis Blahi Lord ia.”

¹⁸ Aonu kate nomhini igne, mae Eli ne uka faleghu ka nogna chea na rhegna grengatha gna namono na. Mana khoko soru ka glose na ne klopa grara na ne lehe, naugna mana thono kuekuꞌe fara, nei jaola blokha fara. Mae Eli neke funei ka naiknodi Israel phiatutu finogha.

Khetogna mae Finihas na ne lehe

^19-20 Ka narane tuare, khetogna mae Finihas na bukla namo karha neku thugna na. Kate nomhini naꞌa te hata mae soldia di Filistia gre nogna Bokis Blahi Lord na, eghuteuna khetogna ghe ivagna re kafe lehe ka magra teuna. Naꞌa funu kabru thugna na ne namo lehe, eghuteuna goro gaꞌase te toghoni naꞌa igre ne cheke eghu, “Iagho thosei mhaghu! Iagho au kaisei thumu nalhaꞌu!” Nu naꞌa ne theome fanomho ka reꞌe nei jaola theome chekehi.

^21-22 Naꞌa ne kiloni thugna na, Ikabod, gaoghathogna na, “Siasigla gna nogna nolaghi God na la dofini. Naꞌa nhaꞌa lao nangha igne naugna mae soldia di Filistia ra la hatahi Bokis Blahi na, eghuteuna naugna ivagna naꞌa ghe khetogna re jaola neke lehe.”