Ululahu Samuel 31 - Buka Blahi Ka Cheke Holo

King Sol nei thilo mae thugnare ne lehe

¹ Armi gna Filistia na mei ne magra ka armi gna Israel ka Thogele Gilboa. Eghuteuna mae Filistia igre magra heta ne aknu falehe kmana maedi Israel. Eghuteuna keha mae ka maedi Israel igre ne rikha.

² Nu mae soldia di Filistia igre ne ngolhi leghuni mae king Sol baludi thilo mae thugna mana re, mae Jonatan, mae Abinadab nei mae Malkisua, ne tei aknu falehe thilo thugna mana re.

³ Magra igne raꞌe ne biꞌo fara ka vido te au teu mae Sol igne. Hatimare mae naoka gre ne fadi jatani mana.

⁴ Aonu mae Sol ne cheke eghu ka mae majaghani te pala nogna glepo mala magra mana re, “Iagho atha nou naflahi mala magra na mala aknu falehe ghaula iara. Theome keli te au teu iara agne te mei mae bongihehedi Filistia igre te mei maꞌe ghau nei falehe ghau teu iara na.” Nu mae majaghani igne ne thono mhaghu nogna fara, ne theome leghuni unha te chekeni mana na. Aonu mae Sol ne korho fajifla nogna naflahi mala magra thegna na ne uka soru ke kligna gna ne lehe.

⁵ Kate filoni te lehehi mae Sol igne, mae majaghani igne jaola ne korho fajifla nogna naflahi mala magra thegna na ne uka soru ke kligna gna ne lehe balugna mae Sol.

⁶ Mae Sol, thilo mae thugna re, mae majaghani igne, nei nogna soldia mana re eghu ne kafe lehe ka narane igne.

⁷ Naiknodi Israel te au ka keha phile glogu Jesrel, nei ke maghati khoꞌu Jordan teu igre ne nomhini te rikha armi gna Israel na, eghuteuna mae Sol baludi thilo mae thugna re te kafe lehe ka magra igne. Aonu mare mhaghu nodi fara ne rikha ne jifla ka nodi namono re. Mae Filistia igre mei ne atha nodi namono mare igre.

⁸ Ka keha narane na, hatimare mae soldia di Filistia igre mei ne atha nodi gobigna lepo mae soldia teke lehe ka magra igne. Mare ne filoni thinigna mae Sol na baludi thinidi thilo mae thugna mana re ka Thogele Gilboa.

⁹ Aonu mare ne kusu phaꞌugna mae king Sol na, eghuteuna mare ne atha nogna phoko mala magra mana na. Aonu mare ne fatei tei nonomho ka namono te gnafa, ka nodi Sugablahi mumuju te gnafa, nei ka nodi mavitu te gnafa ka kantri Filistia.

¹⁰ Mare ne lilisei nogna glepo mala magra mae Sol re ka nogna Sugablahi god gaꞌase Astarot. Aonu mare ne fagefe haghe thinigna mana na ka gringni thina biꞌogna namono Bet-San.

¹¹ Nu naikno te au Jebis Gilead igre ne nomhini unha te eni mae Filistia igre ka mae Sol igne,

¹² ne jifla bongiro ne tei atha thinigna mae Sol na baludi thinidi thilo mae thugna mana re Bet-San. Mare pala thinidi fati mae igre neke pulo Jabes ne gnubra jare.

¹³ Aonu mare atha nhubradi fati mae igre ne giugilui ke parigna gaju tamaris. Mare diꞌanagnafa ne theome ghamu nabagna fitu narane.