Ululahu Samuel 30 - Buka Blahi Ka Cheke Holo

Mae Devet ne tei magra ka naiknodi Amalek

^1-2 Kate tei teu delei mae Devet baludi nogna mae soldia igre balugna mae funei Akis igne, maedi Amalek igre mei ne snura ka nohi ke mata Juda nei Siklag. Mare ne theome aknu falehe naiknore. Nu mare ne kafe atha ne tei goro gaꞌase, sua nei mae biꞌo teu gna namono Siklag. Aonu mare ne faghamu khaꞌaghi nodi namono mare na. Kate posa mei mae Devet baludi nogna mae soldiare Siklag ka fatilo narane na,

³ mare filoni namono na la faghamu khaꞌaghihi maedi Amalek. Eghuteuna mare jaola ne atha khetodi nei thudi teu mare re.

^4-5 Mare jaola ne atha phei khetogna mae Devet ra, Ahinoam ghe Abigel. Aonu mae Devet nei nogna mae soldiare eghu ne tanhi ne ghilei glaꞌe soru.

⁶ Kate dofidi khetodire ka namono na, nogna soldia mae Devet igre ne diꞌa tadi fara ne rodi fada thina ni mana. Nu Lord, nogna God mae Devet igne ne farerheta gaoghathogna mana na.

⁷ Aonu mana tei ne filoni mae pris Abiata, thugna mae Ahimelek. Aonu mana ne cheke eghu ka mae Abiata, “Atha mei efod blahi ia mala tarai ka Lord.” Aonu mae Abiata atha ne mei phoko blahi igne.

⁸ Aonu mae Devet ne cheke ka mana mala tore eghu ka Lord, “Ba, iara tangomana ngau te tei ke leghudi mae te mei goigoni ghami ghehati ra? Jame te tei ghehati na, ghehati ginauna na tei thokedi mare?” Lord ne cheke tughu eghu ka efod blahi igne, “Iagho ginauna tangomana nate tei fakarhidi nou naiknore. Tei sagho ke leghudi, iagho ginauna na tangomana nate tei thokedire mala ke atha fapulo naikno teke atha mare ra.”

^9-10 Aonu mae Devet ne jifla balugna namno gobi mae. Kate tei te posa mare ka khoꞌu te kiloi mare Besoa igne, mae Devet ne lisei soru phei gobi mae mala au ka vido igne baludi nodi gobigna lepore, naugna mare tei la ghilei babaꞌo fara la theome naba te tei kasa ka glogu khoꞌu igne. Nu mana ne atha balugna fati gobi mae.

^11-12 Kate tei mare na, mare ne thafoni kaisei mae sitei gna Ijep ka namono nagou na. Aonu mare ne atha mae sitei igne ne mei ka mae Devet. Mare ne tusu lao khoꞌu nei keha fig nei phei piha grep gata eghu ka mana. Mae sitei igne theome ima nei theome koꞌu eghu nabagna thilo narane nei thilo bongi. Eghuteuna kate ima te gnafa na, mana neke rheta fapulo thinigna na.

¹³ Aonu mae Devet ne ghusna eghu ka mana, “Iagho maemu aheva, mae ihei nou mae funei iagho na?” Eghuteuna mae sitei igne ne cheke eghu, “Iara maegu Ijep. Iara nogna mae sneka kaisei mae gna Amalek. Nogu mae funei iara igne la tei koko ghauhi iara naba thilo narane, naugna iara ne fogra.

¹⁴ Ghehati neke tei magra neke blau fahui nodi glepo naiknodi Keret, nei ka nohi ke mata Juda, nei ka vikegna mae Kelab. Ghehati neke blau nodi gobigna lepo mare re, eghuteuna ghehati jaola faghamu khaꞌaghi namono Siklag.”

¹⁵ Mae Devet ne ghusna eghu ka mana, “Ba, iagho tangomana te atha ghami ghehati te tei ka vido aheva te au teu mare na?” Mana ne cheke eghu, “Uve, iara tangomana jame te nhaꞌa cheke iagho ka nanghagna God te mala thosei falehe ghau iara na, eghuteuna thosei ke snakre fapulo ghau iara ka nogu funei na teuna, iara ginauna na atha ghami ghotilo tei.”

¹⁶ Aonu mana athani mae Devet ne tei ka vido aheva te au teu mare na. Ka narane igne, maedi Amalek igre au tafri neu ka vido te snagla na, ima ghedi nei koꞌu ghedi eghu neu jare. Mare ne eꞌei gaghamu biꞌo, naugna mare ne atha kmana glepo funu Filistia nei ka nohi Juda.

¹⁷ Hamerane boibongi ka keha narane na, mae Devet balugna fati gobi mae igre mare tei ne magra ka mare. Eghuteuna mare magra ne ghilei rafi ka narane igne. Eghuteuna mae Devet balugna nogna mae soldia igre magra heta ne ghilei aknu falehedi ne hui maedi Amalek igre, nu fati gobi mae majaghani teke saghe ka kamel ra ngala te rikha na.

¹⁸ Mae Devet neke atha fapulo phei khetognare baludi gobigna lepo teke atha mae Amalek ra.

¹⁹ Mana kafe atha fapulo ne gnafa goro mae majaghani, mae biꞌo, naikno biꞌo, sua nalhaꞌu, gaꞌase, nei gobigna lepo teke blau hatimare mae Amalek ra.

²⁰ Eghuteuna mana jaola ne atha nodi sipu, nei buluka teu maedi Amalek igre. Kate figri teke pulo ka namono na, nogna soldia mae Devet igre ne lilisei ke uludi sipu nei buluka teudi Siklag gre nodi sipu nei buluka teu mae Amalek gre. Aonu mare ne cheke eghu, “Sipu nei buluka teu igre neke uludi mae Devet ka magra.”

²¹ Mae Devet neke pulo ka phei gobi mae teke au fapulo teku ka khoꞌu Besoa. Mae igre neke babaꞌo nodi fara neke theome tei baludi mare. Kate filoni mae Devet na, mae igre ne kafe thugha mei ne thafoni mana baludi iheire teke pulo mei balugna manare. Kate mei te namo ka mare na, mae Devet ne cheke fakelidi mare.

²² Nu keha mae teke tei balugna mae Devet te diꞌa puhidire nei ghamu nhoto teu igre ne cheke eghu, “Mae igre neke theome tei baluda tahati! Mare theo nodi nolaghi ka gobigna lepo teke tei atha tahatira! Te keli na mare atha khetodi nei thudi teu are kolho.”

²³ Nu mae Devet ne cheke eghu ka mare, “Theo, thabusiguro. Thosei eni puhi tuana ke leghugna unha Lord teke tusu ranghi ghita na. Mana neke batu ghita nei togho ghita neku neke uludi tahati mae naoka teke goigoni ni noda namono tahati ia.

²⁴ Theo kaisei mae ka tahati te magnahaghei nomhini nafnata cheke te eni ghotilo tuana! Tahati te gnafa na mala kafe tufa fananaba ngala ka mae ihei teke au faleghu teku baludi noda gobigna lepo tahati ra, nei mae ihei teke tei ka magra ia eghu.”

²⁵ Aonu mae Devet ne eni vetula igne, eghuteuna funu ka narane igne, hatimare mae Israel leghuni vetula igne ne ghilei mei posa ka narane igne.

²⁶ Kate pulo mei mare Siklag, mae Devet ne atha keha glepo teke uludi ka magra na ne fei nodi kheragna te baubatu ka nohi Juda ne cheke eghu ka mare, “Igne nomi namha ghotilo na vido glepo teke atha ghehati ka nogna naoka Lord ra.”

²⁷ Mana fatei glepo igre ka hatimare mae lida ka namono Betel, nei Rama ke mata Juda, nei ka mae mala baubatu ka glima namono igre, Jatia,

²⁸ Aroa, Sifmot, Estemoa

²⁹ nei Rakol. Mana jaola ne fatei ka mae biꞌo teke vikegna mae Jeramel nei ka vikegna mae Ken.

³⁰ Eghuteuna mana jaola fatei namha ka mae te mala baubatu ka fati namono igre, Homa, Borasan, Atak

³¹ nei Hebron. Eghuteuna mana jaola fatei namha ka hatimare mae mala baubatu ka keha namono teke au balugna mana tifa ra.