Ululahu Samuel 3 - Buka Blahi Ka Cheke Holo

Lordne kiloni Samuel

¹ Mae sua Samuel igne ne toghoni mae Eli mala eni nogna gloku Lord na. Ka narane tuare, theome kmana mae kolho teke tusu lao nogna cheke na ka mare. Eghuteuna mana neke theome fakakhana kaisei mifi ka mare.

² Eghuteuna jaola ka narane igre, mae Eli la kuekuꞌehi, eghuteuna phei tathagna re la diꞌahi, la theome tangomana hi te fifilo na. Kaisei bongi mana thuru neu ka nogna chogho na,

³ eghuteuna mae Samuel thuru neu ka nogna Sugablahi Lord aheva te au teu Bokis Nhaꞌa Cheke na. Namo rane kate phae teu Juta gna Chogho Blahi na,

⁴ Lord ne kiloni mae Samuel. Aonu mae Samuel ne cheke eghu, “Uve! Iara au teu ao!”

⁵ Eghuteuna mana chari ne tei ka mae Eli ne cheke eghu, “Iara nomhi nigho iagho te eha ghau iara ia, tela mei iara gne.” Nu mae Eli ne cheke eghu ka mana, “Iara neke theome eha nigho iagho. Iagho ke pulo thuru.” Aonu mana pulo neke thuru.

^6-7 Ke leghugna igne, Lord neke fapea kiloni mae Samuel. Nu mana theome laseni Lord ne kiloni mana teuna, naugna Lord neke theome cheke balugna mana tifa na. Mana kegra haghe ne tei filoni mae Eli ne cheke eghu ka mana, “Iagho kilo ghau iara, tela mei iara ao.” Nu mae Eli ne cheke eghu ka mana, “Mae sitei, iara theome kilo nigho iagho. Ke pulo thuru sagho.”

⁸ Lord ne fatilo fata kiloni mae Samuel. Aonu mana kegra haghe ne tei filoni mae Eli ne cheke eghu, “Iagho kilo ghau iara, tela mei iara ao.” Aonu mae Eli laseni, Lord ngala te kiloni mae Samuel igne.

⁹ Aonu mae Eli ne cheke eghu ka mana, “Ke pulo thuru sagho.” Eghuteuna jame te nomhini iagho te kilo nigho mana na, iagho na cheke eghu, “Lord, cheke mei sagho. Iara nou mae gloku iagho, iara fanomho kobau ka iagho.” Aonu mae Samuel ne nomhini nogna cheke mae Eli igne neke pulo thuru ka nogna sape na.

¹⁰ Eghuteuna ke leghugna igne, Lord neke pulo mei neke kegra ka vido igne neke kiloni mana jateula teke ululahu ia neu ne cheke eghu, “Samuel, Samuel.” Eghuteuna mae Samuel ne cheke eghu, “Cheke mei sagho Lord, iara nou mae gloku iagho, iara fanomho kobau ka iagho.”

¹¹ Eghuteuna Lord ne cheke eghu ka mae Samuel, “Fanomho fakeli. Theome raugha iara ginauna eni kaisei glepo te diꞌa fara ka naiknogna kantri igne. Eghuteuna kate nomhini naiknore glepo igne, mare ginauna rhana nodi fara tagna.

¹² Ka narane tuare, iara ginauna edi gobigna lepo teke chekedi iara ranghini tharaknagna mae Eli, eghuteuna theo kaisei glepo nate jafra na.

¹³ Eigna iara neke chekehi ka mana, iara ginauna parani fabrahu tharaknagna mana na, naugna phei mae thugna mana igre ne goigonini nanghagu iara na. Eghuteuna mana lasediu ngala glepo te diꞌa te edi phiamare igre, nu mana ne theome chekedi phiamare neu.

¹⁴ Eghume iara neke cheke faheta ka mae Eli balugna tharaknagna mana na, eigna theome tangomana kaisei fafara ba unha te tusu lao ka mana na nate fatheꞌoni papara te nabagna nakhibodi mare re.”

¹⁵ Aonu mae Samuel nomhini cheke igne ne thuru soru ka nogna sape na ne ghilei rane. Eghuteuna kate dofra haghe hamerane na, mae Samuel tei ne tora grengathagna nogna Sugablahi Lord na. Nu mae Samuel ne mhaghu nogna te cheke thakleni cheke igne ka mae Eli na.

¹⁶ Eghuteuna mae Eli ne kiloni mana ne cheke eghu, “Thuguo Samuel, mei sagho!” Aonu mae Samuel ne cheke eghu, “Uve, iara au teu ao!”

¹⁷ Eghuteuna mae Eli ne cheke eghu ka mana, “Unha te chekeni Lord ka iagho na? Iagho thosei poruni kaisei cheke ka iara. Jame te pophoru iagho keha cheke ka iara na, God ginauna para nigho iagho.”

¹⁸ Aonu mae Samuel ne chekedi ka mana nogna cheke Lord igre, ne theome poruni kaisei glepo ka mana. Aonu mae Eli ne nomhini igne ne cheke eghu, “Mana ngala Lord na. Mana tangomana te eni unha te doglo ka mana na.”

Lordne au balugna mae Samuel

¹⁹ Kate mae biꞌohi mae Samuel na, Lord ne au balugna mana fabrahu. Eghuteuna mana ne edi fabrahu gobigna lepo teke chekedi mae Samuel nate thoke mei tutuani.

²⁰ Mare te gnafa ka tharaknagna Israel, te funu ka namono Dan ke maghati te tei posa ka namono Bereseba ke mata na, mare tangomana te mala jateula kaisei nogna profet tutuani teu Lord na.

²¹ Eghuteuna leuleghu fata na Lord tangomana te mei ka mae Samuel Saelo, te cheke ka mana na.