Ululahu Samuel 29 - Buka Blahi Ka Cheke Holo

Mae Devet neke figri Siklag

¹ Aonu armi gna Filistia ne loku fodu ka namono Afek, eghuteuna hatimare mae Israel ne mei lisei haghe nodi suga tapuale rhegna glokha khoꞌu Jesrel.

² Glima mae funeidi Filistia re jifla ne tei ka magra balu nodi soldiare. Mare au ka tothoghei kaisei thogha nei kaisei gobi soldia. Eghuteuna mae Devet balugna nogna mae soldiare ne loku fodu baludi mare ne tei ke leghugna mae funei Akis.

³ Nu kate filoni mae Devet na, hatimare mae komanda ka armi gna Filistia igre ne cheke eghu, “Tore, mala tei aheva si charadi Hibru igrea?” Nu mae funei Akis ne cheke eghu, “Tifa na mae Devet gne neke kaisei nogna mae biꞌo mae king Sol, maegna Israel. Mana au raughahi balugu iara. Funu ka narane te au balugu iara te ghilei mei posa ka narane igne, iara theome filoni kaisei glepo te diꞌa te eni mana na.”

⁴ Nu hatimare mae komanda ne diꞌa tadi fara ka mae Akis. Aonu mare ne cheke eghu ka mana, “Iagho ke kuru fapuloni mala ke figri mana ka namono aheva teke tusu lao iagho ka mana na. Iagho thosei snakreni mae tuana mala tei baluda tahati ka magra. Glahu kate magra na, mana ginauna nake figri nake falehe ghita tahati. Jame te kusu mana graradi noda mae soldia tahati igre na, tuana kaisei puhi nate thofno kelitagna fara nogna mae funei na.

⁵ Eghuteuna mae igne neke fnakno fara nanghagna na ka goro gaꞌasedi Israel ra. Rehati neke ragi nei koje neku neke cheke eghu tifa ia, “King Sol neke aknu falehe kaisei thogha naoka, nu mae Devet neke aknu falehe nabotho thogha.”

⁶ Aonu mae Akis ne ehani mae Devet ne cheke eghu ka mana, “Iara magnahaghei nigho iagho te mei balugu ka magra. Nu te chekeni iara ka iagho na, ka nanghagna Lord mae ihei te karha te tifa, iara theome filoni kaisei glepo te diꞌa te eni iagho funu meimu ka iara te ghilei mei posa ka narane igne. Nu hatimare mae komanda igre theome keli tadi ka iagho.

⁷ Eghume, te keli na iagho ke pulo ka pharikeli. Eghuteuna iagho thosei eni kaisei glepo te mala fadiꞌa nagnafadi mae funeidi Filistia igre.”

⁸ Aonu mae Devet ne cheke eghu, “Funei, unha gne teke eni fadiꞌa iara na? Unha gne te filoni iagho teke eni iara funu ka narane te mei loku iara ranghi nigho te ghilei mei posa ka narane igne? Naugna unha site theome tei iara te magridi nogna naoka nogu funei gnea?”

⁹ Mae Akis ne cheke eghu, “Tutuani fara, iara lase nigho iagho. Iara theome filoi kaisei glepo te jafra ka iagho. Te laseni iara na, iagho thofno keli fara ranghi ghau iara jateula kaisei engel nogna God eghu. Nu neuba, te chekeni mae komanda igre na, iagho theome nabamu te mei balumi ghehati ka magra na.

¹⁰ Nathuꞌu hamerane boibongi kate aꞌaga narane na, iagho baludi nou mae soldia gre jifla ka vido igne.”

¹¹ Aonu hamerane boibongi ka keha narane na, mae Devet baludi nogna mae soldiare neke figri Filistia, nu armi gna Filistia igne ne tei ka glogu Jesrel.