Ululahu Samuel 28 - Buka Blahi Ka Cheke Holo

Armi gna Filistia tarabana mala magra ka mae Israel

¹ Ka narane igne, mae soldiadi Filistia igre ne loku fodu mala tei magra ka maedi Israel. Mae Akis ne cheke eghu ka mae Devet, “Te mala laseni iagho na, iagho na hata nou mae soldia gre mala loku fodu ka nogu armi iara gne.”

² Mae Devet ne cheke eghu, “Keliu ngala, iagho na filoni unha nate eni iara nou mae gloku gne.” Aonu mae Akis ne cheke eghu, “Thofno keli fara, iagho ginauna mala au fabrahu ka gloku igne mala reireghi fakeli ghau iara.”

Mae Sol ne cheke ka tharungagna mae Samuel

³ Kate lehe mae Samuel na, naiknodi Israel re ne diꞌanagnafadi fara ne tanhini mana. Aonu mare ne giugiluni mana Rama ka nogna namono na. Eghuteuna king Sol neke khi fajifladi hi Israel mae nalhaꞌu ba gaꞌase te cheke ka tharungadi naikno tela lehe hi tifa re.

⁴ Aonu, kate nomhini king Sol te mei armi gna Filistia igne te au rhegna namono Sunem gne, King Sol jaola ne loku fodu nogna armi na ne mei au ka Thogele Gilboa.

⁵ Kate filoni mae Sol armi gna Filistia igne, mana mhaghu ne bobolo nogna fara.

⁶ Aonu mana ne tarai ne toreni Lord unha nate eni mana na. Nu Lord ne theome cheke tughuni nogna tharai mana na, eghuteuna theo kaisei cheke tughu te mei ka mifi, ba ka hatimare mae pris, ba ka hatimare mae profet.

⁷ Aonu mana ne cheke eghu ka nogna mae biꞌo re, “Ghotilo tei hironi kaisei naikno biꞌo te lase cheke ka tharungadi naikno tela lehe hira mala laseni iara cheke tughu gna na.” Mare ne cheke eghu ka mana, “Kaisei naikno biꞌo te lase cheke baludi tharungadi naikno tela lehehi tifa ra naꞌa au ka namono Endo.”

⁸ Aonu mae Sol ne tughu nogna pohe na mala theome tangomana kaisei naikno te filo glani mana na. Kate romno na, mana ne atha phei mae balugna ne tei filoni naikno biꞌo na, ne cheke eghu ka naꞌa, “Iara magnahaghei nigho iagho te cheke ka tharungagna kaisei mae tela lehehi tifa ia mala laseni iara unha nate thoke mei ginauna. Iara ginauna na chekeni nanghagna mana na, eghuteuna iara magnahaghei nigho iagho te kilo meini mana.”

⁹ Nu naikno biꞌo igne ne cheke eghu ka mana, “Tore, iagho ihoni si teke khi fajifladi king Sol iheire te au meresin nei iheire te cheke ka naitu nhaghe teura? Iagho jau mei faꞌeiꞌei ghau iara mala mei mare falehe ghau iara eghu sini?”

¹⁰ Mae Sol ne cheke eghu ka naꞌa, “Thosei mhaghu! Iara nhaꞌa cheke ka nanghagna Lord mae ihei te karha te tifa, theome tangomana kaisei naikno nate para nigho iagho eigna glepo igne.”

¹¹ Naꞌa ne cheke eghu ka mae Sol, “Ihei te magnahagheini iagho te mala kilo meini iara na?” Mae Sol ne cheke eghu, “Profet Samuel.”

¹² Kate filoni naꞌa profet Samuel na, naꞌa ne eha eghu fabiꞌo, “Naugna unha sagho te faꞌeiꞌei ghau iara gnea? Iagho king Sol!”

¹³ Aonu mana ne cheke eghu, “Thosei mhaghu! Unha te filoni iagho na?” Naꞌa ne cheke eghu, “Iara ne filoni kaisei naitu ne thagra haghe ka glose na.”

¹⁴ Mae Sol ne cheke eghu, “Jateula mae ihei eghu te filoni iagho na?” Naꞌa ne cheke eghu, “Iara ne filoni kaisei mae khuekuꞌe te haghe na. Mana fahaghe kaisei pohe brahu.” Mae Sol laseni mae igne, mae Samuel ngala. Aonu mana ne pogho soru pari ka glose na.

¹⁵ Mae Samuel ne cheke eghu ka mae Sol, “Naugna unha sagho te goigoni ghau iara gnea? Naugna unha sagho te korho fapulo ghau iara gnea?” Mae Sol ne cheke eghu, “Iara au ka puhi biꞌo fara! Armi gna Filistia ginau mei magra ka iara, eghuteuna God na tirogna ghatho ghauhi iara. Mana jaola tei koko ghau iara ne tirogna cheke tughu mei ka hatimare mae profet, ba ka mifi. Naugna igne te kilo mei nigho iara na. Iara magnahaghei nigho iagho te mei cheke ranghi ghau unha nate eni iara na.”

¹⁶ Mae Samuel ne cheke eghu, “Lord na nou naoka iagho la tei koko nighohi. Eghume naugna unha sagho te toreni glepo igne ka iara gnea?

¹⁷ Glepo te edi ka iagho gognaro gre, glepo neke chekedihi iara ka iagho tifa. Lord na la atha fadeleihi ka iagho nolaghi na kela tusu laohi ka mae kheramu Devet mala funei fruni ni Israel.

¹⁸ Mana neke chekenihi glepo igne ka iagho. Mana neke cheke ka iagho mala tei aknu falehe hui naiknodi Amalek. Eghuteuna iagho mala goigoni fahui nodi gobigna lepore neku, nu iagho neke theome leghuni unha te cheke mana na.

¹⁹ Eghume nathuꞌu na, Lord ginauna toghoni armi gna Filistia mala uluni armi gna Israel. Eghuteuna iagho baludi thilo mae thumu are ginauna mei au balugu iara ka namonodi mae te lehe igre.”

²⁰ Kate nomhini igne, mae Sol ne mhaghu nogna fara ne ghosei ne khoko soru pari ka glose na. Eghuteuna thinigna mana na jaola ne glaꞌe fara, naugna mana ne theome ghamu nei theome koꞌu neu kaisei narane thongana, nei kaisei bongi thonga na neu.

²¹ Naikno biꞌo na ne mei rhegna mana. Eghuteuna kate filoni mana te mhaghu te salaꞌui fara na, naꞌa ne cheke eghu, “Funei, neuba iara ne luvuhi nakarhagu na, iara la enihi unha teke toreni iagho na.

²² Gognaro na iagho eni unha teke chekeni iara na. Faꞌuveni katha vido gano nate tusu ari iara tamu na mala ghamu iagho ke rheta fapulo thinimu na.”

²³ Nu mae Sol tirogna ne cheke eghu, “Iara tirogu ghamu.” Phei nogna mae gloku mana re ne toghoni naikno biꞌo igne ne toreni fara mana mala ghamu. Aonu mana fanomho ka retilo ne kegra haghe ka glose na ne gnokro haghe ka sape na.

²⁴ Naikno biꞌo igne ghosei ne tei aknu falehe kaisei sua buluka te blokha ne kuki. Naꞌa atha keha flaoa ne kuki keha bret te theo isi gna na.

²⁵ Naꞌa atha ne mei lilisei ke ulugna mae Sol nei phei nogna mae gloku mana re neu, aonu thilo mare ghamu ne boho. Kate ghamu te boho na, thilo mare ne jifla ka bongi tuanala.