Ululahu Samuel 27 - Buka Blahi Ka Cheke Holo

Mae Devet ne tei au baludi mae Filistia

¹ Nu mae Devet ne cheke eghu ka gaoghatho gna thegna na, “Keha narane mae king Sol ginauna falehe ghau iara. Te keli na iara na rikha tei au Filistia. Jame te tei au iara jare na, mana ginauna na theome hiro ghau iara agne Israel. Mana ginauna theome tangomana te goigoni ghau iara na.”

^2-3 Aonu mana ne atha phei khetognare, Ahinoam thaugna Jesrel ghe Abigel thau teke lehe kokoni mae Nabal ka Thogele Kamel. Aonu mae Devet jaola ne atha namno gobi mae ne jifla ne tei balu khetodi nei thudi teure ne tei au ka namono Gat. Ka namono te funei mae Akis thugna mae Maok.

⁴ Eghuteuna kate nomhini te rikha te tei au mae Devet Gat igne, mae Sol ne theome ke fariu riu hironi mana.

⁵ Mae Devet ne cheke eghu ka mae funei Akis, “Jame te keliu ngala teu iagho na, iagho snakre mei kaisei namono ikoi mala au iara. Theome keli iara nou mae gloku gne te au balumu iagho na.”

⁶ Aonu mae Akis ne snakreni namono Siklag ka mana. Funu ka narane tuana, namono Siklag igne nodi mae king di Israel ghilei mei posa ka narane gognarogne.

⁷ Mae Devet ne au soru ke lamnadi mae Filistia kaisei finogha fati nhigra.

⁸ Ka narane te au mae Devet ka namono igre, mana neke tei baludi nogna mae soldia re neke magra ka vikegna mae Gesua, ka vikegna mae Giresi, nei ka vikegna mae Amalek. Mare au ka nodi namono mare te funu Telaem igre tei posa Sua nei tei posa Ijep.

⁹ Leuleghu fata na, mae Devet aknu falehe goro mae nalhaꞌu nei gaꞌase teure, nu mana atha nodi sipu, buluka, dongki, kamel nei pohe teu naiknodi namono igre. Eghuteuna leuleghu fata na mana ke tei filoni koba mae funei Akis.

¹⁰ Ka narane tuare, mae Akis ne ghusna eghu ka mae Devet, “Gognarona iagho na tei magra aheva?” Mae Devet cheke ka mae funei Akis aheva nate tei magra mana te funu ka namono nagou ka nohi Juda, nei ka nohi Jeramel, nei ka nohi Ken.

¹¹ Leuleghu fata kate tei mana ka kaisei namono na, mana aknu falehe hui gaꞌase nei nalhaꞌu teugna namono tuana mala theo kaisei naikno te tei Gat te toutonu eidi glepo te edi mana igre. Ka narane te au teu mae Devet Filistia igre, mana eni koba nafnata puhi igne.

¹² Aonu mae Akis ne fatutuani ni mae Devet ne cheke eghu, “Mae Devet gne maegna Israel, nu nogna naikno manare jame tirodini mana gognarona. Eghume, mana ginauna mala loku ranghi ghau iara fabrahu.”