Ululahu Samuel 26 - Buka Blahi Ka Cheke Holo

Mae Devet fapea fata fakarhini King Sol

¹ Kaisei fata, keha mae ka namono Sif tei ne filoni king Sol Gibea. Mare toutonu ka mana te poru teu mae Devet ka thogele Hakila rhegna Jesimon.

² Aonu mae Sol atha thilo thogha soldia ne tei hironi mae Devet ka namono nagou Sif.

³ Mare tei ne au ka thogele Hakila rhegna nabrou na. Ka narane igne, mae Devet au neu ka namono nagou na. Mana nomhini te mei hironi mana mare na.

⁴ Aonu mana kurudi keha mae mala tei nomhi fakelini thoutonu igne, te tutuani ba theo teuna. Nu te chekeni mare na, thoutonu igne tutuani fara.

⁵ Mae Devet tei ne filoni thofno vido te thuru teu mae Sol ghe mae Abna thugna mae Ner, nogna komanda mae Sol igne. Mae Devet ne filodi phiamare te thuru teu farihoteidi hatimare mae soldia.

⁶ Mae Devet ne ghusnadi mae Ahimelek maegna Het, ghe mae Abisae thugna mae Seruia thabusigna mae Joab, “Mae ihei ka ghopa nate mei balugu iara te mala ruma lamna ka vido te au teu mae Sol na?” Mae Abisae ne cheke eghu, “Iara na ari balumu iagho.”

⁷ Aonu ka bongi tuana, mae Devet ghe mae Abisae ne ruma ka vido te au teu mae Sol igne. Mae Sol ne thuru fari hotei balu nogna goru te farafa haghe teu rhegna pha'ugna na. Mae Abna baludi mae soldia re thuru faligohoni neu mana.

⁸ Mae Abisae ne cheke eghu faꞌikoi ka mae Devet, “Ka bongi gognarogne God snakreni nou naoka iagho igne ka nou nolaghi iagho. Snakre ghau iara sagho mala fada balu gloseni iara ka nogu goru gne. Iara tangomana te kaisei fata fada nu la lehe la mana teuna.”

⁹ Nu mae Devet ne cheke faꞌikoi eghu ka mana, “Theo, iagho thosei faleheni mana! Eigna God ginauna parani ihei te faleheni king teke vavahi mana na.

¹⁰ Te chekeni iara ka iagho na, Lord mae ihei te karha te tifa na ngala nate laseni narane nate lehe mana na, ka vido te kuekuꞌe ba ka vido te tei mana ka magra.

¹¹ Iara theome magnahaghei te faleheni mae king teke vavahi God na. Tapa na atha nogna goru nei ghegna botol khoꞌu teu mana igre kolho mala tei baluda.”

¹² Aonu mae Devet ne atha goru balugna botol khoꞌu teke au rhegna phaꞌugna mae Sol igre ne jifla ne tei. Eghuteuna theo kaisei mae ka mare te filodi phiamare na, ba te laseni glepo igne, naugna Lord na fathuru ihodi fara mare.

¹³ Mae Devet ne tei kasa ka keha phile glogu na ne haghe kegra ka thogele te khaba fara ka mare na.

¹⁴ Mae Devet ne eha eghu fabiꞌo ka mae Abna nei ka nogna armi mae king, “Ghema Abna! Iagho nomhi ghau iara ba theo?” Mae Abna ne eha eghu fabiꞌo, “Iagho mae ihei te eha mei igne, iagho fadofrani king.”

¹⁵ Mae Devet ne eha eghu fabiꞌo fara, “Ghema Abna! Iagho kaisei nodi mae biꞌo hatimare mae Israel! Naugna unha sagho te theome reireghi fakelini nou mae funei gnea? Kaisei mae neke ruma ka nomi suga ghotilo ana mala faleheni mae king neku.

¹⁶ Iagho theome eni kolho nou gloku na! Iara thofno cheke kate tutuani fara ka nanghagna Lord mae ihei te karha te tifa. Ghotilo jame neke kafe lehehi. Lord neke vahini nomi mae funei ghotilo ana mala king neku, nu ghotilo theome reireghi fakelini mana! Faghila filo tafri si ghotilo! Ahevau nogna goru mae king ia? Ahevau ghegna botol khoꞌu mana ia?”

¹⁷ Aonu king Sol ne glani naoglagna mae Devet na ne ghusna eghu, “Devet, thuguo Devet! Naoglamu iagho site nomhini iara ignea?” Eghuteuna mae Devet ne cheke eghu, “Uve, nogu funei nei nogu king. Iara ngala.”

¹⁸ Mae Devet jaola ne cheke eghu, “Naugna unha sagho te ngolhi tafri ghau iara nou mae gloku gnea? Unha najafra teke eni iara ka iagho na? Ba, unha glepo te diꞌa teke eni iara na?

¹⁹ Nogu funei nei nogu king, iagho fanomho ka cheke nate chekeni iara igne. Jame teke gaoghatho Lord te mala diꞌatamu iagho ka iara na, kaisei fafara jame teke figrini gaoghathogna mana na mala teke keli ka iara na. Nu jame teke keha maei kolho te eni ka iagho te mala diꞌatamu ka iara na, lisa lao ka Lord mala thoke mei puhi biꞌo ka mare. Naugna mare ne khi fajifla ghau iara ka namono gna Lord na, eghuteuna mare eni igne mala tei tarai iara ka keha god delei.

²⁰ Thosei snakre ghau mala tei lehe iara ka keha kantri te khaba fara ka Lord. Jau iagho king gna Israel gne magnahaghei te falehe ghau iara jateula kaisei theli eghu kolho. Iagho hiro ghau iara jateula kaisei mae te tei hiro nanghaji te mala fada falehe ra eghu kolho!”

²¹ Aonu mae Sol ne cheke eghu, “Ghema Devet, thofno tututani fara. Puhi te eni iara igne thofno diꞌa fara. Thuguo, ke pulo mei. Iara ginauna na theome falehe nigho, naugna iagho ne ghatho tahu ghau iara, eghuteuna bongi ia iagho neke theome falehe ghau iara. Iara naikno fameomekro fara te eni glepo te diꞌa igne ka iagho.”

²² Mae Devet ne cheke eghu, “King, ao nou goru iagho ia. Kuruni kaisei nou mae soldia mala mei atha.

²³ Lord na toghoni ihei te doglo nei ghatho tahuni mana teuna. Mana neke lisa mei nigho iagho ka nogu nolaghi iara, nu iara neke theome falehe nigho iagho, naugna Lord ngala teke vahi nigho iagho teke king na.

²⁴ Ginei ia iara neke ghatho tahuni nakarhamu iagho na. Eigna iara magnahagheni Lord te ghatho tahuni nakarhagu iara na mala atha fajifla ghau ka puhi te thoke ghau iara igne.”

²⁵ Eghuteuna King ne cheke eghu ka mana, “Devet, thuguo Devet, Lord fablahi nigho mala uludi koba iagho unha nate edi ka iaghore.” Aonu mae Devet jifla jare ne tei nogna, eghuteuna mae Sol figri neke pulo ka nogna namono na.