Ululahu Samuel 25 - Buka Blahi Ka Cheke Holo

Profet Samuel ne lehe

¹ Kate lehe profet Samuel na, naiknogna Israel na ne kafe mei ne tanhi ka mana. Gnafa teuna, mare ne giugiluni mana Rama ka nogna namono na. Ke leghugna igne, mae Devet ne tei Paran ka namono nagou na.

Devet, Nebal nei Abigel

^2-3 Ka keha narane na, kaisei mae dedei ka vikegna mae Kelab, nanghagna na mae Nabal, maegna ka namono Maon. Mana au nogna glose rhegna namono Kamel. Mana au nogna thilo thogha sipu nei kaisei gobi nanigot. Khetogna mana na, nanghagna na, Abigel. Naꞌa kaisei thau glalase nei famane gaꞌase fara eghu. Nu mae Nabal gne kaisei mae ninhigrana, nei jaola kaisei mae ghosei diꞌatagna.

⁴ Ka narane igre, mae Devet au neu ka namono nagou na. Mana nomhini mae Nabal te kuchi nogna sipu re.

⁵ Aonu mana ne kuru tei nabotho mae majaghani Kamel mala filoni nei cheke fakelini eghu mae Nabal.

⁶ Mae Devet neke cheke ka mare mala cheke eghu ka mae Nabal, “Mae Devet magnahaghei nigho iagho nei vikemu teu iaghore mala au fakeli, eghuteuna mana jaola magnahaghedi nou gobigna lepo iaghore mala keli fara. “ Eghuteuna mae Devet jaola ne cheke ka mare mala cheke eghu ka mae Nabal,

⁷ ‘Mae Devet nomhini te kuchi iagho nou sipure. Mae te mala reireghi nou sipu iagho ra au balumi ghehati, ghehati theome eni kaisei puhi te diꞌa ranghidi mare. Kate au mare balumi ghehati Kamel na, theo kaisei mae te blau kaisei glepo ka mare na.

⁸ Jame te ghusna iagho ka mare na, mare tangomana te cheke ka iagho na. Eghuteuna gognarona, ghehati mei ka iagho ka narane gaghamu igne. Eghume mae Devet tore nigho iagho mala keli ranghi ghami nei taji ghami eghu. Mae Devet na jateula thumu eghu iagho, eghuteuna ghehati jateula nou mae gloku eghu iagho. Ghehati jame keli tami fara jame te togho ghami iagho ka unha te tangomana nigho iagho na.’ ”

⁹ Mae majaghani igre tei ne facheke nogna cheke mae Devet igre ka mae Nabal ne ofo neu.

¹⁰ Nu mae Nabal ne cheke eghu ka mare, “Mae ihei si mae Devet gnea? Mae ihei si thugna Jesi gnea? Ginei na namono igne neke fodu ka naikno sneka. Kmana rikhani nodi funei na!

¹¹ Gano, khoꞌu nei sipu teu te ima iara ka gaghamu ignera, ghedi mae iheire teke kuchi nogu sipu iara ra kolho! Iara theome tangomana te tufa ka mae iheire te theome lasedi iara re!”

¹² Aonu mae majaghani igre figri neke pulo ka mae Devet ne toutonu ka mana nafnata cheke te edi mae Nabal igre.

¹³ Aonu mana ne cheke eghu ka mare, “Ghotilo atha nomi naflahi mala magra ra.” Aonu mare te gnafa na ne kafe kaikaliti. Mana jaola ne famamhaku nogna nhugha na ne sara haghe nogna naflahi mala magra na. Mana vavahi phia gobi mae mala reireghiu nodi glepore, eghuteuna fati gobi mae te mala tei balugna na.

¹⁴ Ka narane igne, kaisei nogna mae gloku Nabal nomhini igne ne tei cheke eghu ka Abigel, “Mae Devet, mae ihei te au teu ka namono nagou ia mana neke kuru mei keha mae mala mei chekeni mare nogna kubae na ka mae funei gne, nu mana cheke fadiꞌadi mare.

¹⁵ Nu mare thono keli fara ranghi ghami ghehati. Theo kaisei mae ka mare te goigoni ghami ghehati na. Kate au ghehati baludi mare ka vido te snagla na, theo kaisei mae ka mare te blauni kaisei glepo ka ghehati na.

¹⁶ Kate au ghehati baludi mae igre te reireghi bongi rane na, mare kegra ligoho ghami ghehati jateula kaisei baragna namono ia eghu.

¹⁷ Iara magnahaghei nigho iagho te ghatho fakelini igne. Naugna puhi te eni mana igne ginauna fadiꞌani mae biꞌo igne nei jaola fadiꞌa ghita tahati hui. Mae igne thono fameomekro fara theome fanomho ka ihei.”

¹⁸ Aonu Abigel ghosei ne atha phei gobi bret, phei baeg guli nanigot te fodu ka waen, glima sipu muita, kaisei gobi piha grep gata, nei phei gobi piha fig neu ne luja ka nogna dongki na.

¹⁹ Naꞌa ne cheke eghu ka nogna mae glokure, “Ghotilo kulu ari, iara ginauna ari ke leghumi ghotilo.” Nu naꞌa ne theome facheke ka khetogna na.

²⁰ Naꞌa lithui ne tei ka keha phile thogele na ne tei thafoni mae Devet te mei balu nogna soldia na.

²¹ Mae Devet neke cheke eghu ka gaoghathogna na, “Mala unha neku neke reireghi fakelidi si iara nogna gobigna lepo mae igne ka namono nagou ra? Theo kaisei mae si teke blaudi nogna glepo mana ra. Iara neke thofno toghoni fara mana. Nu mana theome keli ranghi ghau iara!

²² Igne nogu cheke iara na. Iara ginauna aknu falehe gnafa mae biꞌo nei mae majaghani teu te au ka namonogna mae Nabal. Iara toreni Lord mala falehe ghau iara jame kafe karha teu keha te ghilei hamerane na!”

^23-24 Kate filoni mae Devet na, Abigel ghosei ne krofu soru ka nogna dongki na ne pogho soru pari ke ulugna mae Devet ne cheke eghu, “Funei, fanomho mei ka iara! Glepo igre nogu najafra iara!

²⁵ Iagho those ghathoni Nabal, mae igne theome ghatho tahuni ihei. Iagho laseni, nangha Nabal teu igne gaoghathogna na, ‘Fameomekro.’ Eghume, puhigna na nanaba fara ka nanghagna thegna na. Funei, iara neke theome au kani teke mei nou mae majaghani iagho ra.

²⁶ Funei, Lord kolho te lhoti nigho iagho te theome tughu fapulo glepo te diꞌa teke eni khetogu iara na. Iara cheke tutuani ka nanghagna Lord mae ihei te karha mala paradi nou naoka iagho gre nei jaola parani Nabal.

²⁷ Iara atha mei keha glepo ka iagho funei maladi nou mae soldia iagho gre.

²⁸ “Iagho atha fadelei najafragu iara nou gaꞌase gloku iagho gne. Lord ginauna vahi nigho iagho mala king, leghu fata na, mana ginauna vahini koba kaisei mae ka vikemu iagho na te mala king na, naugna iagho ne magra jateula te chekeni mana na neu. Nakarhamu iagho ginauna keli fabrahu jame te theome eni iagho kaisei puhi te diꞌa na.

²⁹ Neuba ihei ne ngolhi nigho mala falehe nigho neu, Lord ginauna reireghi nigho jateula mae te reireghidi nogna glepo ra eghu. Mana ginauna koko soru nou naoka iaghore pari, jateula mae te koko soru thina te plulu ka khoꞌura eghu.

³⁰ Lord ginauna na jateula teke nhaꞌa chekeni thegna ia eghu edi glepo te keli ranghi nigho iagho, mana ginauna vahi nigho iagho mala king gna Israel.

³¹ Ka narane tuana, iagho ginauna na theome diꞌanagnafa, naugna iagho ne theome faleheni naikno te doglo na. Eghuteuna iagho theome tughu fapulo themu kaisei glepo te diꞌa teke eni ihei ka iagho na. Funei, ka narane te fablahi nigho Lord na, ghatho ghau iara nou gaꞌase gloku gne.”

³² Aonu mae Devet ne cheke eghu ka Abigel, “Iara cheke fakelini Lord, nodi God maedi Israel! Mae ihei te kuru nigho te mei thafo ghau iara gognarogne.

³³ Iara tegio ka God eigna nou gaoghatho te keli, nei eigna unha te eni iagho gognarogne. Mana theome fanogra ghau iara te mala tei te faleheni ihei na. Glahu ke tughu fapulo iara thegu glepo te diꞌa teke edi mae Nabal ka iara ra.

³⁴ Lord mae ihei te karha te tifa igne ngala te fanogra ghau iara te theome goigoni nigho na. Iara cheke kate tutuani ka nanghagna Lord, jame theome faghosei mei thafo ghau iara iagho na, mae te gnafa nei nogna mae gloku teu mae Nabal ra jame lehe neke hamerane nga.”

³⁵ Aonu mana ne atha glepo teke tufa Abigel igre ne cheke eghu ka naꞌa, “Iagho ke pulo ka pharikeli, thosei nanga nou. Iara ginauna eni unha teke toreni iagho na.”

³⁶ Ka teke pulo Abigel ka mae Nabal na, mana au neu ka suga na ei gaghamu neu. Gaghamu te eni mana igne jateula kaisei nogna gaghamu mae king eghu. Mae Nabal koꞌu ne salaꞌui fara ne theome laseni kaisei glepo, aonu ka bongi igne, Abigel ne theome chekeni kaisei glepo ka mana.

³⁷ Nu ka teke keli fapulo mana thinigna na ka keha narane na, khetogna na ne toutonu ka mana gobigna lepo teke chekedi mae Devet igre. Mana rhana nogna fara ne ghosei khoko soru pari ne fnuda.

³⁸ Jame nabotho narane ke leghugna igne, Lord ne faleheni mana.

Mae Devet ne tolaghi ka Abigel

³⁹ Kate nomhini mae Devet te lehe mae Nabal igne, mana ne cheke eghu, “Iara cheke fakelini Lord! Eigna mana togho ghau iara ne theome eni iara kaisei glepo te diꞌa. Mana kolho teke tughu fapulo unha teke eni mae Nabal ka iara na. Lord ne parani mae Nabal eidi najafra gna thegnare.” Mae Devet ne fatei cheke ka Abigel mala tolaghi repa.

⁴⁰ Nogna soldia mana re ne tei ka namono Kamel ne cheke eghu ka Abigel, “Mae Devet kuru mei ghami ghehati mala tore nigho mala tolaghi ka mana.”

⁴¹ Aonu Abigel pogho soru ne cheke eghu, “Keliu kolho. Iara jateula nogna gaꞌase gloku eghu kolho mana. Iara tarabana mala titihi ghahedi nogna mae gloku mana re.”

⁴² Aonu naꞌa ghosei ne kegra haghe ne atha balugna glima nogna gaꞌase glokure. Naꞌa saghe ka nogna dongki na ne tei baludi mare ne tei tolaghi ka mae Devet.

⁴³ Mae Devet jaola ne tolaghi ka Ahinoam thaugna Jeseril. Repa ne kafe tolaghi ka mae Devet.

⁴⁴ Khetogna ulu lahu na Mikal thugna king Sol, nu king ne tusu lao gaꞌase igne ka mae Paltiel thugna mae Laes, maegna ka namono Galim.