Ululahu Samuel 23 - Buka Blahi Ka Cheke Holo

Mae Devet ne fakarhini namono Keila

¹ Kaisei fata, mae Devet ne nomhini te mei mae Filistia te goigoni ni namono Keila, eghuteuna mare blau gano teke athala mare ka nagare re.

² Aonu mae Devet ne tarai eghu ka Lord, “Ba? Keliu kolho te tei magra iara ka mae Filistia igre, ba theo?” Lord ne cheke eghu, “Uve, tei sagho magra ka mare mala fakarhini namono Keila.”

³ Nu nogna soldia mae Devet igre ne cheke eghu ka mana, “Ghehati mhaghu nomi fara te au teu agne Juda na. Nu jame te tei tahati Keila te magra ka mae soldiadi Filistia are na, ghehati ginauna na mhaghu nomi salaꞌui.”

⁴ Mae Devet neke fapea tarai ka Lord, aonu Lord ne cheke eghu ka mana, “Ghotilo tei Keila. Iara ginauna togho ghami ghotilo mala tapla faparidi ghotilo soldiadi Filistia tuare.”

⁵ Aonu mae Devet balu nogna soldia ne tei magra ne atha nodi buluka maedi Filistia igre. Mare ne aknu falehe kmana mae soldia ka mae Filistia. Ka puhi igne, mana ne fakarhidi naiknodi Keila.

⁶ Ka narane te rikha te mei mae pris Abiata thugna mae Ahimelek te tei balugna mae Devet Keila igne, mana atha ne mei balugna efod blahi te mala tarai ka God igne.

Mae Sol ne ngolhi leghuni mae Devet

⁷ Keha naikno ne tei cheke ka mae king Sol eigna mae Devet te au teu ka namono Keila. Aonu mana ne cheke eghu, “God lisa meinihi mana ka khamegu iara. Mana tei au ka kaisei namono te bara te ligoho ka thina biꞌo balugna kaisei grengatha te mala bobothoni mana na. Mana au ke lamnagna kaisei phighoro gognaro na!”

⁸ Aonu mana ne ehadi nogna soldiare mala kafe mei kegra faligohoni namono igne mala faleheni mae Devet baludi nogna mae soldiare.

⁹ Nu kate nomhini mae Devet thoutonu eigna mae Sol te magnahaghei faleheni na, mae Devet ne cheke eghu ka mae pris Abiata, “Atha mei efod ia mala tarai ka Lord.”

¹⁰ Aonu mae Devet ne tarai eghu, “Lord, nodi God mae Israel, iara nomhini mae Sol te magnahaghei mei roꞌeni namono igne naugna te au teu iara igne.

¹¹ Ba, mana ginauna mei agne tutuani? Jame te mei mana agne na mae biꞌogna namono igne ginauna snakre lao ghau iara ka mana? Lord, nodi God mae Israel cheke tughu mei ranghi ghau!”

Lordne falalase ka mana nate mei mare na

¹² Aonu Devet ne tarai eghu, “Mae biꞌodi Keila igre ginauna snakre lao ghau iara baludi nogu mae soldia gre ka khamegna Sol?” Eghuteuna te chekeni Lord ka mare na mare ginauna eni igne.

¹³ Aonu Devet ne jifla ka namono Keila balugna nogna namno gobi soldia. Mare tei fabrahu ne theome au snoto kaisei vido. Aonu kate nomhini mae Sol te jiflahi mare Keila na, mana neke theome tei jare.

Mae Devet tei ne poru ka namono nagou Sif

¹⁴ Mae Devet tei ne au Sif ka namono nagou na, mana tei ne poru ka thogele holo ka kaisei vido te keli. Leuleghu narane na mae king Sol ne hironi fabrahu mana, neuba God na theome snakreni mae king te athini mana na.

¹⁵ Kate au teu mae Devet Hores ka namono nagou Sif, mana laseni mae king Sol te magnahaghei mei faleheni mana na.

¹⁶ Nu mae Jonatan ne tei ka mae Devet Hores. Mana magnahaghei te toghoni mae Devet mala rheta mana nogna fatutuani na ka God.

¹⁷ Mae Jonatan ne cheke eghu ka mana, “Thosei mhaghu, mae kmagu iara na theome tangomana te falehe nigho iagho na. Eigna iagho ginauna mala king gna Israel, eghuteuna iara mala mei fapea ka iagho.”

¹⁸ Phiamare ne nhaꞌa cheke ka nanghagna Lord mala theome gnafa nodi fofodu na. Ke leghugna igne, mae Jonatan figri neke pulo ka namono, nu mae Devet ne au neu Hores.

¹⁹ Keha naikno ka namono Sif ne tei Gibea ne cheke eghu ka mae king Sol, “Mae Devet gognarona mei au ke lamnagna nomi nohi ghehati gne. Mana poru Hores ka vido te ninhigrana ka thogele Hakila ke mata namono nagou Jesimon.

²⁰ King, ghehati laseni, iagho magnahaghei te lokini mana. Te keli na iagho mei ka ghehati agne, ghehati ginauna lisa arini ka khamemu iagho.”

²¹ Mae Sol ne cheke eghu ka mare, “Lord fablahi ghami ghotilo, naugna ghotilo ne togho ghau iara!

²² Ghotilo tei filo fakelini ka vido aheva te au teu mana gognaro na, nei ihei te filoni mana jare na. Iara nomhini mae igne thono lase poru fara.

²³ Ghotilo tei hirodi vido aheva te tei poru mana na, eghuteuna ghotilo faghose mei cheke ka iara. Iara ginauna ari balumi ghotilo, jame au teu mana ka vido tuana na, iara ginauna hiro ghilei deni mana. Neuba iara ne tei tongana ka nodi vido vikegna mae Juda, iara ginauna filoni mana.”

²⁴ Aonu mare figri neke pulo Sif. Mae Sol jifla ne tei ke leghudi mare. Ka narane igne, mae Devet balu nogna soldia mare au neu ka namono nagou ke maghati Maon, ke mosu Thongna Lehe, nei ke mata namono nagou biꞌo Jesimon.

²⁵ Mae Sol balu nogna soldia ne mei hironi mana, nu kate nomhini mae Devet te mei mare na, mana tei ne poru ka thogele thina ka namono nagou rhegna Maon. Kate nomhini mae Sol igne, mana tei ne hironi mana.

²⁶ Mae Sol balu nogna mae soldia ne tei au ka keha phile thogele na, eghuteuna mae Devet balu nogna soldia ka keha phile na. Mae Devet baludi nogna soldia gre ghosei jifla ne rikhani mae Sol balu nogna soldia, naugna mare mei namo fara ka mare.

²⁷ Nu kaisei mae chari ne mei ka mae Sol ne cheke eghu ka mana, “King, ghose mei! Armi gna Filistia na lamei goigoni ka kantri tahati ia!”

²⁸ Aonu mae Sol ne theome ngolhini mae Devet neke figri neke pulo mala magra ka armi gna Filistia. Naugna igne, mare kiloni vido igne, “Thina sopa thei.”

²⁹ Mae Devet jifla ka namono nagou igne ne tei poru ka glogu glokha khoꞌu En-Gedi.