Ululahu Samuel 22 - Buka Blahi Ka Cheke Holo

Kmana mae ne leghuni mae Devet

¹ Aonu mae Devet rikha Gat ne tei au ka kaisei gluma thina ka vido Adulam. Kate nomhini te au teu mana ka vido igne, thabusigna nei vikegna teu manare ne mei ne au balugna mana.

² Eghuteuna iheire te au puhi tadi, iheire te theome falelehe nodi kaoni, nei iheire te diꞌatadi eidi keha glepo teu igre jaola ne leghuni mana. Ka puhi igne, mae Devet ne batudi fati gobi mae.

³ Aonu mana atha balugna mae igre ne jifla ka vido igne, ne tei Moab ka namono Mispa. Aonu mana ne ghusna eghu ka king gna kantri igne, “Iagho tangomana te snakredi idogu kmagu teu iara gre te mala au ka iagho agne te ghilei laseni iara unha nate eni God ka iara na?”

⁴ Mae king ne faꞌuveni mana. Aonu mae Devet ne cheke ka repa mala au balugna king gna Moab. Repa au neu ka namono igne kate tei poru mana ka kaisei vido te keli na.

⁵ Nu profet Gad ne mei filoni mana ne cheke eghu, “Iagho thosei au ka vido igne. Iagho ke pulo ka nohi Juda.” Aonu mae Devet jifla jare ne tei au ka nathuꞌa Heret.

King Sol ne falehedi hatimare mae pris

⁶ Kaisei narane, king Sol ne haghe ka thogele Gibea. Mana gnokro pari louloku neu nogna goru na ke parigna gaju Tamaris. Eghuteuna nogna mae biꞌo te gnafa manare kafe gnokro faligohoni neu mana. Ka narane igne, King Sol nomhidi keha naikno teke filoni mae Devet balugna mae te leghuni manare.

⁷ Aonu mana ne cheke eghu ka nogna mae biꞌo te gnafare, “Fanomho, ghotilo maemi Juda ra, Jame te toghoni ghotilo thugna mae Jesi igne na, mana ginauna tusu ari glose ka ghotilo te mala tobi nagare grep? Ba, mana ginauna vahi ghami ghotilo mala nogna komanda mana?

⁸ Jame igne gaoghatho te theome ghatho tahu ghau iara ghotilo gne! Theo kaisei ka ghotilo te mei cheke ka iara aheva mae thugu iara mae Jonatan balugna thugna Jesi igne te nhaꞌa cheke phiamare te mala fofodu fabrahu na. Mana nogu mae gloku iara, nu mana hiro puhi te mala falehe ghau iara na! Eghuteuna mae thugu iara mae Jonatan igne ngala te huhuruni mana te eni igne, nu theo kaisei ka ghotilo te ghatho tahu ghau iara te mei chekeni glepo igne ka iara na.”

⁹ Ka narane igne, Doeg maegna Idom igne kegra neu baludi nogna ofisa mae king igre. Mae Doeg ne cheke eghu, “Iara neke filoni thugna mae Jesi igne Nob ka teke tei filoni mana mae pris Ahimelek thugna mae Ahitub ia.”

¹⁰ Mae Ahimelek neke tarai ka Lord mala laseni unha God nate eni ka mae Devet. Mana jaola tusu lao keha gano ka mana. Eghuteuna mana tusu lao ka mana nogna naflahi mae Golia mae nhetagna Filistia.

¹¹ Aonu King Sol ne fatei cheke ka mae pris Ahimelek nei vikegna mana te au Nob mala mei filoni mana. Aonu mare ne mei ka mana,

¹² eghuteuna mana ne cheke eghu ka mae Ahimelek, “Iagho thugna mae Ahitub, fanomho sagho!” Aonu mana ne cheke eghu ka King Sol, “Uve, funei.”

¹³ Mae Sol ne cheke eghu, “Naugna unha si ghopa thugna mae Jesi igne te roghe pouporu ghau iara gnea? Iagho tusu lao gano nei naflahi mala magra nei taraini mana ka God eghu. Gognarona mana nogu naoka iara. Mana hiro puhi mala falehe ghau iara!”

¹⁴ Nu mae Ahimelek ne cheke eghu, “King, theo kaisei mae soldia te ghatho tahu nigho iagho jateula mae Devet teuna. Mana nanghomu iagho nei mana kaisei nou mae ofisa biꞌo iagho eghu. Naikno te gnafa ka sugamu iagho na kafe ghatho tahuni mana.

¹⁵ Uve, iara neke taraini mana ka God, nafnata te eni te mei iara tifa ra. Nu cheke te eni iagho vikegna mae kmagu iara na ne ghaoghaho mala eni kaisei puhi te diꞌa ranghi nigho iagho teu igne theome tutuani. Iara theome laseni kaisei glepo eigna igne!”

¹⁶ Nu King ne cheke eghu, “Ghema Ahimelek, gognarona iagho baludi vikemu gre mala kafe lehe.”

¹⁷ Mae Sol ne cheke eghu ka mae te kegra teu rhegna mana re, “Tei aknu falehe gnafa nogna pris Lord igre! Naugna mare ne phile ka mae Devet. Mare laseni te rikha mana na, nu mare theome facheke ka iara neu!” Nu nogna ofisa mae Sol igre ne tirodi te falehedi nogna pris Lord igre.

^18-19 King Sol ne cheke eghu ka mae Doeg, “Tei sagho aknu falehe mae pris are!” Mae Doeg maegna Idom igne tei ne aknu falehe ne gnafa mae pris re. Aonu ka narane tuana, mana ne aknu falehe nhanasalei glima mae pris te kafe fahaghe nodi phoko blahi re. Mana jaola ne tei Nob ne aknu falehe ne hui mae nalhaꞌu, gaꞌase, goro sua nei thudi teke karhala. Mana aknu falehe nodi buluka, nodi dongki nei sipu teure.

²⁰ Nu mae Abiata, kaisei thugna mae pris Ahimelek, mana rikha ne tei ka mae Devet.

²¹ Mana ne toutonu ka mae Devet te aknu falehe mae king nogna pris Lord.

²² Mae Devet ne cheke eghu ka mana, “Iara neke filoni mae Doeg maegna Idom igne ka narane tuana Nob. Mana jame neke toutonu eigu iara ka mae king Sol. Eghume najafragu iara glehedi vikegna mae kmamu iagho ra.

²³ Nu iagho thosei mhaghu, iagho au balugu iara. King magnahaghei te falehe ghita tapa, nu jame te au iagho balugu iara na, iagho ginauna na theome tangomana te lehe na.”