Ululahu Samuel 21 - Buka Blahi Ka Cheke Holo

Mae Devet ne rikhani mae Sol

¹ Mae Devet ne tei Nob mala filoni mae pris Ahimelek. Kate filoni mae Devet na, mae Ahimelek ne mhaghu nogna fara. Mana ne cheke eghu, “Naugna unha sagho te mei kolho themu te theo ihei nga te mei balumu gnea?”

² Mae Devet ne cheke eghu, “King neke kuru mei ghau iara, nu mana theome snakre ghau iara te toutonu eigna igne ka ihei nga. Iara chekehi ka mae te au balugu re aheva nate thafodi iara re.

³ Unha gano te au ka iagho agne na? Famei glima bret, ba unha te au ka iagho na.”

⁴ Mae pris Ahimelek ne cheke eghu, “Iara theo bret, nu iara au keha bret blahi kolho agne na. Ghotilo tangomana te ima bret igne jame te theome thuru balu gaꞌase mae te au balumu iaghore.”

⁵ Mae Devet ne cheke eghu, “Theo, mae te au balugu iara igre mare theome thuru balu gaꞌase. Eigna kate tei ghehati ka nomi gloku na, mare au klino koba mala gae fabrahu ke ulugna Lord. Nu gognarona ghehati mei ka nogna gloku king, eghume mare thofno reireghi fakelidi thedi.”

⁶ Aonu pris ne tufa ka mae Devet bret blahi igre naugna mana theo kaisei bret te au jare na. Leghu narane na mare atha fajifla bret blahi te jemnu igre ka Sugablahi na mala ke tughu kate brana.

⁷ Kaisei nogna mae gloku mae Sol na au jare ka narane tuana. Mae igne kaisei mae biꞌo mala reireghi sipu. Mare atha mae igne mala fadoglidi keha glepo ke ulugna Lord. Mae igne maegna Idom, nanghagna na, mae Doeg.

⁸ Mae Devet ne ghusna eghu ka mae Ahimelek, “Iagho au kaisei jata ba naflahi mala magra agne? Mae king ne nanga nogna fara ka iara, naugna igne te theome atha iara nogu naflahi nei keha glepo mala magra teura.”

⁹ Mae pris Ahimelek ne cheke eghu, “Nogna naflahi mae Golia, maegna Filistia teke fada falehe iagho ka glogu Ila ia ngala te au teu igne na. Pipiha lilisei teu iara ke leghugna efod na ana. Jame te magnahagheni iagho na, iagho tangomana te atha na. Tuana ngala kaisei glepo mala magra te au ka iara agne na.” Mae Devet ne cheke eghu, “Jare na theo kaisei naflahi te jateula te nogna mae Golia igne teuna! Famei sagho ka iara.”

Mae Devet ne tei au baludi mae Filistia

¹⁰ Ka narane igne, mae Devet ne rikhani mae Sol ne tei Filistia ne tei au balugna mae funei Akis ka namono Gat.

¹¹ Kate au teu mae Devet jare na, nogna mae gloku king Akis re ne cheke eghu, “Mae igne nodi king mae Israel. Gaꞌasedi Israel re neke fafnaknoni nanghagna mana na. Rehati neke ragi balu koje neke cheke eghu: “King Sol neke aknu falehe kaisei thogha naoka. Nu Devet neke aknu falehe nabotho thogha.”

¹² Kate nomhidi mae Devet nodi cheke mare igne, mana ne mhaghu nognani fara mae funei Akis.

¹³ Aonu kate mei namo mare na, mana chaghi ne jateu mae te nolira neu. Kate fariu riu lolhoku mare na, mana ne edi glepo te fameomekro re ne ghagharosi ka gringni thinagna namono na, aonu mana fasoru naoko ne oro ne sukha ka gremoho gnare.

¹⁴ Aonu king Akis ne cheke eghu ka nogna mae glokure, “Filo si ghotilo! Mae igne la nolihi! Naugna unha site atha te mei ghotilo ka iara mae ignea?

¹⁵ Tore! Iara au kmana mae te nolihi agne na. Iara theome magnahaghei te atha te mei ghotilo mae igne ka nogu suga na.”