Ululahu Samuel 20 - Buka Blahi Ka Cheke Holo

Mae Jonatan ne toghoni mae Devet

¹ Mae Devet ne rikha Naeot Rama ne tei thafoni mae Jonatan ne cheke eghu ka mana, “Unha najafra si teke eni iara te diꞌatagna mae kmamu iagho ignea? Iara theome huhughuni kaisei vetula. Ba, unha glepo te diꞌa si teke eni iara ka mana te magnahaghei falehe ghau iara mana gne?”

² Nu mae Jonatan ne cheke eghu, “Theo! Iagho theome tangomana te lehe na! Eigna mae kmagu iara na theome tangomana te poruni kaisei glepo ka iara, neubane glepo biꞌo ba ikoi!”

³ Nu mae Devet ne cheke eghu, “Mae kmamu iagho na lase nigho iagho te namha ghau fara iara na. Mana jame theome falalase ka iagho unha te magnahaghei eni mana na. Naugna mana theome magnahaghei te diꞌa nagnafamu iagho na. Ka nanghagna Lord te karha, iara cheke kate tutuani, iara namo lehehi.”

⁴ Aonu mae Jonatan ne cheke eghu, “Unha te magnahagheni iagho na, iara ginauna eniu.”

⁵ Aonu mae Devet ne cheke eghu, “Nathuꞌu na gaghamu gna u khafa ia. U narane te mala ghamu iara balugna king. Nu jame theome keli te au iara ka gaghamu na teu iagho gaoghathomu na, iara ginauna tei poru ka nagare gno ghilei grafi nauriha.

⁶ Jame te ghusna nigho mae kmamu ne faꞌunha ne theome aunga iara teuna, iagho cheke ka mana teke tore nigho iara mala tei Betlehem ka namonogu na teku ia, naugna ghehati tharakna fafara leuleghu finogha gognarogna.

⁷ Jame te cheke eghu mana na, ‘Keliu ngala’ teuna, keliu kolho ka iara. Nu jame te diꞌatagna mana na, iagho laseni mana ghaoghathonihi te mala goigoni ghau iara na.

⁸ Jonatan, togho ghau iara nou mae gloku gne, eigna tapa neke eni kaisei nhaꞌa cheke ke ulugna Lord. Jame teke eni iara kaisei najafra ka mae kmamu iagho na, theome naba iagho te atha te tei ghau iara ka mana na, te keli na iagho ngala te falehe ghau iara na.”

⁹ Nu mae Jonatan ne cheke eghu, “Theo, theome tangomana. Jame te laseni iara mala fadiꞌa nigho iagho teu mae mama na, iara ginauna cheke ranghi nigho.”

¹⁰ Aonu mae Devet ne cheke eghu, “Jame diꞌatagna mana te raja ka iagho na, mae ihei nate fanomhi ghau iara na?”

¹¹ Mae Jonatan ne cheke eghu ka mana, “Mei sagho, ari tapa ka nagare gno.” Aonu mae Jonatan ghe mae Devet ne kafe tei ka nagare na.

¹² Mae Jonatan ne cheke eghu ka mae Devet, “Ka nanghagna Lord, God gna Israel, iara nhaꞌa cheke ka iagho, jateula gognarogne teu nauriha na, iara ginauna hironi gaoghathogna mae mama na. Jame te keli tagna mana ka iagho na, iara ginauna famei cheke mala fanomhi nigho iagho.

¹³ Nu jame ghaoghaho mala fadiꞌa nigho iagho teu mana na, iara ginauna togho nigho mala rikha iagho. Jame te theome eni iara igne na, snakreni Lord mala para ghau iara. Iara toreni Lord mala au balumu iagho jateula mana teke au balugna mae mama tifa ia eghu!

¹⁴ Ghatho ghau fabrahu jateula Lord te ghatho tahu ghita gne eghu mala theome lehe iara.

¹⁵ Kate falehedi te gnafa Lord nou naoka iagho ka nauthoglu igne, iagho ghathoni fabrahu tharaknagu iara gne.”

¹⁶ Aonu mae Jonatan ne eni kaisei nhaꞌa cheke balugna mae Devet maladi vikedi phia mare re ne cheke eghu, “Jame te theome leghuni ghotilo nhaꞌa cheke igne, iara toreni Lord mala paradi vikegna mae Devet.”

¹⁷ Aonu mae Jonatan ne toreni mae Devet mala ke nhaꞌa chekei mala ghatho tahuni nhaꞌa cheke igne, naugna mae Jonatan namhani fara mae Devet jateula Devet te namhani mae Jonatan eghu.

¹⁸ Gnafa teuna, mana ne cheke eghu, “Nathuꞌu ia narane gaghamu khafa, jame te theome au iagho ka nou vido mala gnokro kate ghamu na, mae mama ginauna laseni te tei iagho na.

¹⁹ Nauriha na iagho ke tei ka vido aheva teke poru iagho ka fufunu gna puhi igne ia. Iagho ofou rhegna thina te kiloi mare Esel.

²⁰ Iara ginauna fada tei thilo jata rhegna vido tuana, jateula te fadi iara kaisei glepo ra eghu.

²¹ Eghuteuna iara ginauna kuruni kaisei mae sitei mala tei hirodi jatare. Glahu eha eghu tei iara ka mana, ‘Ei, jatare ke delamu iagho jare! Atha mei agne!’ Te nomhi iagho igne na, iagho jifla jare mei, naugna gobigna lepore keliu kolho. Iara nhaꞌa cheke ka nanghagna Lord te karha, gobigna lepore ginauna keliu kolho.

²² Nu jame te eha eghu tei iara ka mae sitei na, ‘Ei, jatare thei gaꞌu fara ke delamu iagho.’ Te nomhi iagho igne, iagho rikha, naugna Lord cheke ranghi nigho iagho te mala rikha na.

²³ Eghuteuna nhaꞌa cheke te eni tapa gognarogne, Lord ginauna filo glani ka tapa, eghume tapa mala loku famaku nhaꞌa cheke igne.”

Mae king Sol ne diꞌatagna fara ka mae Devet

²⁴ Aonu mae Devet tei ne poru ka nagare na. Ka gaghamu khafa igne, king ne mei ghamu.

²⁵ Mana mei ne gnokro fei gringni ka vido te gnokro koba thegna na. Mae Jonatan ne gnokro ka nogna vido na, eghuteuna mae Abna ne gnokro rhegna king. Nu nogna vido mae Devet na krogha.

²⁶ King ne theome chekeni kaisei glepo ka iheire te au teu jate ka narane igne eigna mae Devet, naugna glahu edi mae Devet keha glepo te theome doglo ke ulugna Lord, te theome naba mae Devet te mei ka gaghamu igne leghuni unha te chekeni ka vetula na.

²⁷ Nu ka fapea narane ka gaghamu igne, mae Devet jaola ne dofini ka nogna vido na, aonu mae king ne ghusna eghu ka mae Jonatan, “Naugna unha site theome mei ka gaghamu thugna mae Jesi gnea?”

²⁸ Jonatan ne cheke eghu, “Mana neke tore ghau iara mala tei Betlehem. Mana neke tore ghau iara

²⁹ mala snakre teini neku. Naugna tharaknagna mana re fafara ka nodi namono na. Thabusigna mana igre magnahagheni fara mana te tei na. Naugna igne te theome au mana ka gaghamu igne.”

³⁰ Nu mae Sol ne thono diꞌatagna fara ka mae Jonatan ne cheke eghu, “Iagho thugna idomu te diꞌa fara puhigna na nei huhughu fara teu igne. Iara gognarona thofno lase nigho iagho te thofno fofodu fara ka thugna mae Jesi igne! Iagho fadidiꞌa nanghamu na balugna nanghagna idomu na!

³¹ Filo sagho! Jame karha teu thugna mae Jesi igne, iagho ginauna theome king ka kantri igne! Tei atha mei mae tuana gognarola. Mana mala lehe!”

³² Nu mae Jonatan ne cheke eghu, “Naugna unha te magnahaghei leheni mana iagho na? Unha najafra teke eni mana na?”

³³ Kate nomhini King Sol cheke igne, mana ne rogna fadi faleheni mae Jonatan ka jata. Aonu mae Jonatan laseni mae kmagna na magnahaghei te faleheni mae Devet.

³⁴ Aonu mae Jonatan ne thono diꞌatagna fara ne kegra haghe ka tevo na ne jifla ne tirogna ghamu ka fapea narane gaghamu igne. Mana ne diꞌanagnafa gna fara ka puhi te cheke fadiꞌani mae Devet mae kmagna na igne.

Mae Jonatan ne fanomhini mae Devet

³⁵ Hamerane ka keha narane na, mae Jonatan tei ne hironi mae Devet ka nagare na, leghuni unha teke chekeni phiamare na. Mae Jonatan ne atha kaisei masitei balugna.

³⁶ Aonu mana ne cheke eghu ka masitei igne, “Iagho ginauna chari tei mala atha jata nate fada tei iara gre.” Aonu mae sitei igne ne funu chari, aonu kate fada te tei mae Jonatan kaisei jata na, jata igne ne tei soru ke delagna mae sitei na ka vido te khaba fara.

³⁷ Kate tei thoke mae sitei na ka vido te tei khoko jata igne na, mae Jonatan ne eha eghu tei ka mana, “Ei, jata na tei fara ke delamu iagho!

³⁸ Iagho thosei au ka vido tuana! Faghose!” Aonu mae sitei na ghosei ne tei atha jata na neke pulo mei ka mae Jonatan.

³⁹ Nu mae sitei igne theome laseni gaoghathodi glepo igre, mae Jonatan ghe mae Devet kolho te lasedire.

⁴⁰ Gnafa teuna, mae Jonatan ne tusu lao phaloho na ka mae sitei igne mala atha ke posa ka namono na.

⁴¹ Ke leghugna tela teihi mae sitei na, mae Devet jifla mei ka thina teke poru mana na ne mei ke ulugna mae Jonatan ne tuturupuku soru, mana ne thilo fata tufru soru pari ka glose na. Aonu phiamare ne faꞌababa ne orio tanhi, nu mae Devet ne tanhi nogna fara.

⁴² Aonu mae Jonatan ne cheke eghu ka mae Devet, “Tei sagho, thosei diꞌanagnafa, naugna tapa nhaꞌa chekehi ke ulugna Lord. Mana ginauna na fiofilo ghita baludi vikedare, tahati te gnafa na mala tajini fabrahu nhaꞌa cheke igne.” Aonu mae Devet jifla ka vido igne ne tei, eghuteuna mae Jonatan figri neke pulo ka namono na.